سەناتور نۇرتورە ءجۇسىپ كەشەنگە كەلۋشىلەرمەن اڭگىمە بارىسىندا 31 مامىر – قازاقستان تاريحىنىڭ ەڭ قايعىلى بەتتەرىنىڭ ءبىرى, ميلليونداعان ادامداردىڭ ءومىرىن قيعان جاپپاي ساياسي قۋعىن-سۇرگىن مەن جان تۇرشىگەرلىك اشارشىلىقتى ەسكە الۋ كۇنى ەكەنىن اتاپ ءوتتى. مىڭداعان قۇربانداردى ەسكە الۋ ءۇشىن ەلىمىزدە كوپتەگەن شارالار وتۋدە, مۇراجايلاردا كورمەلەر اشىلدى, مەموريالدارعا گۇل قويىلدى, جاڭا دەرەكتەر جاريالاندى.
«ەلىمىزدە وتكەن عاسىردىڭ 30-شى جىلدارىندا بولعان ساياسي قۋعىن-سۇرگىن مەن اشارشىلىقتان زارداپ شەككەن ميلليونداعان قازاقستاندىقتاردىڭ ەستە ساقتاۋ ماسەلەسىنە ەرەكشە ءمان بەرىلىپ وتىر. مەملەكەت باسشىسى قاسىم-جومارت توقاەۆتىڭ باستاماسىمەن ەلىمىز تاريحىنىڭ وسى كەزەڭىن زەردەلەۋ جانە تاريحي ادىلەتتىلىكتى قالپىنا كەلتىرۋ جونىندە جۇيەلى جۇمىستار جۇرگىزىلۋدە. پرەزيدەنتتىڭ تاپسىرماسى بويىنشا سەناتتا بىرنەشە جىل بۇرىن اقپارات جيناۋ جانە اشارشىلىق كەزەڭىنىڭ دەرەكتى حرونيكاسىنىڭ جيناعىن شىعارۋ جۇمىستارى باستالعان بولاتىن. قوعام مەن وسكەلەڭ ۇرپاقتىڭ بەيبىت ءومىر ءسۇرۋدىڭ قۇندىلىعىن ءتۇسىنۋ جانە مۇنداي وقيعالاردىڭ قايتالانۋىنا ەشقاشان جول بەرمەۋى ءۇشىن وسىنىڭ ءبارى اسا ماڭىزدى», دەدى نۇرتورە ءجۇسىپ.
