«جەتكىزۋ تىزبەگىنىڭ بۇزىلۋى, ينفلياتسيانىڭ ءوسۋى جانە ساۋدا-ساتتىقتاعى شەكتەۋلەر جاھاندىق ەكونوميكانىڭ دامۋىنا ايتارلىقتاي كەدەرگى كەلتىرىپ وتىر. وسىعان قاراماستان, قازاقستان سىرتقى جاعدايلارعا ءساتتى بەيىمدەلىپ ۇلگەردى دەپ سەنىمدى تۇردە ايتا الامىز. ءتورت ايدا ەكونوميكانىڭ ناقتى ءوسىمى 5 پايىزدى قۇرادى. بۇل بۇعان دەيىن بولجانعان ورتاشا الەمدىك كورسەتكىشتەن ءۇش ەسە كوپ. ەكونوميكامىزدىڭ بارلىق نەگىزگى سەكتورىندا وڭ ديناميكا بايقالادى», دەدى مەملەكەت باسشىسى.
سونىمەن قاتار پرەزيدەنت بىلتىر شەتەلدەن 28 ميلليارد دوللار كولەمىندە ينۆەستيتسيا تارتقانىن جانە بۇل رەكوردتىق كورسەتكىش ەكەنىن ايتتى. ول سونداي-اق شەتەلدىك ينۆەستورلاردىڭ شيكىزاتتىق ەمەس سەكتورعا ايرىقشا قىزىعۋشىلىق تانىتقانىن ەسكەردى. مەملەكەت باسشىسى حالىقارالىق رەيتينگ اگەنتتىكتەرى دە قازاقستاننىڭ ينۆەستيتسيالىق الەۋەتىن راستاعانىن ايتىپ ءوتتى.
«بۇكىل الەمدە پروتەكتسيونيزمنىڭ بەلەڭ الۋىنا قاراماستان, اشىق نارىقتىق ەكونوميكاسى بار ەل رەتىندە ءوز پوزيتسيامىزدى نىعايتا تۇستىك. سىرتقى ساۋدا اينالىمى 32 پايىزعا ءوسىپ,134 ميلليارد دوللارعا جەتتى», دەدى قاسىم-جومارت توقاەۆ.
