ايتالىق, «قازاقتىڭ كوركەم ادەبيەتىن وقۋ ارقىلى مىنەزىمدى تۇزەدىم» دەيتىن زامانداستار بارشىلىق. ولاردىڭ كوبىسى ادەبي شىعارمالارداعى باستى ءارى جاعىمدى كەيىپكەرلەردى ۇلگى ەتەدى. قالامگەر سۋرەتتەگەن كەيىپكەردىڭ بويىنداعى جاقسى قاسيەتتى كورگىسى كەلەدى, سونداي-اق قيىنشىلىققا مويىماۋدى, سابىرلى, شىدامدى بولۋدى ۇيرەنەدى.
قازىرگى تاڭدا باتىستىڭ كىتاپتارىنا سۇرانىس كوپ, الايدا الىستان دوربالاماي-اق وزىمىزدە جاتقان ساندىق-ساندىق باي مۇرالارىمىزدىڭ كوزىن اشىپ, جاڭعىرتىپ, ناسيحاتتاپ, لايىقتى دەڭگەيدە تۇتىنساق, ناعىز قازاقى تۇنىق تاربيەدەن ءنار العان بولار ەدىك.
جاقسى شىعارما عانا وقىرماننىڭ جۇرەگىنە ىزگى قاسيەتتىڭ ءدانىن سەۋىپ, ادام جانىن تاربيەلەي الادى.
بۇگىندە جاستاردىڭ دەنى «قوش بول, قيىندىق!», «مەن جانە اقشا», «بايۋ عىلىمى», «ومىرگە شەكسىز عاشىق» «باي اكە, كەدەي اكە», «ەڭ باقىتتى ايەل», «كۇنكورىستەن كەت, بايلىققا جەت» دەگەن سىندى كىتاپتاردى وقيتىنىنا قاراپ, كوركەم ادەبي تۋىندىلار موتيۆاتسيالىق, پسيحولوگيالىق, قارجىلىق ساۋات اشۋ, تاعى باسقا دا باعىتتاردا جازىلعان كىتاپتاردان كەيىنگى ورىندا تۇرعانىن تۇسىنەسىڭ. جاستاردىڭ اتالعان باعىتتاعى كىتاپتارعا اۋەس بولۋىنىڭ سەبەبى كوپ. ءبىرى الگى كىتاپتار دەپرەسسيادان شىعارادى دەسە, تاعى ءبىرى قارجىلىق قيىندىقتاردان, باسقا دا ساتسىزدىكتەردەن قۇتقارادى دەپ ەسەپتەيدى. ەكىنشى بىرەۋلەر ينستاگرامدا «اتتانداعان» بلوگەرلەردەي ءومىر ءسۇرۋدى, سولار سەكىلدى قىدىرۋ, كيىنۋ, تاماق ءىشۋدى ومىرلىك مۇرات ساناپ, وسى ورايداعى اقىل-كەڭەستەر جازىلعان الگىندەي كىتاپسىماقتارعا قۇمار كەلەدى.
ءيا, بايلىققا جەتۋدىڭ, دەپرەسسيادان شىعۋ جولىن ىزدەستىرۋدىڭ, جايلى ومىرگە ۇمتىلۋدىڭ ەش ايىبى جوق شىعار, بىراق بۇل رۋحاني كەمەلدىككە باستايتىن جول, امال ەمەس.
وسى ورايدا ءومىردىڭ ءمانىن بايلىق پەن توقتىقتان ىزدەيتىن جاستار رۋحاني جۇتاڭدىققا دۋشار بولماسا ەكەن دەيسىڭ. ويتكەنى جاستار «ەر جىگىت ەلى ءۇشىن تۋادى, ەلى ءۇشىن ولەدى» دەپ, «ۇلتىمنىڭ ءبىر قاجەتىنە جاراسام» دەپ, جالىنداپ تۇرسا كەرەك-ءتى.
شىنىندا, بۇگىندە كوپ جاستىڭ بولماشىعا كۇيزەلىپ, سىنىپ قالاتىنى, پسيحولوگيالىق تۇرعىدا ءالسىز بولۋى ءومىردىڭ ءمانى رۋحاني بايلىقتا جاتقانىن ۇقپاي, وعان قاراي ۇمتىلماۋىندا جاتىر. ال رۋحاني بايلىق, تولىمدى تاربيە, مىقتى ازامات بولىپ قالىپتاسۋ ءدارىسىنىڭ قاينارى قازاقتىڭ كوركەم ادەبيەتىندە بۇرقىلداپ قايناپ جاتىر ەمەس پە. سوندىقتان قازاق ادەبيەتىنىڭ قۇدىرەت-كۇشىنە, الەۋەتىنە يەك ارتىپ ءوسۋ, جەتىلۋ بارشا جاستارعا مىندەت بولۋى كەرەك. سوندا عانا جاستارىمىز قالتاسى قالىڭ بولعانىمەن, كەۋدەسى قۋىس بىرەۋ ەمەس, ەلى ءسۇيىپ, جۇرت ارداقتايتىن ابزال ادام بولىپ قالىپتاسادى.
تۇمار قايراتقىزى,
ل.ن.گۋميلەۆ اتىنداعى
ەۇۋ ستۋدەنتى
