وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ باسشىسى ءابىل جولامانوۆتىڭ ايتۋىنشا, مۇشايراعا «تارتىنباي سويلەر اسىلمىن» تاقىرىبى تاڭدالعان. رەسپۋبليكالىق جازبا اقىندار ءمۇشايراسىنا ەلىمىزدىڭ ءار وڭىرىنەن 18-40 جاس ارالىعىنداعى 19 اقىن قاتىستى.
– ءمۇشايرانى وتكىزۋدەگى ماقسات – ماحامبەتتىڭ اقىندىق قۋاتىن ولەڭدەرى ارقىلى ناسيحاتتاپ, جاستاردى بابادان مۇراعا قالعان شەشەندىك ونەرگە باۋلۋدى كوزدەدىك. جاس اقىندار وسىنداي مۇشايراعا قاتىسىپ, شىعارماشىلىق شەبەرلىگىن شىڭدايدى. كەيىنگى بۋىننىڭ قازىرگى قازاق پوەزياسىنا دەگەن قۇشتارلىعىن وياتىپ, رۋحاني تاربيەسىن جەتىلدىرگەنىن قالادىق, – دەيدى ءابىل جولامانوۆ.
سايىستا اقىندار الدىمەن ءوز ولەڭىن وقىدى. سودان سوڭ ماحامبەت شىعارمالارىنان ءۇزىندىنى جاتقا ايتتى. سوڭىندا 8-10 مينۋتتا ولەڭ جازىپ, سۋىرىپسالمالىق قابىلەتىن تانىتتى.
– اقىندارعا وتە كۇردەلى تالاپ قويىلدى. ونىڭ قاتارىندا ءسوز تاپقىرلىعى, ولەڭ ماعىناسىنىڭ تەرەڭدىگى, شۋماق ۇيقاسىنىڭ كۇردەلىلىگى, ادەبي تەڭەۋ, ەپيتەت, مەتافورا, كوركەم ءماتىننىڭ ورىندالۋ شەبەرلىگى بار. مۇشايراعا قاتىسۋشىنىڭ داۋىس مانەرى مەن ءتىل تازالىعىنا, ساحنا مادەنيەتىنە نازار اۋدارىلدى, – دەيدى جازۋشىلار وداعىنىڭ توراعاسى مەرەكە قۇلكەنوۆ.
قازىلار القىسىنىڭ شەشىمىمەن اتىراۋلىق اقىن اسىلانبەك شىعىروۆ باس جۇلدە جەڭىپ الدى. ال باتىس قازاقستان وبلىسىنان قاتىسقان ادىلەت ورىنباساروۆ ءبىرىنشى ورىندى, پاۆلودارلىق جارقىن ءابۋ ەكىنشى ورىندى, ماڭعىستاۋلىق جۇماگۇل مۇرسال ءۇشىنشى ورىندى يەلەندى. وزگە قاتىسۋشىلارعا بەلگىلى قالامگەرلەر ح.ەرعاليەۆ, ءا.سارسەنباەۆ, م.ساتىبالديەۆ, ج.ناجىمەدەنوۆ, ف.وڭعارسىنوۆا, ا.ەرشۋوۆ, م.وتاراليەۆ, ن.اجىعاليەۆ, ت.دوسىموۆ, د.جازىقباەۆ, م.نەتاليەۆ, ق.ساعيەۆ, ا.وتەگەنوۆ, ق.ورازوۆ, ك.نابيەۆا اتىنداعى ارنايى جۇلدە بەرىلدى.
اتىراۋ وبلىسى
