ۇيىمداستىرۋشى تاراپتىڭ مۇنداعى ماقساتى – قازاق جەرىندەگى دالالىق قالا مادەنيەتىنىڭ ەرەن ۇلگىسى ءھام قازىرگى استانامىزدىڭ «اتاسى» بوزوق قالاشىعىنىڭ زەرتتەلە باستاۋىنىڭ 25 جىلدىق داتاسىنا وراي, ونىڭ تاريحي- مادەني ماڭىزىن ناسيحاتتاۋ جانە حالىقارالىق تۇركسوي ۇيىمىنىڭ قۇرىلعانىنا 30 جىل تولۋ قۇرمەتىنە تارتۋ ەكەن.
بوزوق قالاشىعى حرونولوگيالىق تۇرعىدان: ەجەلگى تۇرىك عيباداتحاناسى, ورتاعاسىرلىق قالاشىق, التىن وردا كەزەڭىنىڭ قورىمى, ستاتسيونارلىق تۇرعىن ۇيلەر, ءوندىرىس ورىندارى, قازاقتاردىڭ قىستاۋى جانە سۋارۋ جۇيەسىنەن تۇرادى. سونىمەن قاتار قالاشىق ماتەريالدارى ءتورت ورتاعاسىرلىق مەملەكەتتىك قۇرىلىمداردىڭ تاريحىن كورسەتەدى: تۇرىك قاعاناتى, قىپشاق حاندىعى, التىن وردا جانە قازاق حاندىعى. ياعني قالاشىق VII-IX عاسىرلاردان XVI-XVII عاسىرلارعا دەيىن ەجەلگى تۇركىلەردىڭ كيەلى ورنى, ودان كەيىن كەرۋەن ساۋداسىن باقىلايتىن قىپشاقتاردىڭ قونىسى بولدى دەگەن بولجام بار. ال XIV عاسىردا قالاشىق نۇرا-ەسىل ايماعىنىڭ يسلامدانعان ەليتاسىنىڭ رۋحاني ورتالىعىنا اينالىپ, ءدىني-مەموريالدىق كەشەن قالىپتاسىپتى. XVIII-XIX عاسىرلاردا مۇندا قازاقتىڭ شارۋاشىلىق نىساندارى (قىستاۋلار) ورنالاسقان كورىنەدى.
الدا اتاپ وتىلۋگە ءتيىس استانا قالاسىنىڭ 25 جىلدىق مەرەيتويى قارساڭىندا ۇيىمداستىرىلىپ وتىرعان بۇل شارانى «اt-travel» ات كلۋبىنىڭ شاباندوزدارى قولعا الىپتى. وسىلاي بوزوقتان باستالعان ساپار ۇلىتاۋ جەرىندە, ناقتىراق ايتقاندا ۇلىق ۇلىستىڭ نەگىزىن قالاۋشى جوشى حاننىڭ كەسەنەسى اۋماعىندا تىزگىن تارتپاق.
ياعني سالت اتتىلار ەلوردا ىرگەسىندەگى ەجەلگى قونىس بوزوقتان اتتانىپ, ۇلى دالا تاريحىنىڭ كىندىگى ۇلىتاۋعا دەيىنگى ساپارىن ءبىر اپتاعا جوسپارلاپ وتىرعان كورىنەدى. اتالعان ەكسپەديتسيانىڭ بەلدى مۇشەسى ءارى جۋرناليست ەرجان جاۋبايمەن حابارلاسقانىمىزدا, «ساپارعا جارامدى ارقالى اتتاردى تاڭداپ ءمىنىپ, سەگىز شاباندوز ەلوردادان جولعا شىقتىق, بىزگە قوسىلۋ ءۇشىن تاعى ءبىر ءتورت سالت اتتى ۇلىتاۋدان اتتاندى. بۇيىرسا, قوس تاراپ العاباس اۋىلىندا ءتۇيىسىپ, ءارى قاراي جوشى كەسەنەسىنە بىرگە جول تارتامىز. جولاي حالقىمىزدىڭ تاريحىنا قاتىسى بار نىساندارعا ات باسىن بۇرىپ, ونى ناسيحاتتاۋ شارالارىن قاراستىرامىز», دەدى.
