«قايىرلى كۇن, قۇرمەتتى استانا قالاسىنىڭ تۇرعىندارى! سوڭعى ۋاقىتتا استانا قالاسىندا سۋ تاپشىلىعى ماسەلەسى كوتەرىلىپ جاتىر. راس, قالامىزدا مۇنداي پروبلەما بار. قازىرگى ۋاقىتتا تاۋلىگىنە 25 مىڭ كۋبومەتر سۋ جەتىسپەيدى. قالامىز كۇن ساناپ ءوسىپ جاتىر. جىلىنا كەم دەگەندە 60-70 مىڭ جاڭا تۇرعىن قوسىلادى, ال سوڭعى 3 جىلدىڭ ىشىندە قالامىزدا تۇراتىن ازاماتتاردىڭ سانى 200 مىڭ ادامعا ارتتى», دەدى قالا اكىمى.
جەڭىس قاسىمبەكتىڭ ايتۋىنشا, سوڭعى ايدا شاھاردا سۋارۋ جۇمىستارى باستالىپ كەتكەن. وعان قوسا, وتكەن اپتادا بولعان +30 گرادۋستان اساتىن اپتاپ ىستىق وسى اپتادا دا جالعاسادى دەپ بولجانىپ وتىر. وسىعان بايلانىستى سۋارۋ جۇمىستارى قارقىندى ءجۇرىپ جاتىر.
«وسىدان 2 جىل بۇرىن اكىمدىك ەكى جاڭا نىساننىڭ قۇرىلىسىن باستادى. ءبىرىنشى نىسان – قازىر وزدەرىڭىز كورىپ وتىرعانداي, مىناۋ سورعى ستانتسياسى. بۇل نىساننىڭ قۇرىلىسى ماۋسىم ايىنىڭ سوڭىنا دەيىن تولىعىمەن بىتەدى. ناتيجەسىندە قالاعا قاجەتتى كۇنىنە 25 مىڭ كۋبومەتر سۋ بەرىلەدى.
ەكىنشى نىسان – سۋ قۇبىرى, ياعني استانا سۋ قويماسىنان قالاعا كەلەتىن سۋ قۇبىرى. بۇل نىسانداعى جۇمىستار دا اياقتالىپ قالدى. كەلەسى اپتادا تولىعىمەن قۇرىلىس جۇمىسى بىتەدى جانە قالاعا قاجەتتى سۋ قىسىمى قايتا بەرىلەدى», دەپ سەندىردى جەڭىس قاسىمبەك.
بۇل رەتتە استانا اكىمى قالاداعى سۋ تاپشىلىعى ماسەلەسى ءبىر ايدىڭ ىشىندە تولىعىمەن شەشىلەتىنىن اتاپ ءوتتى.
سونداي-اق تامىز ايىندا جوعارىدا اتاپ وتىلگەن ستانتسيانىڭ ەكىنشى كەزەڭىنىڭ قۇرىلىسى اياقتالادى دەپ جوسپارلانىپ وتىر.
«قۇرىلىس جۇمىستارىنىڭ ەكىنشى كەزەڭى اياقتالعان سوڭ قالاعا كۇنىنە قوسىمشا 85 مىڭ كۋبومەتر سۋ بەرىلۋ مۇمكىندىگى پايدا بولادى. بۇل الداعى 3-4 جىلعا جەتكىلىكتى», دەپ قوستى ەلوردا اكىمى.
