عىلىم جانە جوعارى ءبىلىم مينيسترلىگى جوعارى وقۋ ورىندارىنا قابىلداۋ ەرەجەلەرىنە سايكەس IELTS جانە TOEFL حالىقارالىق سەرتيفيكاتتارى بار تالاپكەرلەر ءوز ناتيجەلەرىن «اعىلشىن ءتىلى» ءپانى بويىنشا ۇبت بالدارىنا اۋىستىرا الاتىنىن ايتتى.
«بۇعان دەيىن تالاپكەرلەرگە IELTS بالدارى 6.0-دەن جوعارى بولسا عانا, «اعىلشىن تىلىنەن» 45 بالل بەرىلەتىن. الايدا كوپتەگەن تالاپكەردە, اعىلشىن ءتىلىن جاقسى دەڭگەيدە مەڭگەرگەندىگىن راستايتىن بەلگىلەنگەن بالدان تومەن IELTS سەرتيفيكاتتارى بولدى. سوندىقتان تۇلەكتەر مەن ساراپشى مامانداردىڭ پىكىرىن ەسكەرە وتىرىپ, بيىل ۇبت-دا ناتيجەسى 5.5 IELTS سەرتيفيكاتتارىن – 41, ال 5.0 بالىن 37 بالعا اۋىستىرۋ تۋرالى شەشىم قابىلداندى. TOEFL سەرتيفيكاتتارىنىڭ ناتيجەلەرىن اۋىستىرۋ بويىنشا دا ءدال وسىنداي وزگەرىستەر ەنگىزىلدى. بۇل جاڭالىق «اعىلشىن ءتىلىن» ءوزىنىڭ بەيىندىك ءپانى رەتىندە تاڭداعان تەست تاپسىرۋشىلاردىڭ جالپى ناتيجەلەرىنە وڭ اسەرىن تيگىزەدى دەپ ويلايمىن», دەدى عىلىم جانە جوعارى ءبىلىم ۆيتسە-ءمينيسترى قۋانىش ەرعاليەۆ.
