قۇرمەتتى حانىمدار مەن مىرزالار, قادىرلى قوناقتار!
استانا حالىقارالىق فورۋمىنا قوش كەلدىڭىزدەر! مۇندا بارلىق قۇرلىقتان دوستارىمىز بەن ارىپتەستەرىمىز, سونداي-اق ۇكىمەتتەردىڭ, ديپلوماتيا, بيزنەس جانە عىلىمي توپتاردىڭ وكىلدەرى جينالىپ وتىر. اسا قادىرلى قوناقتارىمىز – قاتار امىرىنە, قىرعىزستان پرەزيدەنتىنە, بوسنيا جانە گەرتسەگوۆينا پرەزيديۋمىنىڭ توراعاسىنا, وزبەكستان پرەمەر-مينيسترىنە جانە فورۋمنىڭ باسقا دا قۇرمەتتى قاتىسۋشىلارىنا شىنايى ريزاشىلىعىمدى بىلدىرەمىن. سىزدەردىڭ وسى جيىنعا ارنايى كەلۋگە شەشىم قابىلداپ, فورۋم جۇمىسىنا قاتىسقاندارىڭىز – ءبىز ءۇشىن ۇلكەن مارتەبە. جيىن بارىسىندا جاھاندىق ەكونوميكالىق جانە ايماقتىق ىنتىماقتاستىق ماسەلەلەرىنىڭ قازىرگى جاي-كۇيى جونىندە تابىستى پىكىر الماسامىز دەپ سەنەمىز. بۇل – حالىقارالىق سەرىكتەستىكتىڭ شىنايى ءمان-ماڭىزىن ايقىندايتىن تاسىلدەردىڭ ءبىرى. سونداي-اق فورۋم جۇمىسىن اشا وتىرىپ, ستراتەگيالىق سەرىكتەسىمىز – بىرىككەن ۇلتتار ۇيىمى مەن ونىڭ حۆق, يۋنەسكو, بۇۇدب, دسۇ, ەسكاتو سەكىلدى ۇيىمدارىنا جانە باسقا دا حالىقارالىق ينستيتۋتتارعا, CNN اقپاراتتىق ارىپتەسىمىزگە شىنايى ريزاشىلىعىمدى بىلدىرۋگە رۇقسات ەتىڭىزدەر.
قۇرمەتتى فورۋمعا قاتىسۋشىلار!
استانا حالىقارالىق فورۋمى – بۇل ديالوگ الاڭى. ونىڭ نەگىزگى ميسسياسى مىناداي: ءبىرىنشى, الەمدەگى جاعدايدى اشىق تالقىلاۋ; ەكىنشى, الدىمىزدا تۇرعان نەگىزگى سىن-قاتەرلەر مەن داعدارىستى ايقىنداۋ; ءۇشىنشى, وسى سىن-قاتەرلەرگە ءوزارا ىنتىماقتاستىق رۋحىندا ديالوگ ارقىلى قارسى تۇرۋ; ءتورتىنشى, كوپجاقتى قاتىناستاردىڭ ورتاق مادەنيەتىن جاڭارتۋ جانە قالپىنا كەلتىرۋ; بەسىنشى, بەيبىتشىلىكتى, پروگرەسس پەن ىنتىماقتى جاقتايتىن داۋىستاردى كۇشەيتۋ.
بۇل فورۋم ءوزارا بەلسەندى ىنتىماقتاستىققا تىكەلەي ىقپال ەتەدى. اسىرەسە بۇرىن-سوڭدى بولماعان گەوساياسي شيەلەنىس كەزەڭىندە بىزگە مۇنداي قارىم-قاتىناستار وتە قاجەت. سىن-قاتەرلەرگە توتەپ بەرۋ ماڭىزدى. وسى رەتتە جاھاندىق جۇيە بەيبىتشىلىك پەن وركەندەۋدى تاڭداۋلىلار ءۇشىن ەمەس, كوپشىلىك ءۇشىن قامتاماسىز ەتە وتىرىپ جۇمىس ىستەۋگە ءتيىس.
قۇرمەتتى دوستار!
