پرەزيدەنت ءبىلىم بەرۋ, عىلىمي-زەرتتەۋ جۇمىستارىمەن جانە جوعارى وقۋ ورنىن ودان ءارى دامىتۋ ستراتەگياسىمەن تانىستى.
قازىر ۋنيۆەرسيتەتتە 6 مىڭنان استام ستۋدەنت وقيدى. ۋنيۆەرسيتەت بازاسىندا جاڭا وقۋ-زەرتحانا كورپۋسى ىسكە قوسىلعان. وندا ستۋدەنتتەر مەن وقىتۋشىلاردىڭ ءتۇرلى تاجىريبەلەر جانە عىلىمي زەرتتەۋلەر جۇرگىزۋىنە بارىنشا جاعداي جاسالعان.
پرەزيدەنت ۇشقىشسىز باسقارىلاتىن ۇشۋ اپپاراتتارىنا ارنالعان لابوراتوريانى دا ارالاپ كوردى. وندا ستۋدەنتتەر گيس-تەحنولوگيا ارقىلى جەردى قاشىقتان زوندتاۋ دەرەكتەرىنە تالداۋ جاساۋدى ۇيرەنەدى.
بۇدان بولەك, قاسىم-جومارت توقاەۆقا كونفيگۋراتسياسى كۇردەلى دەتالدار الۋ جونىندەگى يننوۆاتسيالىق ادىستەر, سيمۋلياتسيالىق وقىتۋ جانە پراكتيكالىق داعدىلار ورتالىقتارى كورسەتىلدى.
پرەزيدەنت ۋنيۆەرسيتەتتى ارالاۋ بارىسىندا وقىتۋشىلارمەن جانە ستۋدەنتتەرمەن اڭگىمەلەستى.
«مەن بۇل سالاعا ەرەكشە ءمان بەرەمىن. اتالعان ماسەلەلەردىڭ بارىنە باسىمدىق بەرەمىز. سەبەبى ءبىلىم, ءبىلىم مادەنيەتى بولماسا, قازاقستان ءارى قاراي دامي المايدى. جاقىندا ءبىز عىلىم اكادەمياسىنا رەفورما جۇرگىزدىك, وتە تانىمال ءارى پراكتيك عالىمدى پرەزيدەنت ەتىپ تاعايىندادىق. عىلىم جونىندەگى جوعارى كەڭەستىڭ ءبىرىنشى وتىرىسىن وتكىزدىم. تاياۋ ارادا سىزدەر دە عالىمدار مەن تاجىريبەلى مامانداردىڭ قاتارىن تولىقتىرىپ, مەملەكەتىمىزدىڭ دامۋىنا ەلەۋلى ۇلەس قوساسىزدار دەپ سانايمىن. مەن جاستارعا سەنەمىن», دەدى قاسىم-جومارت توقاەۆ.
