لەنينگراد وبلىسىنداعى سلانتسى دەپ اتالاتىن شاعىن قالادا تۋىپ-وسكەن 43 جاستاعى داتسيكتىڭ ءومىرى شىتىرمان وقيعالارعا تولى. ءوزىنىڭ بالالىق شاعى جايىندا اتىشۋلى سپورتشى بىلاي دەپ اڭگىمەلەيدى: «بەس جاسىمدا ءتۇس كوردىم. ءبىر ءداۋ يت مەنى تالاپ تاستاپتى. كەلەسى كۇنى سول پالەنى سويىپ تاستايىن دەپ قولىما پىشاق ۇستاپ ۇيىقتادىم. سودان بەرى مۇلدەم ءتۇس كورمەيتىن بولدىم. ورتا مەكتەپتىڭ باستاۋىش سىنىپتارىندا وقىپ جۇرگەنىمدە ماعان ءبارى تيىسەتىن. ءبىر جىلدىڭ ىشىندە عانا 16 رەت ميىم شايقالىپ, ءبىر رەت جانساقتاۋ بولىمىنەن شىقتىم. بىردە قاتتى اشۋىم كەلىپ, مەنى سوققىعا جىققان بالالاردى بىرتىندەپ ۇستاپ الىپ, وڭدىرماي تىستەپ تاستادىم. تىپتەن بىرەۋىنىڭ مويىن ءسىڭىرىن دە ج ۇلىپ العان ەكەنمىن. سودان كەيىن ولار مەنەن اۋلاق جۇرەتىن بولدى».
ۆياچەسلاۆ جاستايىنان تاەكۆوندو, دزيۋدو جانە كىر تاسىن كوتەرۋ سپورتىمەن اينالىستى. كەيىننەن ارالاس جەكپە-جەككە دەن قويدى. «سارى تارزان» دەگەن جاناما ەسىمگە يە بولعان ول تۇساۋكەسەر كەزدەسۋىن 1999 جىلى اندرەي ورلوۆسكيگە قارسى وتكىزدى. باسەكە باسىنان اياعىنا دەيىن بەلورۋسسيالىق فايتەردىڭ باسىمدىعىمەن ءوتتى. الايدا داتسيكتىڭ جەرگە اۋناپ بارىپ, اياعىمەن تەپكەن سوققىسى قارسىلاسىنىڭ جاعىنا ءدال ءتيدى. ول ەسىنەن تانىپ قالدى. ءبىر عاجابى, ارادا بىرەر جىل وتكەننەن سوڭ ءدال سول ورلوۆسكي UFC-ءدىڭ چەمپيونى اتاندى.
ءار جەكپە-جەكتە داتسيكتىڭ ەرەجەنى ورەسكەل بۇزىپ, ودان كەيىن جانجال شىعاراتىن ادەتى بار. سول ءۇشىن دە ول تالاي جارىستان شەتتەتىلدى. ول از دەسەڭىز, «سارى تارزان» قوعامدىق ورىندار مەن كوشەدە دە تىنىش جۇرمەيدى. ماسەلەن, 2017 جىلدىڭ اقپان ايىندا ول ۇيالى تەلەفوندار دۇكەنىن توناپ, ساتۋشىلاردى سوققىعا جىققانى ءۇشىن پسيحياتريالىق اۋرۋحاناعا جاتقىزىلدى. بىرنەشە ايدان كەيىن ۆياچەسلاۆ ول جەردەن قاشىپ شىعىپ, تاعى دا ەسكى ادەتىنە باستى. پوليتسەيلەر ىزىنە تۇسكەن كەزدە شەكارا اسىپ, نورۆەگيادان ءبىر-اق شىقتى. اتالعان ەلدەن ول ساياسي باسپانا سۇرادى. سپورتشى ءبىراز ۋاقىت وسلو تۇرمەسىندە وتىرعاننان كەيىن رەسەيگە دەپورتاتسيالاندى. 2012 جىلى سوت ۇكىمى شىعىپ, باسبۇزار بەس جىلعا باس بوستاندىعىنان ايىرىلدى.
