مەملەكەت باسشىسى قاسىم-جومارت توقاەۆتىڭ كوڭىل ايتۋ جەدەلحاتىن قر پرەزيدەنتىنىڭ ءباسپاسوز حاتشىسى رۋسلان جەلدىباي Facebook-تەگى پاراقشاسىندا جاريالادى.
«اۋلەتتەرىڭىزدىڭ ارداقتىسى, ەلگە تانىمال, حالىق سىيلاعان ابىرويلى اقساقال قۇدايبەرگەن ايتباي ۇلىنىڭ دۇنيەدەن وتۋىنە بايلانىستى كوڭىل ايتامىن. قۇدايبەرگەن ايتباي ۇلى اۋىل شارۋاشىلىعى سالاسىندا كوپ جىل قاجىرلى قىزمەت ەتىپ, ەڭبەك ارداگەرى اتاندى. ادامگەرشىلىك اسىل قاسيەتتەرىمەن ءوز ورتاسىنا سىيلى, اعايىن-تۋىسقا قادىرلى جان بولدى. ۇلاعاتتى ۇرپاق ءوسىرىپ, دارىندى ۇل-قىزداردى تاربيەلەي ءبىلدى. اينالا توڭىرەگىنە مەيىرىم شۋاعىن شاشا بىلگەن قۇدايبەرگەن ايتباي ۇلىنىڭ جارقىن بەينەسى ونى بىلەتىندەردىڭ جادىندا ساقتالادى. مارقۇمنىڭ يمانى سالامات, جانى ءجانناتتا بولسىن», دەپ جازىلعان جەدەلحاتتا.
ەسكە سالا كەتسەك, بۇگىن الەمگە تانىمال ءانشى ديماش قۇدايبەرگەننىڭ اتاسى قۇدايبەرگەن ايتباەۆ 82 جاسىندا دۇنيەدەن وزدى. مەملەكەتتىك جانە قوعامدىق قىزمەتتەردە ەڭبەك ەتكەن قۇدايبەرگەن ايتباەۆ 2019 جىلى «ەرەن ەڭبەگى ءۇشىن» مەدالىمەن ماراپاتتالعان ەدى.