ءبىز بىرىككەن ۇلتتار ۇيىمى قۇرىلعان ساتتەن نەگىزى قالانعان الەمدىك ءتارتىپتىڭ ىرگەتاسىنىڭ بۇزىلۋ ۇدەرىسىنە كۋا بولدىق. بۇۇ بۇكىل ادامزاتتى بىرىكتىرەتىن بىردەن-ءبىر جاھاندىق امبەباپ ۇيىم بولىپ قالا بەرەدى. وسى رەتتە قاۋىپسىزدىك كەڭەسىنىڭ جان-جاقتى رەفورمالارىنسىز بۇل سىن-قاتەرلەردى شەشۋ ىسىندە تابىسقا قول جەتكىزە المايمىز. كەڭەستەگى «ورتا دەرجاۆالاردىڭ» وكىلدەرىنىڭ پىكىرى مەيلىنشە سالماقتى بولۋعا ءتيىس.
جۋىرداعى COVID-19-دان باستاپ قارۋلى قاقتىعىستارعا دەيىنگى «جاڭا داعدارىستار» ءبىزدىڭ نازىك حالىقارالىق ەكوجۇيەگە قاۋىپ توندىرەدى. بىراق بۇل تۇراقسىزدىقتىڭ سەبەبى تەرەڭدە جاتىر. سونىمەن قاتار ءبىز 30 جىلدان كەيىن بۇرىنعى «بلوكتارعا» بولىنۋشىلىك وي-ساناسىنا قايتا ورالۋ جاعدايىنا كۋا بولىپ وتىرمىز. جىككە بولىنۋشىلىك كۇشى تەك گەوساياسي ماسەلەمەن شەكتەلىپ قالمايدى, ونىڭ ەكونوميكالىق استارى دا بار. ەكونوميكالىق ساياسات قارۋ رەتىندە اشىق قولدانىلۋدا. بۇل قاراما-قايشىلىقتار سانكتسيالار مەن ساۋدا سوعىستارىن, ماقساتتى بورىشكەرلىك ساياساتتى, قارجىلاندىرۋ كوزدەرىنەن شەكتەۋدى نەمەسە جويۋدى, سونداي-اق ينۆەستيتسيانى باقىلاۋدى قامتيدى.
ەركىن ساۋدا, جاھاندىق ينۆەستيتسيا, يننوۆاتسيا جانە ادال باسەكەلەستىك سەكىلدى فاكتورلاردىڭ جيىنتىعى سوڭعى ونجىلدىقتاردا نەگىزى قالانعان الەمدىك بەيبىتشىلىك پەن دامۋدىڭ ىرگەتاسىن بىرتىندەپ قيراتا باستادى.
بۇل, ءوز كەزەگىندە, الەۋمەتتىك تولقۋعا, مەملەكەتتەردىڭ ىشتەي بولىنۋىنە جانە ولاردىڭ ارالارىنىڭ شيەلەنىسۋىنە الىپ كەلەدى. تەڭسىزدىكتىڭ ءورشۋى, الەۋمەتتىك بولىنۋشىلىك, مادەنيەت پەن قۇندىلىقتارداعى الشاقتىقتىڭ ارتۋى سەكىلدى ۇردىستەردىڭ ءبارى ەكزيستەنتسيالىق قاۋىپكە اينالدى.
تەرىس اقپاراتتاردىڭ كەڭ تارالۋىنا بايلانىستى بۇل قاتەردىڭ الدىن الۋ قيىنداپ بارادى. ول بۇگىندە كۇشەيىپ, وتە قاۋىپتى بولا ءتۇستى.
سونىمەن بىرگە جاساندى ينتەللەكتەن باستاپ بيوتەحنولوگياعا دەيىن جاڭا تەحنولوگيالاردىڭ جاھاندىق سالدارى بار. بىراق ولار شەكتەۋلى ۇلتتىق شەڭبەردە عانا ەنگىزىلىپ جاتىر. وسى فاكتورلاردىڭ بارلىعى جاھاندىق الەمدىك ءتارتىپتى ۇلكەن شيەلەنىسكە يتەرمەلەيدى. بۇل ءوزارا سەنىمسىزدىكتى ارتتىرىپ, بەلگىلى حالىقارالىق فورۋمداردىڭ, قولدانىستاعى جۇيەنىڭ, قاۋىپسىزدىك رەجيمىنىڭ جانە يادرولىق قارۋدى تاراتپاۋ سالاسىنداعى مەحانيزمدەردىڭ قىزمەتىنە كەرى اسەر ەتەدى.
