قىرشىننان قيىلعان عۇمىر تۋرالى «Egemen Qazaqstan» گازەتىنىڭ ءتىلشىسى عالىم سۇلەيمەن «مۇز ايدىنىنىڭ مۇزبالاعى» ماقالاسىندا جازعان.
دەنيس 1993 جىلدىڭ 13 ماۋسىمىندا الماتى قالاسىندا دۇنيەگە كەلدى. بالا كەزىنەن ول تاەكۆاندو, تەننيس, اكروباتيكا, كاراتە, ءجۇزۋ سەكىلدى سپورتتىڭ سان الۋان تۇرىمەن اينالىستى. سونىمەن قاتار فورتەپيانو, بي جانە كەسكىندەمە مەكتەبىندە ءتالىم الىپ, بالالار حورىندا ءان ايتتى. التى جاسىنان مانەرلەپ سىرعاناۋعا بار نازارىن اۋداردى. شەبەرلىگىن شىڭداۋ ماقساتىندا ول اناسىمەن بىرگە ماسكەۋگە قونىس اۋداردى. كەيىننەن اقش-قا اتتاندى. ءار جىلدارى اسقان دارىن يەسى نيكولاي موروزوۆ, فرەنك كەرولل, رافاەل ارۋتيۋنيان, ەلەنا بۋيانوۆا, تاتيانا تاراسوۆا سىندى مايتالمانداردىڭ قول استىندا جاتتىقتى.
دەنيc تەن 2005 جىلى العاش رەت قازاقستان چەمپيوناتىندا توپ جارسا, سودان كەيىن تاعى ءتورت رەت جەڭىس تۇعىرىنىڭ ەڭ بيىك ساتىسىنا كوتەرىلدى. 2009 جانە 2012 جىلدارى جاستاردىڭ الەم بىرىنشىلىگىندە ءتورتىنشى ورىنعا تابان تىرەدى.
ەرەسەكتەر اراسىنداعى جارىستا دەنيستىڭ ەڭ العاشقى ەلەۋلى تابىسى – 2011 جىلى ەلىمىزدە وتكەن قىسقى ازيا ويىندارىنىڭ التىن مەدالى. 2013 جىلى كانادادا وتكەن الەم چەمپيوناتىندا وتانداسىمىز ءمىنسىز ونەر كورسەتىپ, كۇمىس مەدالدى يەلەندى. ول تەك پاتريك چاننان 1,3 ۇپاي عانا قالىپ قويدى. نەگىزىندە بۇل باسەكەدە تەننىڭ مەرەيى ۇستەم بولعان ەدى. ونى بارشا مامان مويىندادى. بىراق ادىلدىكتى بەلدەن باسقان تورەشىلەر جەڭىستى جەرگىلىكتى سپورتشىعا اپەردى.
2014 جىلى سوچيدە الاۋى تۇتانعان وليمپيا ويىندارىندا تەننىڭ اسقان شەبەرلىگىنە ءدۇيىم جۇرت تاڭداي قاقتى. شىنى كەرەك, ول كەزدە جەرلەسىمىز جەڭىس تۇعىرىنا كوتەرىلەدى دەپ ەشكىم كۇتپەگەن ەدى. سەبەبى قىسقا باعدارلامادا 84,06 ۇپاي جيناعان دەنيس توعىزىنشى ورىندى قاناعات تۇتتى. ونىڭ ۇستىنە, ءبىر رەت قۇلاپ تۇرعانى بار. ەسەسىنە ەركىن باعدارلامادا ەڭ ءبىر كۇردەلى ەلەمەنتتەردى ءمىنسىز ورىنداعان ول 171,04 ۇپاي ولجالادى. ناتيجەسىندە, جاتتىعۋدىڭ ەكى تۇرىندە 255,10 ۇپايعا يەلىك ەتكەن وتانداسىمىز قولا مەدالدى موينىندا جارقىراتتى. بۇل جارىستىڭ باس جۇلدەسى جاپونيالىق يۋدزۋرۋ حانيۋعا بۇيىرسا, كۇمىس جۇلدەنى كانادالىق پاتريك چان ەنشىلەدى. ناتيجەسىندە, تەن ءوز ەلىنە وليمپيادانىڭ العاشقى مەدالىن سىيلادى.
2015 جىلى شانحايداعى الەم چەمپيوناتىندا يسپانيالىق حاۆەر ەرناندەس پەن جاپونيالىق يۋدزۋرۋ حانيۋدى العا جىبەرگەن دەنيس قولا جۇلدەنى ولجالادى. ودان بولەك, اتاقتى سپورتشى ء«تورت قۇرلىق چەمپيوناتى» مەن دۇنيەجۇزىلىك ۋنيۆەرسيادانىڭ جەڭىمپازى اتانىپ, باسقا دا كوپتەگەن ءدۇبىرلى دودادا دارالاندى. ءومىرىنىڭ سوڭعى كەزەڭىندە ول جاراقاتىنا بايلانىستى بايراقتى باسەكەلەردىڭ ءبىرازىنا قاتىسا المادى.
دەنيستىڭ ەسىمى - ەل ەسىندە. الماتىدا وعان ەسكەرتكىش, ءوزى تۇرعان ۇيگە مەموريال تاقتاسى ورناتىلدى. دەرەكتى فيلم ءتۇسىرىلىپ, استانا مەن الماتى قالالارىندا ساڭلاق سپورتشىنى ەسكە الۋعا ارنالعان حالىقارالىق تۋرنير جىل سايىن ءوتىپ تۇرادى. وعان الەمنىڭ ءار قيىرىنان كەلگەن اتاقتى مانەرلەپ سىرعاناۋشىلار قاتىسادى.
ەستەرىڭىزگە سالا كەتەيىك, دەنيس تەن 2018 جىلى 19 شىلدەدە قاراقشىلاردىڭ قولىنان قاز تاپقان ەدى.
