بۇگىنگى تاڭدا قازاقستاننىڭ بەس گرەك-ريم كۇرەسى شەبەرى توپ-10 بالۋاننىڭ قاتارىنا قوسىلىپ وتىر. سولاردىڭ اراسىنداعى ەڭ ۇزدىك ناتيجە 26 جاستاعى امانعالي بەكبولاتوۆقا تيەسىلى. اسا جەڭىل سالماق دارەجەسىندە باق سىناپ جۇرگەن قانداسىمىز بىلتىرعى ازيا چەمپيوناتىندا كۇمىس السا, بيىل قولاعا قول سوزدى. الدىڭعى جىلى يسلام ىنتىماقتاستىعى ويىندارىندا ۇزدىك ۇشتىكتى تۇيىندەدى. 2022 جىلى بەلگرادتا وتكەن دۇنيەجۇزىلىك دودادا بەكبولاتوۆتىڭ جۇلدە الۋىنا جاقسى مۇمكىندىگى بولدى. جارتىلاي فينالعا دەيىن قارسىلاس شىداتپاعان ول, ودان كەيىن گرۋزيالىق نۋگزاري تسۋرتسۋميا مەن وزبەكستاندىق جاسۋربەك ورتيكبوەۆتان جەڭىلىپ, بەسىنشى ورىندى قاناعات تۇتتى.
72 كگ سالماقتاعى يبراگيم ماگومادوۆ التىنشى ورىندى يەلەندى. كوپتەن بەرى كوزگە تۇسپەي جۇرگەن 32 جاستاعى ارداگەر ۇستىمىزدەگى جىلدىڭ ءساۋىر ايىندا استانادا وتكەن ازيا چەمپيوناتىندا بارلىق قارسىلاسىن سىپىرا ۇتىپ, گرەك-ريم كۇرەسى شەبەرلەرى اراسىنان قازاقستان ۇلتتىق قۇراماسىنىڭ قورجىنىنا جالعىز التىندى سالعان ەدى. سول جارىستا وزگە وتانداستارىمىز جەڭىس تۇعىرىنىڭ ەڭ بيىك ساتىسىنا كوتەرىلە المادى. ولاردىڭ كەيبىرى كۇمىس پەن قولانى قاناعات تۇتسا, كەيبىرى قالىڭ توپتىڭ اراسىندا قالىپ قويدى.
87 كگ سالماق دارەجەسىندە كۇش سىناساتىن نۇرسۇلتان تۇرسىنوۆ 7-ورىندى ەنشىلەگەن. ول دا تاجىريبەسى ابدەن تولىسقان بالۋان. سەمەي ءوڭىرى تۋماسىنىڭ قورجىنىندا ازيا چەمپيوناتىنىڭ تولىق مەدال جيىنتىعى بار. سونىمەن قاتار تۇرسىنوۆ توكيو وليمپياداسىنا دا قاتىستى.
ايدوس سۇلتانعالي مەن دياس قالەن 8-ساتىعا تابان تىرەدى. 60 كگ سالماقتاعى سۇلتانعاليدىڭ جاسى 27-دە. سىر بويىنىڭ ساڭلاعى 2018 جانە 2022 جىلدارداعى الەم چەمپيوناتىندا قولا مەدال يەلەنسە, 2021 جىلى ازيا چەمپيونى اتاندى. 25 جاستاعى قالەن سوڭعى ەكى قۇرلىق بىرىنشىلىگىندە اقتىق سىنعا دەيىن القىنباي جەتىپ, شەشۋشى تۇستا جەڭىلىستىڭ كەرمەك ءدامىن تاتتى. ۇلانباتىردا ول يراندىق راسۋل گارمسيريدەن ۇتىلسا, استانادا قىرعىزستاندىق اقىلبەك تالانتبەكوۆتەن ايلاسىن اسىرا المادى. دەسەك تە جانكۇيەرلەر بۇل سپورتشىلارعا ۇلكەن سەنىم ارتىپ وتىر. ولار ايدوس پەن دياس الداعى ۋاقىتتا بۇدان دا ءىرى جارىستاردا دارالانادى دەپ ۇمىتتەنەدى.