وسىلايشا, ءبىز بەلگىسىزدىكپەن, تۇراقسىزدىقتىڭ بەلەڭ الۋىمەن جانە داۋ-جانجالدارمەن بەتپە-بەت كەلەمىز. بۇل, ءوز كەزەگىندە, قورعانىسقا, زاماناۋي قارۋ-جاراققا جۇمسالاتىن شىعىنداردى ارتتىرۋعا ىقپال ەتەدى جانە تۇپتەپ كەلگەندە ەشقانداي كەپىلدىك بەرمەيدى. بۇعان وتكەن جارتى عاسىردا ءبىز العاش رەت يادرولىق قارۋدى قولدانۋ پەرسپەكتيۆاسىمەن بەتپە-بەت كەلۋىمىز مىسال بولادى. مۇنىڭ ءبارى كليماتتىڭ ەكزيستەنتسيالدى وزگەرۋ قاۋپىنە قارسى جۇمىلۋ قاجەت بولعان ساتتە تۋىنداپ وتىر.
حانىمدار مەن مىرزالار!
گەوساياسي قىسىمدار ءبىر-ءبىرىمىزدى الشاقتاتىپ جاتقاندا ءبىز بىرىگۋگە, ىقپالداسۋعا, ىنتىماقتاسۋعا, ءوزارا قول ۇشىن سوزۋعا دەگەن انىق يمپەراتيۆپەن بەتپە-بەت كەلەمىز. بۇل جەردەگى نەگىزگى يدەيا – وسى. وسىنداي ساتتە استانا حالىقارالىق فورۋمى اتالعان ءۇردىستى كەرى بۇرۋ ءۇشىن تاعى ءبىر مۇمكىندىك بەرەدى. تەك كەزدەسۋ, كەڭەسۋ, سونداي-اق ءوزارا ادالدىق تانىتۋ ارقىلى عانا حالىقارالىق قوعامداستىق ءبىزدىڭ پروبلەمالارىمىزعا, شارۋالارىمىز بەن ۇمىتىمىزگە قاتىستى ماسەلەلەردى شەشە الادى. سوندا عانا ءبىز ورتاق بولاشاعىمىزدى قالىپتاستىرا الامىز, ءبارىمىز ءۇشىن مەيلىنشە تۇراقتى, ءادىل ءارى وركەندەگەن الەم قۇرۋ جولىنا بىرتىندەپ ورالامىز.
قۇرمەتتى دوستار!
قازاقستان بۇرىننان شىعىس پەن باتىستىڭ, سولتۇستىك پەن وڭتۇستىكتىڭ اراسىنداعى التىن كوپىر سانالادى. كوپ جاعدايدا بۇل فورۋم ۇلى ەۋرازيا دالاسىنىڭ مادەنيەتىنە, تاريحىنا ساي كەلەدى. ءبىز وسىناۋ مۇرامىزدى ماقتان تۇتامىز. ءدال وسى ۇزدىكسىز تاۋار, مادەني جەتىستىكتەرىمىز بەن يدەيا الماسۋ ارقىلى قازاقستاننىڭ وزىندىك ۇلتتىق بىرەگەيلىگى جانە ونىڭ ەرەكشە كوپجاقتى ىنتىماقتاستىققا نەگىزدەلگەن برەندى قالىپتاستى. گەوساياسي قيىندىقتارعا قاراماستان, قازاقستان ورتالىق ازيادا دا ەكونوميكالىق لوكوموتيۆ قىزمەتىن اتقارىپ وتىر. ءبىز شەتەلدەن كەڭ كولەمدە ينۆەستيتسيا تارتۋدى جالعاستىرامىز جانە قازاقستاندا بيزنەس جۇرگىزۋ ءۇشىن بارىنشا جاعداي جاسايمىز.
سونىمەن قاتار شەتەلدىك سەرىكتەستەرىمىزدە دە وسىنداي جاۋاپكەرشىلىك سەزىم بولادى دەپ ۇمىتتەنەمىز. بۇل – ءبىزدىڭ ساياساتىمىزدىڭ نەگىزگى قاعيداتتارى. ءوز كەزەگىندە بۇل ەلىمىزدىڭ ەكونوميكالىق دامۋىندا ماڭىزدى ءرول اتقاراتىن شاعىن جانە ورتا كاسىپورىندار ءۇشىن تەڭ قۇقىق پەن مۇمكىندىكتى قامتاماسىز ەتەدى.
