سۋرەتتى تۇسىرگەن ەرلان ومار, «EQ»
ءىس-شارا «وتان انا» مونۋمەنتىنە گۇل شوقتارىن قويۋدان باستالدى. سالتاناتتى ءراسىمدى قارۋلى كۇشتەردىڭ ارداگەرلەرى, گارنيزون اسكەري قىزمەتشىلەرى, «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى, اسكەرگە شاقىرىلۋشىلاردىڭ تۋعان-تۋىستارى تاماشالادى.
كوكتەمدە اسكەر ساپىن تولىقتىرعان جاستار انت قابىلداعان ساتتەن باستاپ قارۋلى كۇشتەر قاتارىنا قوسىلادى. اسكەري انت بەرۋ ءراسىمى – ءاربىر جاس ورەننىڭ ومىرىندەگى ماڭىزدى وقيعا. ءدال وسى كەزدەن باستاپ جاس جاۋىنگەرلەر وتانىمىزدىڭ ناعىز قورعاۋشىسىنا اينالادى. مىنە, كەزەكتى تولقىنعا دا بۇل كۇننەن باستاپ وتاندى قورعاۋ دەگەن قۇرمەتتى ميسسيا جۇكتەلدى.
بۇعان دەيىن اسكەرگە كەلگەن جاستاردىڭ ءبارى جاس جاۋىنگەر كۋرسىنان ابىرويمەن ءوتىپ, ءبىر اي ىشىندە اسكەري ءىستىڭ نەگىزدەرىن يگەرگەن بولاتىن. ولار جالپىاسكەري جارعىلاردى وقىپ, ساپتىق, اتىس جانە دەنە شىنىقتىرۋ دايىندىعىمەن اينالىستى. اسكەري ءبولىم كومانديرى, پودپولكوۆنيك اباي الىبەكوۆ جاس جاۋىنگەرلەردى ايتۋلى وقيعامەن قۇتتىقتادى. وفيتسەر ولارعا انتقا ادال بولىپ, اسكەري قىزمەتتىڭ مىندەتتەرىنە جاۋاپكەرشىلىكپەن قاراۋ كەرەك ەكەندىگىن باسا ايتتى.
«بۇگىن سەندەر ءومىردىڭ جاڭا كەزەڭىنە قادام باستىڭدار. اسكەر – ءار جىگىت وتەتىن ءومىر مەكتەبى. اسكەري قىزمەت سەندەردى شىنىقتىرىپ قانا قويمايدى, مۇندا شىڭدالىپ, ءوز قابىلەتتەرىڭە دەگەن سەنىم پايدا بولادى», دەدى قاتارداعى جاۋىنگەر دانيل پاۆلوۆتىڭ اناسى, الماتىلىق ولگا الەكساندروۆنا ساربازدارعا ارناعان تىلەگىندە.
ەلوردالىق بريگادا كومانديرىنىڭ تاربيە جانە يدەولوگيالىق جۇمىس جونىندەگى ورىنباسارى, پودپولكوۆنيك تالعات قۇلمانوۆ اسكەري قىزمەتپەن وتەتىن ءبىر جىل جاس جىگىتتەر ءۇشىن قانداي پايداسى بولاتىنىنا كەڭىنەن توقتالدى. ولار دەنە دايىندىعى تۇرعىسىنان نىعايىپ, ناعىز سارباز اتانادى. سونىمەن قاتار ولار جوو-عا جەڭىلدىكپەن ءتۇسۋ مۇمكىندىگىنە يە بولادى.
