فورۋمعا مەملەكەتتىك كەڭەسشى ەرلان قارين, اقپارات جانە قوعامدىق دامۋ ءمينيسترى دارحان قىدىرالى, قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ناۋرىزباي قاجى تاعان ۇلى, ساراپشىلار كەڭەسىنىڭ مۇشەلەرى, مەدرەسە-كوللەدج بەن قاريلار ورتالىعىنىڭ ديرەكتورلارى, سونداي-اق ەلىمىزدىڭ ءار ايماعىنان كەلگەن 350 يمام قاتىستى.
قۇران اياتىمەن اشىلعان ءىس-شارادا ءمۇفتياتتىڭ جىل باسىنان بەرى اتقارعان ءىس-شارالارى تۋرالى بەينەروليك كورسەتىلدى. فورۋم باعدارلاماسىنا سايكەس «يمامنىڭ جاماعات نامازىن وتكىزۋ ءتارتىبى», «قازاقستان مۇسىلماندارى ءدىني باسقارماسىنىڭ رۋحاني ء(دىني جانە ۇلتتىق) قۇندىلىقتاردى ناسيحاتتاۋداعى ءرولى» جانە «قاجىنىڭ رۋحاني كەلبەتى» تۇعىرنامالىق قۇجاتتارى تالقىعا سالىندى.
پرەزيدەنت قاسىم-جومارت توقاەۆتىڭ فورۋمعا ارناعان قۇتتىقتاۋىن وقىپ بەرگەن مەملەكەتتىك كەڭەسشى ەرلان قارين قوعامداعى يمامداردىڭ ءرولىن ايرىقشا اتاپ ءوتتى.
«يمام – حالىقتى بىرلىككە ۇندەيتىن, قوعامدى مەيىرىمدىلىككە شاقىراتىن تۇلعا. ادامداردىڭ كوكىرەگىنە ىزگىلىكتىڭ ءدانىن سەۋىپ, جۇرتشىلىقتى جاقسىلىققا ناسيحاتتايدى. سوندىقتان يمامداردىڭ ەل ىشىندەگى ورنى ەرەكشە. سوعان سايكەس ولارعا ارتىلاتىن جاۋاپكەرشىلىك تە زور. يمام مەن جاماعاتتىڭ اراسىندا ءوزارا تۇسىنىستىك, ىنتىماق پەن قۇرمەت بولسا, وندا قوعامنىڭ تۇراقتىلىعى دا بەكي تۇسەدى. جۇرت اراسىندا جۇرگەندە يمامدارمەن ءجيى جولىعىسىپ جاتامىز. سول كەزدە «جاماعاتىڭىز قالاي؟» دەگەن سۇراق قويامىز. سوندا بايقاعانىم, بۇگىندە يمامدار جاماعاتتارى جايىندا ايتقاندا ەرەكشە مەيىرلەنىپ كەتەدى. مەشىتكە كەلۋشىلەردىڭ ءبىر-بىرىنە كومەك قولىن سوزىپ جاتقانىن, سۇرىنگەندى دەمەيتىن ىنتىماعى بار ەكەنىن ايتادى. بۇل ەل بىرلىگىندە جاڭا ىرگەتاس قالىپتاسىپ جاتقانىن كورسەتەدى. حالىقتىڭ ءبىر-بىرىنە شاراپاتىن تيگىزىپ, اۋىزبىرشىلىكتە ءومىر ءسۇرىپ جاتقانىن ناقتىلايدى. وسىعان قاراپ, ءمۇفتيات پەن يمامداردىڭ جۇمىسى تابىستى ىسكە اسىپ جاتقانىنا كۋا بولامىز», دەدى ول.
باس ءمۇفتي ناۋرىزباي قاجى تاعان ۇلى فورۋم اياسىندا تالقىلانىپ جاتقان قۇجاتتاردىڭ ماڭىزىنا توقتالدى.
– بۇگىنگى فورۋمدا بىرنەشە قۇجات قابىلداۋدى ۇسىنىپ وتىرمىز. ءار يمام ءار وڭىردە رۋحاني جەتەكشى بولعاندىقتان, جاماعات وعان ۇيىپ, قۇلشىلىق جاسايدى. «يمامنىڭ جاماعات نامازىن وتكىزۋ ءتارتىبى» قۇجاتىن قابىلداۋداعى ماقسات – مەشىتتەردە كوپشىلىكپەن ناماز وقۋ ءتارتىبىن بىرىزدىلىككە ءتۇسىرۋ, جاماعات اراسىندا تۇسىنىسپەۋشىلىككە جول بەرمەۋ, سونىمەن قاتار اتا-بابامىز ۇستانىپ كەلگەن ءداستۇرلى حانافي ءمازھابىن دارىپتەۋ. اللاعا شۇكىر, بۇگىندە ءمۇفتيات ءدىني عانا ەمەس, ۇلتتىق قۇندىلىقتارىمىزدى ناسيحاتتايتىن رۋحاني ورداعا اينالدى. ءبىز ۇلتتىق بولمىسىمىز بەن مۇسىلماندىق كەلبەتىمىزدى ساقتاپ قالۋ ءۇشىن قازاقستان مۇسىلماندارى ءدىني باسقارماسىنىڭ رۋحاني, ياعني ءدىني جانە ۇلتتىق قۇندىلىقتاردى ناسيحاتتاۋداعى ءرولىن ارتتىرۋعا باسىمدىق بەرىپ وتىرمىز.
قاجىلىققا بارىپ جاتقان وتانداستارىمىزدىڭ قاتارى جىل ساناپ ارتىپ كەلەدى. ءبىز قاجىنى قۇرمەتتەپ, تورىمىزگە شىعارعان حالىقپىز. ونىڭ باتاسىن الۋعا تىرىسامىز. بۇل رەتتە قاجىلارىمىز دا رۋحاني تۇلعاسىمەن, كوركەم مىنەزىمەن, ادەبىمەن اينالاسىنا ۇلگى-ونەگە بولۋعا ءتيىس. قاجى بولۋ ءومىر بويى ۇلكەن جاۋاپكەرشىلىك جۇكتەيدى. بۇگىن قابىلداناتىن «قاجىنىڭ رۋحاني كەلبەتى» قۇجاتى قاجىلارىمىزدىڭ رۋحاني جاۋاپكەرشىلىگىن ارتتىرۋدى كوزدەيدى, – دەپ اتاپ ءوتتى باس ءمۇفتي.
اتالعان قۇجاتتار ءبىراۋىزدان ماقۇلدانىپ, جيىن سوڭىندا فورۋم قاتىسۋشىلارىنىڭ ۇندەۋى جاريالاندى.
