«مەن قوعامدا مەملەكەتتىك اپپاراتتىڭ جۇمىسىنا قاتىستى ءبىراز سىن-پىكىرلەر بار ەكەنىن بىلەمىن. ولاردىڭ باسىم كوپشىلىگى ورىندى. قازىرگى تاڭدا ءبىز مەملەكەتتىك باسقارۋ جۇيەسىن جاڭعىرتۋ ءۇشىن ناقتى شارالار قابىلداپ جاتىرمىز. نەگىزگى مىندەت – جەرگىلىكتى ءوزىن-ءوزى باسقارۋدى كۇشەيتىپ, مەملەكەتتىك قىزمەتشىلەرگە كوبىرەك دەربەستىك بەرۋ», دەدى پرەزيدەنت.
مەملەكەت باسشىسىنىڭ ايتۋىنشا, مەملەكەتتىك اپپارات وكىلدەرىنىڭ سانا-سەزىمىن وزگەرتۋگە باسا ءمان بەرۋ ماڭىزدى.
«بۇدان بولەك, اۋدان جانە اۋىل اكىمدەرىن سايلادىق. وبلىستىق ماسليحاتتارعا سايلاۋ ارالاس جۇيە ارقىلى, ال اۋدان ءماسليحاتتارىنا تەك ءبىر مانداتتىق قاعيدات بويىنشا وتەدى. الداعى جۇمىس – اۋقىمدى. ءبىراز ۋاقىت قاجەت ەكەنى تۇسىنىكتى. ەڭ باستىسى, ءبىز مەملەكەتتىك اپپارات وكىلدەرىنىڭ سانا-سەزىمىن وزگەرتۋگە باسا ءمان بەرۋىمىز قاجەت. ولار تۋعان-تۋىستارىنىڭ اراسىندا نە بولماسا قوعامدا ابىروي-بەدەلگە يە بولۋدى ەمەس, ەڭ الدىمەن, حالىققا, ەلگە ادال قىزمەت ەتۋدى ماقسات تۇتۋعا ءتيىس. «ادال ازامات» دەگەنىمىز – وسى», دەپ ناقتىلادى قاسىم-جومارت كەمەل ۇلى.
وسى تۇستا پرەزيدەنت سوڭعى كەزدەرى بىرقاتار كادرلىق وزگەرىس جاساعانىن تىلگە تيەك ەتتى. مەملەكەت باسشىسىنىڭ ايتۋىنشا, ەڭ الدىمەن بارلىق شەندىلەردىڭ ىسكەرلىك قابىلەتى مەن تاجىريبەسى ەسكەرىلىپ, ەشقانداي ناۋقانشىلدىققا جول بەرىلگەن جوق.
«بۇل رەتتە, ەشقانداي ناۋقانشىلدىققا, مەملەكەتتىك قىزمەتشىلەردى, جوعارى لاۋازىمدى تۇلعالاردى جاپپاي قىزمەتتەن بوساتۋعا جول بەرىلگەن جوق. ەڭ الدىمەن, ولاردىڭ ىسكەرلىك قابىلەتى مەن تاجىريبەسى ەسكەرىلدى. سونداي-اق جاس, بىلىكتى ازاماتتار بىرقاتار ماڭىزدى مينيسترلىكتىڭ تىزگىنىن ۇستادى. ارينە, ولاردىڭ تاجىريبەسى, سونىڭ ىشىندە ومىرلىك تاجىريبەسى از ەكەنى ءسوزسىز. بىراق بۇل – ۋاقىتقا بايلانىستى ماسەلە. باستىسى, ولاردىڭ بويىندا ەلىمىزدىڭ جارقىن بولاشاعى ءۇشىن ادال قىزمەت ەتۋگە قاجەتتى ءبىلىم, ەرىك-جىگەر بار», دەپ قوستى ەل پرەزيدەنتى.
بۇل رەتتە مەملەكەت باسشىسى مەملەكەتتىك قىزمەتشىلەردىڭ بويىندا قانداي قاسيەتتەر بولۋ كەرەكتىگىن دە ايتتى.
«باسشىلىق قۇرامدى جاڭارتۋ جۇمىسى جالعاسىن تابادى. مەملەكەت باسشىسى رەتىندە ايتارىم, مينيسترلەردىڭ, اكىمدەردىڭ جانە باسقا دا مەملەكەتتىك قىزمەتشىلەردىڭ بويىندا نەگىزگى ەكى قاسيەت بولۋى كەرەك. بۇل – پروفەسسيوناليزم, ياعني ناعىز مامان بولۋ جانە وتانشىلدىق. ال, ولاردىڭ پرەزيدەنتتىڭ جەكە باسىنا ادالدىعى مەن ءۇشىن ماڭىزدى ەمەس. مەملەكەت باسشىسىن ماداقتاۋدان گورى جۇمىستى ادال اتقارىپ, حالىقتىڭ الدىندا ابىرويلى بولۋ الدەقايدا ماڭىزدى. بارلىق مەملەكەتتىك قىزمەتشىلەرگە وسىنى ايتقىم كەلەدى. سونداي-اق جاسالعان رەفورمالاردان كەيىن قازاقستان پرەزيدەنتى مەملەكەتتىك باسقارۋشى, ياعني كونستيتۋتسيادا كورسەتىلگەن 7 جىلدىق مەرزىمگە حالىقپەن ءوزارا كەلىسىمشارتقا وتىراتىن مەنەدجەر رەتىندە قىزمەت ەتەدى. پرەزيدەنت – اۋليە ەمەس, حالىقتان بيىك تۇلعا ەمەس», دەپ تۇيىندەدى قاسىم-جومارت توقاەۆ.
