مەرزىمدى اسكەري قىزمەتىن وتكەرگەن ساربازداردىڭ جەڭىلدىكپەن ءبىلىم الۋ شارتتارىن قورعانىس مينيسترلىگى 2022 جىلى ازىرلەدى. بيىل مامىر ايىندا اسكەري كەڭەستە مەملەكەت باسشىسى بۇل باستامانى ماقۇلداپ, ءتيىمدى ىسكە اسىرۋ ءۇشىن ءتيىستى تاپسىرمالار بەردى. ەربول قۇماربەك ۇلىنىڭ ايتۋىنشا, ەلىمىزدىڭ 70-تەن استام جوعارى وقۋ ورنىمەن شارتتار جاسالعان. ال قورعانىس ءمينيسترىنىڭ كەڭەسشىسى ايگۇل تولەمباەۆا ىرىكتەۋگە ىڭعايلى بولۋ ءۇشىن «سروچنيكي 2.0» تسيفرلىق پلاتفورماسى ەنگىزىلگەنىن ايتتى. بۇل پلاتفورماعا قارۋلى كۇشتەردىڭ, ۇلتتىق ۇلاننىڭ, تجم, مەملەكەتتىك كۇزەت قىزمەتىنىڭ 110-نان استام اسكەري ءبولىمى تىركەلگەن.
«بۇل جۇيەدە اسكەري قىزمەتىن وتەگەندەر جانە ولاردى اۋىستىرۋ قىزمەتىنىڭ بارلىق كەزەڭىندەگى باعالاۋ كورسەتىلەدى. جاۋىنگەرلىك دايارلىقتىڭ بارلىق ءپانى بويىنشا اسكەري قىزمەتشىنىڭ اعىمداعى باعالارىنىڭ رەيتينگى اي سايىن شىعارىلادى. ەسەپكە الۋ اسكەردەگى جاۋىنگەرلىك دايىندىق جۋرنالدارىندا جانە وسى ەلەكتروندىق پلاتفورمادا ءبىر مەزگىلدە جۇرگىزىلەدى. ەلەكتروندىق جۇيەدە ءار ساربازعا جەكە رەيتينگ جاسالادى», دەدى ءمينيستردىڭ كەڭەسشىسى ايگۇل تولەمباەۆا.
كانديداتتاردى ىرىكتەۋ مىناداي كريتەريلەر بويىنشا جۇرگىزىلەدى: جاۋىنگەرلىك دايىندىق; جەكە ءتارتىپ; ارناۋلى مىندەتتەردى ورىنداۋدىڭ تولىقتىعى جانە پسيحولوگيالىق جاعدايدى باعالاۋ. ءار سارباز ءۇش جوو-نىن تاڭدايدى. «سروچنيك 2.0» ەلەكتروندىق جۇيەسىندە ساربازداردى جوو-دارى بويىنشا ءبولۋ اۆتوماتتى تۇردە جۇرگىزىلەدى.
«كونكۋرستىق ىرىكتەۋگە 2022 جىلى كوكتەمدە اسكەرگە شاقىرىلعان مەرزىمدى اسكەري قىزمەتتىڭ 12 548 اسكەري قىزمەتشىسى قاتىسىپ جاتىر. قازىر 1500 ورىن بولىنەدى. 2022 جىلى كۇزدە اسكەرگە شاقىرىلعان ساربازدار ءۇشىن 1500 ورىن بولىنەتىن تاعى ءبىر كەزەڭ وتەدى», دەدى ءوز سوزىندە ا.تولەمباەۆا.