بىلتىر قازاقستان ەكسپورتى 40 پايىزعا ارتتى. دەگەنمەن ءبىزدىڭ جالپى ىشكى ءونىمنىڭ ەداۋىر بولىگى بۇرىنعىشا ەنەرگەتيكالىق سەكتورعا تيەسىلى. سونداي-اق ەكنوميكانى ارتاراپتاندىرۋعا دەگەن ۇمتىلىسىمىز ارتىپ كەلەدى. اۆتوموبيل قۇراستىرۋ, فارماتسەۆتيكا, مەتالل وڭدەۋ جانە ماشينا جاساۋ سياقتى بىرقاتار سالادا ءوسىم بار ەكەنىن بايقاپ وتىرمىز. ءبىز ىسكەرلىك جانە ەكونوميكالىق سەرىكتەستىك ءۇشىن جاڭا مۇمكىندىكتەر ىزدەگەندەردىڭ ءبارىن شاقىرامىز. مىسالى, قىتايدى ەۋروپالىق وداقپەن بايلانىستىراتىن ورتا ءدالىز نەمەسە ترانسكاسپي حالىقارالىق كولىك باعىتى ساۋدا مەن ينۆەستيتسيا ءۇشىن جاڭا مۇمكىندىكتەرگە جول اشادى. بۇل باعىت تاۋاردى ءۇندى مۇحيتى ارقىلى تاسىمالداۋ مەرزىمىن ەكى ەسە قىسقارتادى.
سونىمەن قاتار ەكونوميكالىق دامۋعا جانە وڭىرىشىلىك بىرىگۋگە ىقپال ەتەتىن ء«بىر بەلدەۋ, ءبىر جول» باستاماسىندا قازاقستان باستى ءرول اتقاراتىنىن اتاپ وتكىم كەلەدى.
ءبىز مەملەكەتتەر مەن ادامدار اراسىنداعى فيزيكالىق بايلانىستى نىعايتۋعا, سونداي-اق سەرىكتەس ءارى دوس رەتىندە قوعامداستىقتار اراسىنداعى بايلانىستى كۇشەيتۋگە تىرىسامىز. وسى فاكتورلاردىڭ بارلىعىن ەسكەرە وتىرىپ, بۇگىندە قازاقستان جاھاندىق, ەڭ باستىسى, شىن مانىندە, سەنىمدى ساۋدا-ەكونوميكالىق سەرىكتەس ەكەنىن ايتا الامىز.
حانىمدار مەن مىرزالار!
ءبىزدىڭ ەلىمىز بەيبىتشىلىك پەن حالىقارالىق قاۋىپسىزدىكتى نىعايتۋ ءۇشىن ارقاشان بار كۇش-جىگەرىن جۇمسادى. ءوز تاراپىمىزدان يادرولىق قارۋسىزداندىرۋدى جانە يادرولىق قارۋدى تاراتپاۋ جونىندەگى كەلىسىمدى قولدايمىز.
قازاقستان سيريا داعدارىسىن شەشۋدە استانا بەيبىتشىلىك پروتسەسىنە باستاماشى بولدى. ەلوردا الەمدىك دىندەر كوشباسشىلارىنىڭ سامميتتەرىن تۇراقتى وتكىزەتىن ورىنعا اينالدى. شتاب-پاتەرى استانا قالاسىندا ورنالاسقان ازياداعى ءوزارا ءىس-قيمىل جانە سەنىم شارالارى جونىندەگى جيىن ايماقتىق جانە جاھاندىق ماسەلەلەردى شەشەتىن بىردەن-ءبىر تەتىككە اينالدى.
ءبىز اۋعانستانداعى گۋمانيتارلىق داعدارىستى ەڭسەرۋگە بەلسەنە اتسالىسامىز. بۇۇ اياسىندا اۋعان حالقىنا جان-جاقتى كومەك كورسەتۋدىڭ قاجەتتىلىگىن اتاپ وتكىم كەلەدى. بۇل ورايدا ورتالىق ازيا جانە اۋعانستان ءۇشىن الماتىدا بۇۇ تۇراقتى دامۋ ماقساتتارىنىڭ ايماقتىق ورتالىعىن قۇرۋ ماڭىزدى.
قازاقستان جاھاندىق جانە ايماقتىق سەرىكتەستەرىمەن دوستىق قارىم-قاتىناستى نىعايتۋ ءۇشىن بار كۇش-جىگەرىن جۇمسايدى. ءبىز قازىرگى جاعدايدا ورتالىق ازياداعى باۋىرلاس ەلدەرمەن ايماقتىق ارىپتەستىك ورناتۋعا باسا نازار اۋدارامىز.