2017 جىلى تۇرمەدەن شىققان بەتتە داتسيك قايتا ءىستى بولدى. ول جەزوكشەلەردەن باستاپ, كوشەدە كەزدەيسوق جولىققان ادامداردى ۇرىپ-سوعىپ, جەكە زاتتارىن تارتىپ الدى. جەڭىل ءجۇرىستى قىزداردى سانكت-پەتەربور كوشەلەرىمەن تىر جالاڭاش جۇرگىزدى. سول ءۇشىن تاعى دا 3,5 جىل مەرزىمگە تەمىر تورعا توعىتىلدى. 2020 جىلى جازاسىن تولىقتاي وتەپ, قايتا ۇلكەن سپورتقا ورالدى. سول كەزدەن بەرى تاعى بىرنەشە جەكپە-جەك وتكىزىپ ۇلگەردى. ونىڭ بويى 186 سانتيمەتر, سالماعى 150 كيلو. مىنە, ۆياچەسلاۆ داتسيك وسىنداي ء«ومىر مەكتەبىنەن» وتكەن.
37 جاستاعى عالىمجان جاسىلانوۆ تا «قارا جاياۋ» ەمەس. ول – تۇركىستان وبلىسى سوزاق اۋدانىنىڭ تۋماسى. بوزبالا شاعىندا ەركىن كۇرەس جانە قازاق كۇرەسىمەن شۇعىلداندى. بايگەگە تۇلپار جاراتىپ, شاباندوز بولدى. اساۋ اتتاردى ۇيرەتتى. كوكپار تارتىپ, 200-دەي سالىم سالعان. ءوز سوزىنە قاراعاندا, ورەكەڭدەرمەن كۇش سىناسقاندا جانى جاي تابادى, قارسىلاسىن ەسىنەن تاندىرعانشا نەمەسە ءوزى تالىپ قالعانشا توبەلەسكەندى ۇناتادى ەكەن. جاناما ەسىمى – تت. قانداسىمىزدىڭ بويى 180 سانتيمەتر, سالماعى 105 كيلو.
عالىمجاننىڭ ارالاس جەكپە-جەكپەن اينالىسقانىنا اسا كوپ ۋاقىت بولعان جوق. وسى كۇنگە دەيىن نەبارى ەكى كەزدەسۋ وتكىزىپ, ەكى رەتىندە دە جەڭىسكە جەتتى. Naiza ليگاسى ۇيىمداستىرعان جارىستا وزبەكستاندىق داۆرون كۋزيەۆتى ۇرىپ جىققاننان كەيىن دوستارى وعان سۋ جاڭا «BMW» كولىگىن مىنگىزدى. ال سپورتشىنىڭ ءوزى باسەكە اياقتالعان بەتتە «ەي, ماسكەۋ, مەنى تىڭداڭدار! بارلىقتارىڭ الاپات ايقاسقا دايىن بولىڭدار. ەندى مەن سەندەر جاققا بارىپ, بارلىقتارىڭدى ۇرىپ قۇلاتامىن», دەپ باتىل مالىمدەمە جاسادى.
– الداعى جەكپە-جەكتە داتسيك ۇتادى دەپ نىق سەنىممەن ايتا المايمىن. ونىڭ ءبىر ارتىقشىلىعى – تاجىريبەسىنىڭ مولدىعى. بىراق مەن عالىمجاندى دا جاقسى بىلەمىن. ول – اقكوڭىل, كەڭپەيىل جانە قارۋلى جىگىت. سوققىلارى وتە اۋىر. كەزىندە قازاق فايتەرى دە «تەمىر قاپاستى» كوردى. ۆياچەسلاۆ تا تالاي شىتىرمان وقيعالاردى باسىنان كەشتى. سونداي سىناقتار مەن قيىندىقتارعا قاراماستان ەكەۋى دە ومىردەگى ءوز سوقپاقتارىن تاۋىپ, قازىرگى كەزدە جارىس جولىنا شىعىپ, ساڭ مىڭ جانكۇيەردىڭ قوشەمەتىنە بولەنىپ وتىر, – دەيدى Naiza ليگاسىنىڭ باسشىسى نۇربەك قارابالا.
