بەلگىلى بولعانداي, ءجابىر كورگەن ستۋدەنتتى ءبىر توپ قىز, ءبىر ەمەس, بىرنەشە رەت سوققىعا جىققان. ونىڭ ءبارى الەۋمەتتىك جەلىدە تاراعان بەينەماتەريالداردا ايدان انىق كورىنىپ تۇر. جاسىرىپ-جاباتىنداي ەمەس. الايدا, باق وكىلدەرى رەسمي اقپاراتتى قوعامدىق پىكىر تۋىنداتىپ بارىپ قانا الا العان ەدى. وعان دەيىن ءبىلىم بەرۋ مەكەمەسىنىڭ باسشىلارىنان, قۇقىق قورعاۋ ورگاندارىنان تارقاتىپ اقپارات الا الماعانىمىز شىندىق. قوعامدىق پىكىردىڭ ءوزىن سارالاپ, ساراپتاپ, ءسۇزىپ شىقساڭىزدار, ءجابىر كورگەن قىزعا قولداۋ كورسەتىپ, جىلى لەبىزدەرىن بىلدىرگەن. ال كۇدىكتى تاراپتى زاڭ اياسىندا جازاعا تارتۋ كەرەكتىگىن جازعان. ءسويتىپ, قىلمىستىق ءىس قوزعالدى. ەكى ايدان استام ۋاقىت تەرگەۋ جۇرگىزىلدى.
كەشە شۋلى ىسكە قاتىستى سوت وتىرىسى وتەدى دەپ, شىعىس قازاقستان وبلىسى كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنا باردىق. الايدا, سۋديا ايىپتالۋشى تاراپتىڭ جانە پروكۋروردىڭ ۇسىنىسىمەن سوت جابىق تۇردە وتەدى دەگەن شەشىمگە كەلىپتى. سەبەبى, كامەلەت جاسقا تولماعان قىزداردىڭ پسيحولوگياسىنا نۇقسان كەلۋى مۇمكىن ەكەن. جابىرلەنۋشى قىزدىڭ اناسى مەن تۋعان-تۋىستارى عانا سوتتىڭ اشىق ءوتۋىن سۇرادى.
– قىزىمدى ۇرىپ, بەينەكامەراعا تۇسىرگەندە كامەلەت جاسقا تولماعاندارىن ءبىلدى عوي. ونىڭ ۇستىنە, اياۋلىمنىڭ اتا-اناسىنان باسقاسى كەشىرىم سۇراپ كەلمەدى. قىزىم بىرنەشە رەت اۋرۋحاناعا جاتتى. ءالى كۇنگە دەيىن باسىم اۋىرادى دەيدى. ساباققا بارۋعا دا زاۋقى جوق. بەينەكامەراعا ءتۇسىرىپ, ابىرويىن ايرانداي توكتى. ەندى سوت ءادىل شەشىم شىعارىپ, كۇدىكتى قىزدار جازانىڭ ەڭ قاتاڭ ءتۇرىن السا ەكەن, – دەيدى جابىرلەنگەن قىزدىڭ اناسى الميرا دوسىموۆا.
ايتقانداي, سوت بۇدان بىلاي جابىق وتەدى. پروكۋراتۋرا وكىلى تۇسىندىرگەندەي, سوت شەشىمى شىققان سوڭ ءىستىڭ بۇگە-شىگەسى رەسمي تۇردە حابارلانادى. ال حالىقتىڭ كۇتكەنى – ءادىل شەشىم.
وسكەمەن
