«تازالىق پەن ۇقىپتىلىق كۇندەلىكتى ءومىر سالتىمىزعا اينالۋى قاجەت. قالالار مەن اۋىلداردىڭ ساۋلەتتى, ساياباقتار مەن اۋلانىڭ تازا بولۋى, ەڭ الدىمەن, باسقا بىرەۋگە ەمەس, وزىمىزگە كەرەك. جۇرتتىڭ ءبارى ءوز ءۇيىنىڭ جايلى ءارى ادەمى بولعانىن قالايدى. بۇل – دۇرىس. ازاماتتارىمىز قوعامدىق ورىندار مەن قورشاعان ورتاعا دا ءدال سونداي جاناشىر كوزبەن قاراۋعا ءتيىس», دەدى مەملەكەت باسشىسى.
جاقىندا ەلىمىزدىڭ ءىرى قالالارىندا سۋ تاپشىلىعى بايقالعانى بەلگىلى. وسى تۇستا قاسىم-جومارت كەمەل ۇلى بۇل تۇيتكىل – اكىمدەردىڭ جۇمىسىنداعى ناعىز ولقىلىق ەكەنىن قاداپ ايتتى.
«قازاقستان – بارىمىزگە ورتاق, ونىڭ قانداي بولاتىنى تەك بىزگە بايلانىستى. ياعني, ءبىز ءىشى دە, سىرتى دا ءبۇتىن ەل بولۋىمىز كەرەك. جاقىندا ءىرى قالالارىمىزدا سۋ تاپشىلىعى پايدا بولدى, تۇرعىندار نارازىلىعىن ءبىلدىرىپ جاتىر. بۇل دا – ورىندى. وسى تۇيتكىل – اكىمدەردىڭ جۇمىسىنداعى ناعىز ولقىلىق. ونى تەز ارادا تۇزەتۋ كەرەك. اكىمدەردىڭ قولىنان كەلمەسە, ءتيىستى شەشىمدەردى قابىلدايمىن. نەگىزگى ماقسات – تابىستى بولىپ كورىنۋ ەمەس, شىن مانىندە تابىستى مەملەكەت بولۋ. بۇل مىزعىماس قاعيدا بولۋعا ءتيىس», دەدى مەملەكەت باسشىسى.
پرەزيدەنتتىڭ ايتۋىنشا, جاڭا قوعامدىق ەتيكانى قالىپتاستىرعان مەملەكەتتە زاڭ مەن ءتارتىپ, سەنىم جانە جاۋاپكەرشىلىك سياقتى قۇندىلىقتار ۇستەم بولادى.
«ەلىمىزدە جاڭا قوعامدىق ەتيكا قالىپتاسۋى كەرەك. وندا ەلدىڭ بىرلىگى جانە تۇراقتىلىعى, ازاماتتاردىڭ ءوزارا تىلەكتەستىگى, ادىلدىك, زاڭ مەن ءتارتىپ, سەنىم جانە جاۋاپكەرشىلىك سياقتى قۇندىلىقتار ۇستەمدىك قۇرۋى قاجەت. وتانشىلدىق, ادامگەرشىلىك, بىلىمپازدىق, ناعىز مامان بولۋ, ۇنەمشىلدىك, ەڭبەكقورلىق, ەل مەن جەرگە جاناشىرلىق سياقتى اسىل قاسيەتتەر بارىنەن بيىك تۇرۋعا ءتيىس. وسىنداي ىزگى قاسيەتتىڭ ءبارىن بويىنا سىڭىرگەن جاندى – ادال ازامات دەگەن ءبىر اۋىز سوزبەن سيپاتتاۋعا بولادى», دەپ تۇيىندەدى مەملەكەت باسشىسى.
