قر زاڭىنا سايكەس تومەندەگى ساناتقا كىرەتىن ازاماتتاردىڭ زەينەتكە ەرتە شىعۋ قۇقىعى بار:
- 5 جانە ودان كوپ بالا تۋعان (اسىراپ العان) جانە ولاردى 8 جاسقا دەيىن تاربيەلەگەن ايەلدەر;
- سەمەي يادرولىق سىناق پوليگونىنىڭ توتەنشە جانە رادياتسيا قاۋپى ەڭ جوعارى ايماقتارىندا 1949 جىلعى 29 تامىزدان 1963 جىلعى 5 شىلدە ارالىعىنداعى كەزەڭدە كەمىندە 5 جىل تۇرعان ايەلدەر.
سونداي-اق Egov ۇسىنعان مالىمەتتەرگە سايكەس,16 جاسقا دەيىنگى مۇگەدەك بالانى باعىپ-كۇتكەن ۋاقىت, بوگدەنىڭ كومەگىنە مۇقتاج ءبىرىنشى توپتاعى مۇگەدەككە, ەكىنشى توپتاعى جالعىزباستى مۇگەدەككە جانە جاسىنا بايلانىستى زەينەتكەرگە, سونداي-اق 80 جاسقا تولعان قارتقا كۇتىم جاساعان ۋاقىت, اسكەري قىزمەتشىلەر (مەرزىمدى قىزمەتتەگى اسكەري قىزمەتشىلەردەن باسقا), ارناۋلى مەملەكەتتىك ورگاندار قىزمەتكەرلەرى جۇبايلارىنىڭ ماماندىعى بويىنشا جۇمىسقا ورنالاسۋ مۇمكىندىگى بولماعان جەرلەردە جۇبايلارىمەن بىرگە تۇرعان كەزەڭدەرى, بۇرىنعى كەڭەستىك مەكەمەلەردىڭ, قازاقستان رەسپۋبليكاسى مەكەمەلەرى مەن حالىقارالىق ۇيىمداردىڭ قىزمەتكەرلەرى زايىبىنىڭ (جۇبايىنىڭ) شەتەلدە تۇرعان, بىراق جالپى جيىنتىعى 10 جىلدان اسپايتىن كەزەڭى جانە باسقالار سياقتى جەكەلەگەن الەۋمەتتىك ماڭىزى بار كەزەڭدەردى زەينەتاقى جۇيەسىنە قاتىسۋ ءوتىلىن ەسەپتەۋ كوزدەلگەن.
سونداي-اق ساقتاندىرۋ كومپانياسىمەن كەلىسىمشارت جاساپ, زەينەتاقى اننۋيتەتىن راسىمدەۋ ارقىلى زەينەتكە 8 جىلعا ەرتە شىعۋعا بولادى. ول ءۇشىن زەينەتاقى شوتىندا ەر ادامداردا 8 ملن تەڭگە, ايەلدەردە 10,5 ملن تەڭگە جەتكىلىكتى بولۋى شارت.
اننۋيتەتىن راسىمدەگەن كەزدە زەينەتاقى ءومىر بويىنا بەرىلەدى جانە كەپىلدىك كەزەڭىن السا, قايتىس بولعان جاعدايدا دا زەينەتاقى تۋعان-تۋىستارىنا تولەنە بەرەدى, ياعني مۇراگەرىنە وتەدى. ەگەر اننۋيتەتىن راسىمدەۋگە قارجى جەتپەي قالسا, بىرلەسكەن اننۋيتەت الۋعا بولادى. ەرلى-زايىپتى جاندار شوتتاعى قارجىسىن بىرىكتىرە الادى.
سونىمەن قاتار, مۇگەدەكتىگى بار جاندارعا زەينەتاقى اننۋيتەتىنە جەڭىلدىك قاراستىرىلعان.