ەلىمىزدىڭ وزگە بالۋاندارى مىناداي ساتىلارعا جايعاستى: مارلەن مۇقاشەۆ (55 كگ) – 13, مۇحامەدالى مامىربەك (63 كگ) – 16, تەمىرلان شادۋكاەۆ (77 كگ) پەن ولجاس سىرلىباي (97 كگ) – 17, ەرنار فيداحمەتوۆ (60 كگ) پەن ءالىمحان سىزدىقوۆ (130 كگ) – 18, داستان زارلىقانوۆ (63 كگ) پەن دەمەۋ جادىراەۆ (77 كگ) 19 جانە نۇرسۇلتان بازارباەۆ (60 كگ) 20 ورىن.
«كلاسسيكتەردىڭ» تارتىسىندا تۇركيا تارلانبوزدارىنىڭ تۇعىرى بيىك. انادولى ەلىنىڭ ءتورت بىردەي ءاپايتوسى الەمدىك رەيتينگتە كوش باستاپ تۇر. گرۋزيانىڭ ەكى بالۋانىنا سونداي باق بۇيىرسا, ازەربايجان, قىرعىزستان, ماجارستان جانە بولگاريانىڭ ءبىر وكىلى سول مەجەدەن كورىندى. ال توپ-10-دىقتا يران پەحلەۆاندارىنىڭ قاراسى مول. ۇزدىكتەر تىزىمىنەن پارسى ەلىنىڭ 10 وكىلىن كەزىكتىردىك. ماجارستاننىڭ – 8, ازەربايجان مەن تۇركيانىڭ – 7, گرۋزيا, وزبەكستان, قىتاي جانە سەربيانىڭ 6 بالۋانى مىقتىلار ساناتىندا. وسى دەرەكتەردىڭ وزىنەن-اق اتالعان مەملەكەتتەردە گرەك-ريم كۇرەسى ءوز دەڭگەيىندە دامىپ كەلە جاتقانىن اڭعارۋعا بولادى. سونداي-اق بۇل تىزىمدە قازاقستان مەن قىرعىزستاننىڭ – 5, ارمەنيانىڭ – 4 جانە بولگاريا مەن رۋمىنيانىڭ 3 وعلانى بار.
گرەك-ريم كۇرەسىنەن الەمدىك رەيتينگتەگى ۇزدىك ءۇش بالۋان
55 كيلو: 1. ەلدەنيز ءازيزلي (ازەربايجان), 2. نۋگزاري تسۋرتسۋميا (گرۋزيا), 3. امانعالي بەكبولاتوۆ (قازاقستان).
60 كيلو: 1. جولامان شارشەنبەكوۆ (قىرعىزستان), 2. ەدموند نازاريان (بولگاريا), 3. ليگۋو ساو (قىتاي).
63 كيلو: 1. لەري ابۋلادزە (گرۋزيا), 2. تەلاح ماممادوۆ (ازەربايجان), 3. سەباستيان ناد (سەربيا).
67 كيلو: 1. دجوني حەتسۋرياني (گرۋزيا), 2. حۋسيۋەتۋ (قىتاي), 3. حارسات جافاروۆ (ازەربايجان).
72 كيلو: 1. سەلچۋك كان (تۇركيا), 2. فەيزوللا ارسالان (سەربيا), 3. ۋلۆي گانيزادە (ازەربايجان).
77 كيلو: 1. زولتان لەۆاي (ماجارستان), 2. ەمرە باشار (تۇركيا), 3. اقجول ماحمۇدوۆ (قىرعىزستان).
82 كيلو: 1. بۋرحان اكبۋداك (تۇركيا), 2. گەلا بولكۆادزە (گرۋزيا), 3. ياروسلاۆ فۋلچاكوۆ (ۋكراينا).
87 كيلو: 1. الي جەنگيز (تۇركيا), 2. ءالي بيسۇلتانوۆ (دانيا), 3. حاسەم ناسەر اليزادە (يران).
97 كيلو: 1. كيريلل ميلوۆ (بولگاريا), 2. ارتۋر الەكسانيان (ارمەنيا), 3. مۋحاممادحادجي ساراۆي (يران).
130 كيلو: 1. ريزا كاياالپ (تۇركيا), 2. ءامين مىرزازادە (يران), 3. الين الەكسۋس (رۋمىنيا).
