تولەگەن ايبەرگەنوۆ اتىنداعى №16 ورتا مەكتەپ ديرەكتورى ساۋلە ءازىمحانوۆا ۇستازدار مەن وقۋشىلاردى سوڭعى قوڭىراۋ مەرەكەسىمەن قۇتتىقتادى. اتاپ وتەتىن ەرەكشە جايت, №16 مەكتەپتە العاشقى قازاق سىنىبىنىڭ وقۋشىلارى تۇلەك اتانىپ جاتىر.
«بۇگىن مەكتەپتە ەرەكشە كۇن. 11 جىل وقىتقان, تاربيەلەگەن بالالارىمىزدى سالتاناتتى مەرەكەمەن شىعارىپ سالايىق دەپ وتىرمىز. ارينە, مەيىرىمدى, جۇرەگىمەن ويلايتىن, ەلىمىزدىڭ, جەرىمىزدىڭ بولاشاعىنا الاڭدايتىن جاقسى ازاماتتار شىعارعىمىز كەلەدى. ءار بالامىزدى قيماي جاتىرمىز. ۇستازدار دا قوبالجىپ ءجۇر.
بيىلعى وقۋ جىلى ەرەكشە. سەبەبى مەن وسى مەكتەپتە ءبىرىنشى جىل جۇمىس ىستەدىم. ۇستازدارىمىزبەن جۇمىلا جۇمىس ىستەدىك. ارىپتەستەرىمنىڭ بارلىعىن بۇگىنگى مەرەكەمەن قۇتتىقتايمىن. ازاماتتى تاربيەلەۋ, جۇرەگىنەن ورىن تابۋ – بۇل ۇستازدىڭ جۇمىسى. ۇستازدىڭ قىزمەتى ەرەكشە. سوندىقتان وقۋشىلار اركەز بالا كەزىندە قالىپتاسقان مەكتەبى, سىنىبى, وتىرعان پارتالارى كوڭىلدەرىنەن كەتپەۋى كەرەك», دەدى مەكتەپ ديرەكتورى.
ساۋلە مىڭشالقىزى قازىر بالالاردىڭ ەرەكشە, ولار ەڭ ءبىرىنشى ادامعا قاراپ بارىپ, ايتقانىن ىستەيتىنىن ايتادى.
«بالا تاربيەلەۋ جۇمىسى وڭاي ەمەس. ول ۇزاق مەرزىمدە قالىپتاساتىن پسيحولوگيالىق جۇمىس. ويتكەنى ءار مىنەزدى ءبىر-ەكى كۇندە, ءبىر ايدا قالىپتاستىرۋ مۇمكىن ەمەس, جىلداپ ىستەلەتىن ءىس. ءبىرىنشى بالانى تاربيەلەيتىن مۇعالىمدەردىڭ قابىلەتى مىقتى, ءىس-ارەكەتتەرى دۇرىس بولۋى كەرەك», دەدى ول.
مەكتەپ ديرەكتورى ۇرپاقتىڭ بولاشاعىنا ۇستاز دا, اتانا دا بىردەي ات سالىسۋ كەرەگىن اتاپ ءوتتى.
«وسىنداي ەرەكشە بالالارىمىزعا ۇلتىمىزدىڭ قۇندىلىقتارىن ءسىڭىرۋ – بورىشىمىز. ال اتا-انا وسى جۇمىستا بىزگە كومەكشى بولۋعا ءتيىس. سەبەبى بالانىڭ بولاشاعىنا ۇستازدار تەك جاقسىلىق تىلەيدى», دەدى ساۋلە مىڭشالقىزى.