ەل ىشىندە ادىلدىك, زاڭ ۇستەمدىگى, تەڭدىك جانە ءادىل سوت تورەلىگى قاعيداتتارىن ەنگىزۋ ءۇشىن رەفورما جۇرگىزۋگە باعىتتالعان ءتيىستى شارالاردى قولعا الامىز. زاڭ مەن تارتىپكە نەگىزدەلگەن مەنىڭ ۇستانىمىم – ايقىن. بۇل – «جاڭا ادىلەتتى قازاقستاندى» قۇرۋدىڭ بەرىك نەگىزى.
قىسقا ۋاقىت ىشىندە ءبىز ساياسي ينستيتۋتتاردى رەفورمالاپ, پرەزيدەنتتىڭ وكىلەتتىگىن شەكتەدىك. كونستيتۋتسياعا وزگەرىستەر ەنگىزىپ, ساياسي جانە ەكونوميكالىق جۇيەنى قايتا جاڭعىرتتىق. سىبايلاس جەمقورلىقپەن كۇرەسىپ جاتىرمىز. سوندىقتان قازىرگى قازاقستاننىڭ وسىدان ەكى جىل بۇرىنعى قازاقستانمەن سالىستىرعاندا ەداۋىر ايىرماشىلىعى بار.
قولدانىستاعى جۇيەنى وزگەرتۋدى كوزدەيتىن ءبىزدىڭ جولىمىز ءالى بىتكەن جوق. ءبىز ساياسي رەفورمالار مەن ادامي كاپيتالعا ينۆەستيتسيا قۇيۋ ورتاق تابىستىڭ «قاقپانىنان» قۇتقارىپ, ەكونوميكامىزدى مەيلىنشە تۇراقتى ەتەتىنىن جاقسى تۇسىنەمىز. ايتۋلى وزگەرىستەردەن وتكەنىمىزبەن, ءالى دە كوپ نارسە ىستەۋىمىز كەرەك. الايدا ءبىز ءوزىمىز تاڭداعان جولدى ابىرويمەن ءجۇرىپ ءوتۋ ءۇشىن بارلىق سىن-قاتەرگە دايىن بولۋ كەرەكتىگىن دە بىلەمىز. ءارى ءبىز بۇعان دايىنبىز.
قۇرمەتتى قوناقتار!
ءبىز بەتپە-بەت كەلىپ وتىرعان سىن-قاتەرلەردىڭ ىشىندەگى ەڭ قيىنى – كليماتتىڭ وزگەرۋى. ورتالىق ازيا بۇل قاتەرلەرگە قارسى تۇرۋ ءۇشىن العى شەپتە بولادى. عالامدىق اۋا تەمپەراتۋراسىنىڭ 2050 جىلعا قاراي 1,5℃-قا كوتەرىلۋىن ءساتتى شەكتەۋ مۇمكىن بولعاننىڭ وزىندە, ورتالىق ازيا ەلدەرى كۇن رايىنىڭ 2-دەن 2,5 ℃-قا دەيىن كوتەرىلگەنىن بايقايدى. بۇل ءبىز ءومىر سۇرەتىن ورتانىڭ ترافورماتسياسىنا, ناقتىراق ايتقاندا شولگە اينالۋىنا, ودان كەيىن تىرشىلىكتىڭ جويىلۋىنا الىپ كەلەدى. سوندىقتان بارلىق سىن-قاتەرگە دايىن بولۋىمىز كەرەك.
سۋ رەسۋرستارىنىڭ جەتىسپەۋشىلىگى شىن مانىندە الاڭداتادى. ورتالىق ازياداعى قۋاڭشىلىق پەن سۋ تاسقىنىنان كەلەتىن شىعىن جالپى ىشكى ءونىمنىڭ 1,3 پايىزى دەڭگەيىندە دەپ باعالانادى. اۋىل شارۋاشىلىعى داقىلدارىنىڭ ونىمدىلىگى 30 پايىزعا دەيىن كەمىپ, 2050 جىلعا دەيىن 5 ميلليونعا جۋىق ىشكى كليماتتىق ميگرانتتىڭ پايدا بولۋىنا اكەپ سوقتىرادى.
