ءامىر نەبارى 15 جاستا. سوعان قاراماستان, ءتۇرلى حالىقارالىق دودالاردا وزىنەن ەرەسەك ويىنشىلاردى ۇتىپ, كوپشىلىكتىڭ قوشەمەتىنە بولەنىپ ءجۇر. بۇعان دەيىن تالانتتى ويىنشى «ITF Juniors» ساناتىنداعى تۋرنيرلەردە ءتورت رەت توپ جاردى. ءامىر قاراعاندىدا تۋىپ-وسكەنىمەن, قازىرگى كەزدە چەحيانىڭ ەڭ ۇزدىك تەننيس اكادەميالارىنىڭ بىرىندە شەبەرلىگىن شىڭداپ ءجۇر. قاپ تاۋى بوكتەرىندە قارسىلاس شىداتپاعان ورەن اقتىق سىندا ازەربايجاندىق كانان گاسيموۆتى 6:1, 6:3 ەسەبىمەن ويسىراتا ۇتتى. ءبىر كەرەمەتى, قانداسىمىز تۋرنير بارىسىندا باسەكەلەستەرىنە بىردە-ءبىر سەتتە ۇتىلعان جوق. سونىمەن قاتار جۇپتىق ويىندا دا الدىنا جان سالمادى. اقتىق سىندا بولگاريالىق يۆان نايدەنوۆ ەكەۋى قازاقستاننىڭ وكىلدەرى ءىلياس مارات ۇلى مەن ۆيتالي زاتسەپيننەن باسىم ءتۇستى – 6:3, 6:4.