الماتى وبلىسىنان شاقىرىلعان قاتارداعى جاۋىنگەر دىنمۇحامەد نۇربولات تا ءوز ويىن ءبىلدىرىپ, وتان قورعاۋ قىزمەتى ولاردىڭ كۇش-جىگەرىن سىناۋعا, اسكەردى قۋاتتى ەتۋگە جانە جاۋىنگەر دوستار تابۋعا تاماشا مۇمكىندىك ەكەنىن اتاپ ءوتتى. ء«بىر ايدا مەن اسكەردىڭ كۇندەلىكتى ومىرىنە ۇيرەندىم, – دەدى ول. – ال اسكەري انت قابىلداعان كۇن ارقاشان ەسىمدە قالارى ءسوزسىز».
بۇل كۇنى «وڭتۇستىك», «شىعىس», «استانا» وڭىرلىك قولباسشىلىقتارىندا قىزمەت وتكەرىپ جاتقان قۇرلىق اسكەرلەرى اسكەري بولىمدەرىنىڭ ءۇش مىڭنان استام ازاماتى اسكەري انت بەردى. جاس جاۋىنگەرلەردىڭ اتا-انالارى كازارما, اسحانا جانە وقۋ سىنىپتارىن ارالاپ كورىپ, ساربازداردىڭ تۇرمىس جاعدايىمەن تانىستى.
سونداي-اق وسى كۇنى اسكەر سالاسىندا تاعى ءبىر سالتاناتتى ءىس-شارا ءوتتى. ول – الماتىدا ۇيىمداستىرىلعان «جاس ۇلان» رەسپۋبليكالىق مەكتەبىنىڭ قىرىق جىلدىق مەرەيتويى. وعان وسى مەكتەپتىڭ تۇلەكتەرى – قورعانىس ءمينيسترىنىڭ ورىنباسارى اسكەر بەيسەنوۆ, اۋماقتىق قورعانىس دەپارتامەنتىنىڭ باستىعى, گەنەرال-مايور سەرىك بورامباەۆ, قورعانىس مينيسترلىگى اپپاراتى باسشىسىنىڭ ورىنباسارى, پولكوۆنيك تولەگەن بولەجانوۆ ارنايى قاتىستى. سونىمەن قاتار شاقىرىلعان قوناقتاردىڭ قاتارىندا قارۋلى كۇشتەردىڭ ارداگەرى, حالىق قاھارمانى, وتستاۆكاداعى گەنەرال-لەيتەنانت باقىتجان ەرتاەۆ, اۋەزوۆ اۋدانىنىڭ اكىمى ابزال ەگەمبەرديەۆ, باۋىرجان مومىش ۇلىنىڭ كەلىنى, ەتنوگراف, جازۋشى زەينەپ احمەتوۆا دا بولدى.
«بۇل مەكتەپتىڭ تاربيەلەنۋشىلەرى مەملەكەتكە قىزمەت ەتۋدىڭ وزىق ءداستۇرىن جانە ءوز وتانىنا ادال بولۋدىڭ ۇلگىسىن كورسەتىپ كەلەدى. ولار ارقاشان شىدامدىلىق, توزىمدىلىك, مورالدىق جانە پسيحولوگيالىق بەرىكتىكپەن, كەز كەلگەن قيىندىقتى جەڭە بىلۋمەن ەرەكشەلەنەدى. بۇل وقۋ ورنىندا مەملەكەتىمىزدىڭ جاۋىنگەرلىك دايىندىعىنىڭ ىرگەتاسى قالانىپ جاتىر», دەپ اتاپ ءوتتى باقىتجان ەرتاەۆ.
ءىس-شارادا اتى اڭىزعا اينالعان قولباسشى باۋىرجان مومىش ۇلىنىڭ ەسكەرتكىشىنە گۇل شوقتارى قويىلىپ, راسىمگە قاتىسۋشىلار اسكەري قاقتىعىستاردا قازا تاپقان مەكتەپ تۇلەكتەرى – پودپولكوۆنيك ەرلان ناۋانوۆتى, پودپولكوۆنيك قايرات مۇحاماديەۆتى, كاپيتان قايرات قۇداباەۆتى ءبىر مينۋت ۇنسىزدىكپەن ەسكە الدى.