بىزدەگى مۇزدىقتاردىڭ كولەمى قازىر 30 پايىزعا قىسقاردى. ايماقتاعى ەكى ۇلكەن وزەن سىرداريا مەن امۋدارياداعى سۋ دەڭگەيى 2050 جىلعا قاراي 15 پايىزعا تۇسەدى. ءبىز ايماقتاعى ەكولوگيالىق اپاتتىڭ الدىن الۋ ءۇشىن حالىقارالىق ارالدى قورعاۋ قورىن قولداۋعا كوبىرەك قارجى بولۋگە شاقىرامىز.
سۋ مەن كليماتتىڭ وزگەرۋ ماسەلەسى ءوزارا تىعىز بايلانىستى. ورتالىق ازيا – سۋ قاۋىپسىزدىگىن ساقتاۋ تىعىز ارىپتەستىك جانە بىرلەسكەن ءتيىمدى شارالاردى جۇزەگە اسىرۋ ارقىلى عانا شەشىلەتىن ايماق.
ايماقتاعى كليمات جانە وزگە دە ماسەلەلەردى تالقىلاۋ ءۇشىن مەن الماتىدا ورتالىق ازيا ەلدەرىنىڭ جوبالىق كەڭسەسىن قۇرۋدى جانە بۇۇ سەكىلدى حالىقارالىق ۇيىمداردى تارتا وتىرىپ, 2026 جىلى قازاقستاندا ايماقتىق كليماتتىق سامميت وتكىزۋدى ۇسىنامىن.
ەلىمىز «جاسىل» ەكونوميكانىڭ مول مۇمكىندىكتەرىن ۇسىنىپ, قايتا قالپىنا كەلتىرىلەتىن ەنەرگەتيكانىڭ ورتالىعى اتانا الار ەدى. الايدا ۋاقىت ءبىزدىڭ جاعىمىزدا ەمەس. كومىردى از تۇتىنۋ جانە «جاسىل» ەكونوميكاعا قاجەتتى جىلدامدىقپەن كوشۋ ءۇشىن بىزگە رەسۋرستار مەن سەرىكتەستىك بايلانىس قاجەت.
حانىمدار مەن مىرزالار!
عالامشارىمىزداعى توتەنشە كليماتتىق جاعداي – ءبىزدىڭ تىعىز قارىم-قاتىناسىمىز بەن ورتاق تاعدىرىمىزدىڭ جارقىن ۇلگىسى. قالاساق تا, قالماساق تا ءبىزدى كوپ نارسە بايلانىستىرادى. قالىپتاسقان جاعدايدى ەسكەرە وتىرىپ, بىرگە جۇمىس ىستەۋدىڭ امالىن تاپقان تابىسقا جەتەدى. ال قابىلەتسىزدەرى ساتسىزدىككە ۇشىرايدى. بۇۇ-نىڭ كوپقىرلى شەشىمىنىڭ استارىندا جاتقان پرينتسيپتەرى مەن قۇندىلىقتارى – بۇل ماسەلەنى شەشۋدىڭ بىردەن-ءبىر ءتيىمدى ءتاسىلى عانا ەمەس, جالعىز جولى.
ورتاق ماسەلەلەردى شەشۋ جانە سەرىكتەستىكتى نىعايتۋعا, دامۋ مەن پروگرەسكە ارنالعان ديالوگقا كەڭىستىك ۇسىنۋ استانا حالىقارالىق فورۋمىنىڭ تۇپكى ماقساتى دەۋگە بولادى. مەن وپتيميستىك كوزقاراسپەن الداعى ەكى كۇندە وتەتىن كونسترۋكتيۆتى تالقىلاۋ ءبىزدى وڭتايلى شەشىم قابىلداۋعا جانە الداعى ۋاقىتتا ارىپتەستىككە باعىتتايتىنىنا سەنىم بىلدىرەمىن.
ءسوز سوڭىندا ماعان مىنا جايتتى ەسكە سالۋعا رۇقسات ەتىڭىزدەر. مازمۇندى اڭگىمە مەن سەرىكتەستىككە جول اشۋ ءۇشىن اشىقتىق, شىدامدىلىق جانە بىرلىك اۋاداي قاجەت. مەن وسى فورۋمعا جانە ارقايسىڭىزعا ساتتىلىك تىلەيمىن. بارشاڭىزعا بۇگىن ءبىزدىڭ قاتارىمىزعا قوسىلعاندارىڭىز ءۇشىن تاعى دا العىس ايتامىن. تالقىلاۋلار سىزدەر ءۇشىن تابىستى بولۋىنا تىلەكتەستىك بىلدىرەمىن.
