پرەزيدەنت تاسىرماسىنا اۋليەاتالىقتار مىقتاپ دەن قويدى. جىل باسىندا م.ح.دۋلاتي اتىنداعى تاراز وڭىرلىك ۋنيۆەرسيتەتى مەن «قازفوسفات» جشس جانە د.مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتى ۇشجاقتى كەلىسىمگە قول قويدى. ناتيجەسىندە, وڭىرلىك ۋنيۆەرسيتتە تمد ەلدەرى اراسىندا العاش رەت حيميا ونەركاسىبى سالاسىنداعى جەلىلىك كامپۋستىڭ تۇساۋكەسەرى ءوتتى.
وبلىس اكىمىنىڭ ورىنباسارى ەركىن ۇيسىمباەۆ جەلىلىك كامپۋس ارقىلى بىلىكتى كادر دايارلاۋدىڭ مۇمكىندىگى ارتاتىنىنا سەنىمدى.
– جەلىلىك كامپۋس جۇمىسىنىڭ باستالۋى – جوعارى بىلىكتى كادرلاردى دايارلاۋ ىسىندە ءتيىمدى ديالوگتى دامىتىپ, ءبىلىم ورداسىنداعى ىنتىماقتاستىقتى نىعايتۋداعى ماڭىزدى كەزەڭ. زاماناۋي, كرەاتيۆتى تاسىلدەردى قاجەت ەتەتىن حيميا ونەركاسىبى بۇگىندە قارقىندى دامىپ كەلە جاتقان سالا. ەكى ۋنيۆەرسيتەت پەن «قازفوسفات» كومپانياسىنىڭ بىرلەسكەن جۇمىسى اۋىز تولتىرىپ ايتارلىقتاي ناتيجە بەرەتىنىنە سەنىمدىمىن. بۇگىندە وبلىس باسشىسى اتالعان جوبانى جۇزەگە اسىرۋعا ايرىقشا نازار اۋدارىپ وتىر. كەلەسى وقۋ جىلىندا جەرگىلىكتى بيۋدجەت قاراجاتى ەسەبىنەن 55 ءبىلىم گرانتى بولىنەدى, ونىڭ 25-ءى كوللەدج ستۋدەنتتەرى ءۇشىن «حيميالىق ينجەنەريا جانە ۇدەرىستەر» ماماندىعىنا بەرىلەدى», – دەدى ە.ۇيسىمباەۆ.
وڭىرلىك ۋنيۆەرسيتەتىنىڭ رەكتورى مۇحتار بايجۇمانوۆتىڭ ايتۋىنشا, جەلىلىك كامپۋس ارقىلى كادر دايارلاۋ ىسىندەگى وزەكتى ماسەلەلەر ۋاقتىلى شەشىمىن تاپپاق.
– ءۇش تاراپتىڭ بىرلەسە اتقارعان جۇمىسى جاڭا يدەيالاردى ىسكە اسىرۋعا مۇمكىندىك تۋدىرىپ, حيميا عىلىمىنىڭ دامۋىنا سەرپىن بەرەتىنىنە ەش كۇمانىم جوق. حيميا ونەركاسىبى ءۇشىن عىلىم مەن ءوندىرىستى ساپالى ءارى جاڭا دەڭگەيگە كوتەرەتىن اقىلدى, كرەاتيۆتى جانە ءورشىل ماماندار قاجەت ەكەنى راس. جەلىلىك كامپۋس اياسىندا ستۋدەنتتەر العاشقى ەكى جىلدا جەرگىلىكتى ۋنيۆەرسيتەتتە وقىسا, ودان كەيىن مەندەلەەۆ ۋنيۆەرسيتەتىندە ءبىلىم الىپ, كاسىبي شەبەرلىگىن ارتتىرادى. ال ءتورتىنشى كۋرستا «قازفوسفات» كاسىپورنىندا وندىرىستىك تاجىريبەدەن وتەدى. وقۋ اياقتالعاننان كەيىن ستۋدەنتتەر ەكى ۋنيۆەرسيتەتتىڭ ديپلومىنا جانە «قازفوسفات» سەرىكتەستىگىنە جۇمىسقا ورنالاسۋ مۇمكىندىگىنە يە بولادى, – دەدى م.بايجۇمانوۆ.
«قازفوسفات» كومپانياسى پەرسونالمەن جۇمىس دەپارتامەنتىنىڭ ديرەكتورى ءابدىنادىر ايتماتوۆتىڭ ايتۋىنشا, كاسىپورىن قىزمەتكەرلەرىنىڭ سانى الداعى جىلدارى ەداۋىر ارتادى. ال ۇشجاقتى كەلىسىم ارقىلى ءبىلىم العان ستۋدەنتتەر سەرىكتەستىككە جۇمىسقا قابىلدانادى. ولاردىڭ جالاقىسى دا قوماقتى بولماق.
د.مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتىنىڭ فيزيكا-حيميا كافەدراسىنىڭ مەڭگەرۋشىسى, حيميا عىلىمدارىنىڭ كانديداتى ولەگ رايتماننىڭ سوزىنە سەنسەك, جەلىلىك ءبىلىم باعدارلاماسى بويىنشا وقۋدى تاڭداعان ستۋدەنتتەردىڭ مۇمكىندىگى مول. ولار وقۋدى اياقتاعاننان كەيىن جۇمىس ورنىنا دايىن كادر بوپ بارادى.
مامانداردىڭ ايتۋىنشا, الداعى جىلدارى «قازفوسفات» كومپانياسىندا كادر قاجەتتىلىگى تۋىندايدى. ال جەلىلىك كامپۋس ارقىلى ءبىلىم العان ستۋدەنتتەر سول كادر تاپشىلىعىن تولىعىمەن وتەيدى. قىسقاسى, قالاي الىپ قارساق تا, تمد-دا العاش رەت قولعا الىنعان جەلىلىك كامپۋستىڭ ءوڭىر حالقى ءۇشىن پايداسى زور ەكەنى داۋسىز.
تاراز
