قۇرىلىسى ءجۇرىپ جاتقانىنا ون بەس جىلداي بولعان جىلۋ-ەلەكتر ورتالىعىنىڭ پايدالانۋعا بەرۋ مەرزىمى بىرنەشە رەت كەيىنگە شەگەرىلگەن. دەگەنمەن جوبا مەردىگەرى «تسەنتركازەنەرگومونتاج» اق-نىڭ اقپاراتى بويىنشا, العاشقى ەكى قازاندىق بيىل قازان ايىندا ىسكە قوسىلىپ, ال جەو-نىڭ ءوزى جىل سوڭىنا دەيىن پايدالانۋعا بەرىلمەك. بۇگىندە نىساندا 17 قوسالقى مەردىگەرلىك ۇيىمنان 600-دەن استام ادام ەكى اۋىسىممەن جۇمىس ىستەپ جاتىر. تەحنيكالىق اۋديت دەرەكتەرىنە سايكەس, نىسانداعى جۇمىستىڭ 83%-ى بىتكەن. اتاپ ايتقاندا, سۋ جىلىتۋ قازاندىقتارىن, قىزدىرعىشتار مەن جەلىلىك سۋ قۇبىرلارىن مونتاجداۋ جۇمىسى اياقتالدى. سونداي-اق يندۋستريالدى پاركتەن «جەو-3»-كە دەيىن تەحنيكالىق سۋ قۇبىرى سالىنعان. بىراق جىلۋ-ەلەكتر ستانساسىن ىسكە قوسۋ ءۇشىن ءالى دە اتقاراتىن شارۋا شاشەتەكتەن. گاز تاراتۋ جەلىلەرىن جۇرگىزۋ, سۋ جىلىتۋ قازاندىعىنىڭ جەلدەتۋ جانە اۋانى باپتاۋ جۇيەسىن جولعا قويۋ, سىرتقى جانە ىشكى ينجەنەرلىك جەلىلەر جۇمىسى كۇتىپ تۇر. بۇگىندە قۇبىرلاردى وقشاۋلاۋ, سونداي-اق نىساندى باسقارۋ جابدىقتارىن ورناتۋ جانە سۋدى سىعىمداۋ جۇمىسى جالعاسىپ جاتىر.
ينسپەكتسيا بارىسىندا پارتيا وكىلدەرى ەلوردادا جەو قۇرىلىسى بەلگىلەنگەن مەرزىمدە اتالماسا, قىستا جىلۋ تاپشىلىعى تۋىنداۋى مۇمكىن ەكەنىن اتاپ ءوتتى. تاعى ءبىر ماسەلە, سوڭعى 15 جىل ىشىندە بۇرىن ساتىپ الىنعان جابدىقتىڭ ءبىر بولىگى ەسكىرىپ, قولدانۋعا جارامسىز بولىپ قالعان.
«مەردىگەرلەر نىساننىڭ 83%-ى دايىن ەكەنىن ايتادى. بارلىق قازاندىق ءازىر, قۇبىرلار قالانىڭ نەگىزگى ماگيسترالىنە قوسىلعان دەپ وتىر. الايدا ءبىز جۇمىستاردىڭ 83%-ى اتقارىلماعانىن كورىپ وتىرمىز, ويتكەنى ءالى دە جاسالىنۋعا ءتيىس ءىس كوپ. سوندىقتان ءبىز اي سايىن باقىلاۋ جۇرگىزىپ, جۇمىستىڭ قالاي ءجۇرىپ جاتقانىن تەكسەرەمىز. بۇل ماسەلەنى اكىمدىك جانە مينيسترلىكتەردىڭ وكىلدەرىمەن تالقىلاپ, جان-جاقتى باقىلاۋ جاسايمىز. ەگەر نىسان ۋاقىتىندا سالىنىپ بىتپەسە, ەلوردادا جىلۋ ەنەرگياسى تاپشىلىعى تۋىنداۋى مۇمكىن», دەدى ەرلان سايروۆ.
