«بۇگىن مەن ۇسىنعان باستامالار – الداعى اۋقىمدى جۇمىستىڭ ءبىر بولىگى عانا. جاڭا يدەولوگيالىق تۇجىرىمدى ورنىقتىرۋ ءۇشىن مەملەكەتتىك اپپارات, ساراپشىلار, عالىمدار, تىلشىلەر, ازاماتتىق قوعام وكىلدەرى – ءبارى جۇمىلۋى قاجەت. پرەزيدەنت اكىمشىلىگى جۇمىس جوسپارىن ازىرلەپ, ايتىلعان ماسەلەلەردى تۇگەل قاتاڭ باقىلاۋعا الادى. ءبىز ادىلەتتى قازاقستاندى قۇرىپ جاتىرمىز. بۇل – وتە جاۋاپتى ءارى ابىرويلى مىندەت», دەدى پرەزيدەنت.
وسى تۇستا مەملەكەت باسشىسى ءار قازاقستاندىق ەلگە دەگەن جاناشىرلىعىن ناقتى ىسپەن كورسەتسە, ەل حالقىنىڭ بىرەگەيلىگى ناتيجەلى بولاتىنىن ايتتى.
ء«بىز وتانشىلدىعىمىزدى جانە ەلگە جاناشىرلىعىمىزدى ناقتى ىسپەن كورسەتۋىمىز كەرەك. «ادال ازامات» بولۋعا ۇمتىلۋىمىز قاجەت. سوندا ارقايسىمىز وتانىمىزدى وركەندەتۋگە ۇلەس قوسامىز. مەن ءۇشىن ۇلتتىق قۇرىلتاي جۇرتشىلىقپەن كەزدەسىپ, جاي عانا پىكىر الماساتىن جەر ەمەس. ونى ەلىمىزدىڭ مادەني-رۋحاني ورلەۋىنە جول اشاتىن شامشىراق دەۋگە بولادى. ياعني, قۇرىلتاي الاڭىندا قوعامنىڭ جاڭا ەتيكاسىن جانە ونىڭ جاڭا دامۋ ۇلگىسىن قالىپتاستىرۋ ماسەلەسى قارالادى. ارينە, بۇل – ءبىر كۇندە بىتەتىن شارۋا ەمەس. ول ءۇشىن كۇن سايىن تىنىمسىز ەڭبەك ەتۋىمىز كەرەك. ءبىر سوزبەن ايتقاندا, مەملەكەت پەن قوعام بىرگە جۇمىلىپ جۇمىس ىستەۋى قاجەت. بۇل ۇلتىمىزدىڭ بويىنا وراسان زور كۇش-قۋات دارىتادى, وزگەرىسكە دەگەن قۇلشىنىسىن وياتادى. سوندا عانا, ەلىمىز كوزدەگەن ماقساتىنا جەتەدى. وسىلايشا, الداعى ونجىلدىق ەلىمىزدىڭ ناعىز ورلەۋ داۋىرىنە اينالماق. مەن بۇعان كامىل سەنەمىن», دەپ ويىن جەتكىزدى پرەزيدەنت.
جيىندى قورىتىندىلاي كەلە پرەزيدەنت ۇلتتىق قۇرىلتايدىڭ كەلەسى وتىرىسىن اتىراۋ وبلىسىندا وتكىزۋدى ۇسىندى.
«بىلتىر ۇلىتاۋدا, بيىل كيەلى تۇركىستاندا باس قوسىپ, ەلدىك ماسەلەلەردى تالقىلادىق. ەل تاريحىندا ايرىقشا ورنى بار تاعى ءبىر ايماق – اتىراۋ وبلىسى. ونداعى ايگىلى سارايشىق قالاسىندا اتاقتى حاندارىمىز ورداسىن تىككەن. مەن ۇلتتىق قۇرىلتايدىڭ كەلەسى وتىرىسىن وسى شەجىرەلى ايماقتا وتكىزۋدى ۇسىنامىن. ەلىمىزدە لايىم جاقسىلىق كوپ بولسىن!», دەپ تۇيىندەدى قاسىم-جومارت توقاەۆ.
