جوبا ماقساتى — شەمونايحا مەن قاتون-قاراعاي اۋداندارىندا جاڭا تالشىقتى وپتيكالىق بايلانىس جەلىسى ينفراقۇرىلىمىن قۇرىپ, تۇرعىنداردى نارىقتاعى باعادان ارزان قۇنمەن ەڭ از دەگەندە جىلدامدىعى سەكۋندىنا 15 مبيت بولاتىن ينتەرنەتپەن قامتاماسىز ەتۋ.
جوباعا Aitas Foundation كومپانياسى باستاماشى بولىپ وتىر. جوبا جەتەكشىسى ەن سان ءليدىڭ ايتۋىنشا, قور بۇعان دەيىنگى جوبالاردى جۇزەگە اسىرۋ بارىسىندا ينتەرنەتكە قولجەتىمدىلىك اۋىل حالقىنىڭ ءومىر ساپاسىن, مەكتەپتەگى ءبىلىم ساپاسىنا تىكەلەي اسەر ەتەتىنىنە كوز جەتكىزدى.
«وتكەن جىلى Aitas Foundation ءبىلىم بەرۋ جوبالارىن جۇزەگە اسىرۋ بارىسىندا اۋىلدارداعى ناشار ينتەرنەت ماسەلەسىنە نەمەسە ءتىپتى بولماۋىنا بايلانىستى قيىندىقتارعا تاپ بولدى. العاشىندا جوباعا 5 مەكتەپ قاتىسقاندىقتان ماسەلەنىڭ وزەكتىلىگى بايقالمادى, الايدا مەكتەپ سانى وسكەن سايىن ينتەرنەت تاپشىلىعى جۇمىستى تەجەي ءتۇستى. وسى كەزدە قىزمەتكەرلەرىمىز بەن مينيسترلىك وكىلدەرى ماسەلەنى شەشۋ جولدارىن قاراستىرا باستادى. قورىمىز جۇمىس ىستەيتىن ايماقتاردا اسىرەسە وزەكتى بولا ءتۇستى. سوندىقتان قاتون-قاراعاي جانە شەمونايحا اۋداندارىندا «اۋىلدىق ايماقتارداعى ينتەرنەت» پيلوتتىق جوباسىن ىسكە قوستىق. جوبانى ءساتتى جۇزەگە اسىرۋ ءۇشىن قور وسى ماسەلەنى قولعا الاتىن كومپانيالاردى ىزدەي باستادى. سول كەزدە فاستلاين كومپانياسى ءوز قىزمەتتەرىن ۇسىنىپ, جوباعا كوممەرتسيالىق نەگىزدە كىردى. بۇگىندە شەمونايحا اۋدانىنداعى 3 ەلدى مەكەندى قامتيتىن جوبانى باستاپ وتىرمىز», دەدى جوبا جەتەكشىسى ەن سان لي.
بۇل جوبا اياسىندا قاتون-قاراعاي مەن شەمونايحا اۋداندارىنا قاراستى اۋىلداردىڭ ۇيلەرى مەن مەكەمەلەرى جىلدام ينتەرنەتكە قوسىلادى. ول ءۇشىن اۋەلدەن قولدا بار ترانستەلەكوم جەلىلەرىمەن GPON تەحنولوگياسى ارقىلى جاڭا تالشىقتى وپتيكالىق بايلانىس جەلىسى ماگيسترالدارى سالىنادى.
«بيزنەس, قوعام مەن ۇكىمەتتىڭ بىرلەسكەن جۇمىسىنىڭ ارقاسىندا اۋىل حالقىنىڭ ءومىر ساپاسى ارتا تۇسەدى. جوبا جۇمىسىنا ساتتىلىك تىلەيمىز», دەدى شەمونايحا قالاسى اكىمىنىڭ ورىنباسارى مەدەت ەلشىباي.
شەمونايحا اۋدانىنىڭ تۇرعىنى دانيل بوبروۆ جاڭا جوباعا قىزىققانىن, ينتەرنەتكە قوسىلۋ ءۇشىن ءوتىنىش قالدىرۋعا نيەتتى ەكەنىن جەتكىزدى.
ء«بىزدىڭ قالا شاعىن, بىراق ۇلكەن قالالاردىڭ تۇرعىندارى سياقتى ادامدارعا ينتەرنەت جىلدامدىعى مەن ساپاسى ماڭىزدى. مەنى تاريفتىك جوسپارلار مەن ۇسىنىستار قىزىقتىردى, جاقىن ارادا ابونەنتتەر قاتارىنا قوسىلامىن دەپ ويلايمىن», دەيدى ول.
سونىمەن قاتار جوبا اياسىندا قاتون-قاراعاي مەن شەمونايحا اۋداندارىنداعى الەۋمەتتىك ماڭىزى بار نىساندارعا دا ينتەرنەت جەلىسى جۇرگىزىلەدى. قاجەت بولعان جاعدايدا ءتۇرلى نىسانداردا ينتەرنەت جەلىسىن سالۋ نەمەسە جاڭارتۋ دا جوسپاردا بار.
