«ەكونوميكالىق ءوسىم تۋرالى ايتقاندا, ءبىز تەك تسيفرلار مەن كورسەتكىشتەرگە عانا ەمەس, ساپاعا دا ءمان بەرۋىمىز كەرەك. وسى رەتتە قازاقستاننىڭ باستى مۇراتى – كەلەشەكتىڭ تسيفرلىق ەكونوميكاسىنا كوشۋ. تسيفرلىق ينتەللەكت يندەكسىنە (Digital IQ) سايكەس قازاقستان تسيفرلاندىرۋ قارقىنى بويىنشا 20-ورىندا جانە تسيفرلىق ورتانى دامىتۋ جونىنەن اناعۇرلىم پەرسپەكتيۆتى ەلدەردىڭ قاتارىنا كىرەدى», دەدى پرەزيدەنت.
وسى تۇستا مەملەكەت باسشىسى وتكەن جىلى ەلىمىزدەگى تسيفرلاندىرۋ سالاسى 12 پايىزعا وسكەنىن ەسكە سالىپ, وتاندىق تسيفرلىق ونىمدەردىڭ حالىقارالىق نارىقتاعى باسەكەگە قابىلەتتىلىگى ءالى دە ارتىپ كەلەتىنىن اتاپ ءوتتى.
«بىلتىر IT ونىمدەرى مەن قىزمەتتەر ەكسپورتى 5 ەسە ۇلعايىپ, 333 ميلليون دوللاردى قۇرادى. ماقساتىمىز – 2025 جىلعا قاراي بۇل كورسەتكىشتى 500 ميلليون دوللارعا دەيىن جەتكىزۋ. دەگەنمەن مۇنىمەن توقتاپ قالمايمىز. بۇل باعىتتاعى جۇمىستى جالعاستىرامىز», دەدى قاسىم-جومارت توقاەۆ.
جيىن بارىسىندا ەل پرەزيدەنتى تسيفرلىق ترانسفورماتسياعا كەدەرگى كەلتىرەتىن فاكتوردى اتادى.
«ادامي كاپيتال شەشۋشى ءرول اتقاراتىنى بارىمىزگە دە ءمالىم. بىراق تسيفرلىق ترانسفورماتسياعا كەدەرگى كەلتىرەتىن دە وسى – ادامي فاكتور. تسيفرلىق ۇدەرىستەردى باسقارۋ ءۇشىن تسيفرلىق ساۋاتتىلىققا جانە بىلىمگە باسا ءمان بەرۋىمىز قاجەت ەكەنىن تۇسىنۋگە ءتيىسپىز. تۇپكى ماقسات – تسيفرلىق وسىمگە باعدارلانعان كرەاتيۆتى قوعام قالىپتاستىرۋ. ءبىزدىڭ ادامدار جاڭا يدەيالاردى قابىلداۋعا, جاڭاشا ويلاۋ مەن جاڭا نارسە ويلاپ تابۋعا بەيىمدەلۋى كەرەك», دەپ تۇيىندەدى قاسىم-جومارت كەمەل ۇلى.
ايتا كەتسەك, شەتەلدىك ينۆەستورلار كەڭەسىنىڭ وتىرىسىندا ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسو, پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, «قازاقستاننىڭ شەتەلدىك ينۆەستورلار كەڭەسى» قاۋىمداستىعىنىڭ باسقارما توراعاسى ەرلان دوسىمبەكوۆ, ازيا دامۋ بانكىنىڭ پرەزيدەنتى ماساتسۋگۋ اساكاۆا, CNPC كومپانياسىنىڭ پرەزيدەنتى حوۋ تسزيتسزيۋن, Shell plc كومپانياسىنىڭ باس اتقارۋشى ديرەكتورى ۋاەل ساۋان, Chevron كورپوراتسياسىنىڭ اتقارۋشى ۆيتسە-پرەزيدەنتى نايدجەل حيرن, Philip Morris International كومپانياسىنىڭ تمد جانە ورتالىق ازيا بويىنشا پرەزيدەنتى ماركو ماريوتتي, «لۋكويل» كومپانياسىنىڭ باس اتقارۋشى ديرەكتورى ۆاديم ۆوروبەۆ, Ernst&Young كومپانياسىنىڭ ەۋروپا, تاياۋ شىعىس جانە افريكا ايماقتارى بويىنشا باسقارۋشى سەرىكتەسى دجۋلي لينن تيگلاند, Air Liquide كومپانياسىنىڭ باس اتقارۋشى ديرەكتورى فرانسۋا جاكوۆ, Baker Hughes كومپانياسىنىڭ توراعاسى جانە باس اتقارۋشى ديرەكتورى لورەنتسو سيمونەللي, Microsoft كورپوراتسياسىنىڭ ورتالىق جانە شىعىس ەۋروپا بولىمشەسىنىڭ باس ديرەكتورى ميشەل سيممونس, Wabtec كورپوراتسياسىنىڭ پرەزيدەنتى جانە باس اتقارۋشى ديرەكتورى رافاەل ءسانتانا سوز سويلەدى.
