مەملەكەت باسشىسى كينوگەرلەر مەن كينوتەاتر يەلەرىنىڭ مۇددەلەرى تەڭ بولۋى كەرەگىن اتاپ ءوتتى.
«قازىر كينوتەاتر يەلەرى وتاندىق فيلمدەردى ەكراننان كورسەتۋ ءۇشىن قوماقتى قارجى تالاپ ەتەدى. بيلەتتەن تۇسكەن قارجىنىڭ ەداۋىر بولىگى تاعى دا كينوتەاترلاردىڭ جانە جەكە كومپانيالاردىڭ قالتاسىنا كەتەدى. بۇعان قوسا, كينوگەرلەر ءفيلمدى ناقتى قانشا ادام كورگەنىن انىقتاي المايدى. قىسقاسى, كينوعا بۇكىل ءبىلىمىن, كۇش-قايراتى مەن ۋاقىتىن سارپ ەتكەن ماماندارعا تابىستىڭ از عانا بولىگى تيەدى. كينو ماماندارى پايدا تابۋ ءۇشىن وتە ارزان فيلمدەر تۇسىرۋگە ءماجبۇر. سوندىقتان, قۇنى ارزان, مازمۇنى ارزان فيلمدەر پايدا بولىپ جاتىر.
وتاندىق كينونىڭ دامۋىنا جاڭاشا كوزقاراس, تىڭ سەرپىن كەرەك. مىسالى, كينوعا بارعان كورەرمەن سانىن ەسەپتەيتىن تسيفرلىق جۇيە ەنگىزۋگە بولادى. مادەنيەت جانە سپورت مينيسترلىگىنە جۋىق ارادا وسى جۇيەنى دايىنداپ, قولدانىسقا ەنگىزۋدى تاپسىرامىن. جالپى, كينويندۋستريانى ەكونوميكانىڭ جەكە تارماعى رەتىندە قاراستىرىپ, ماسەلەلەردى ناقتى شەشكەن ءجون. اسىرەسە, كينوگەرلەر مەن كينوتەاترلاردىڭ اراسىنداعى قارىم-قاتىناستا ەكى جاقتىڭ دا مۇددەسىن تەڭدەي ەسكەرۋ قاجەت. سوندا جاڭا كەيىپكەر, تاريحي قاھارمان, ماڭىزدى وقيعالار جايلى فيلمدەردى تەك «قازاقفيلم» ەمەس, جەكە كومپانيالار دا تۇسىرەدى. وسكەلەڭ ۇرپاق شەتەلدىڭ كەيىپكەرىنە ەمەس, ءوز باتىرلارىمىزعا قاراپ بوي تۇزەيتىن بولادى», دەدى پرەزيدەنت.
سونداي-اق مەملەكەت باسشىسى قازىرگى تاريحي كينولاردىڭ كەمشىلىكتەرىن اتاپ, بۇرىڭعى كلاسسيكالىق فيلمدەر سەكىلدى كاسىبي فيلم ءتۇسىرىلۋ كەرەگىن ايتتى.
«كەزىندە شىققان «قىز جىبەك», «وتىراردىڭ كۇيرەۋى», «اتاماننىڭ اقىرى» سياقتى كلاسسيكالىق فيلمدەر ءتۇسىرىلۋى كەرەك دەپ سانايمىن. سول كەزدە شىعارماشىلىق ەركىندىك, مول قاراجات جانە كومپيۋتەرلىك گرافيكا دا بولعان جوق. دەگەنمەن, فيلمدەر ءتۇسىرىلدى, ءالى كۇنگە دەيىن حالىقتىڭ جۇرەگىنەن ويىپ تۇرىپ ورىن الادى. شىنىن ايتۋىمىز كەرەك, سوڭعى كەزدە تۇسىرىلگەن تاريحي فيلمدەردىڭ ولقىلىقتارى كوپ. سول ءۇشىن ماماندارمەن اقىلداسىپ, جالپى كينو سالاسىن رەفورمالاۋ كەرەك», دەدى قاسىم-جومارت توقاەۆ.
