سەنات وتىرىسىندا پالاتا توراعاسى ماۋلەن اشىمباەۆ وسى ماسەلەگە توقتالىپ, اتالعان تۇيتكىلگە سالالىق مينيسترلىك باسشىلىعىنىڭ نازارىن اۋداردى.
«كەيبىر وڭىرلەردە توپىراقتىڭ ەرەكشەلىگىنە بايلانىستى نەگىزىنەن تەك كۇرىش وسىرىلەتىنى بەلگىلى. الايدا بيۋروكراتيالىق كەدەرگىلەردى كولدەنەڭ تارتىپ, شارۋالارعا كۇرىش ەگۋگە شەكتەۋ قويا المايتىنىمىز تۇسىنىكتى. ونىمەن ماسەلە شەشىلمەيدى. بۇل جەردە جان-جاقتى ويلاستىرىلعان, پىسىقتالعان كەشەندى جۇمىس قاجەت. قالىپتاسقان جاعدايدى زەرتتەپ, ءوزارا اقىلداسىپ, وسى سالاداعى ساراپشىلارمەن كەڭەسىپ وتىرىپ, شەشىم قابىلداۋ كەرەك. بۇل – ءمينيستردىڭ ءبىر بۇيرىعىمەن شەشىپ تاستايتىن ماسەلە ەمەس», – دەدى ماۋلەن اشىمباەۆ.
سونىمەن قاتار پالاتا توراعاسى وسى پروبلەما سەناتورلاردىڭ ايماقتاردا جەرگىلىكتى تۇرعىندارمەن كەزدەسۋلەرىندە دە جۇيەلى تۇردە كوتەرىلەتىنىن جەتكىزدى. سوندىقتان سەنات وڭىرلەردىڭ مۇددەسىن قورعايتىن پالاتا رەتىندە بۇل باعىتتى ۇنەمى باقىلاۋدا ۇستايدى.
ماۋلەن اشىمباەۆ كوتەرىلگەن تاقىرىپقا سايكەس باسىمدىقتاردى ىسكە اسىرۋ ءۇشىن سەنات ۇكىمەتپەن ىنتىماقتاسا جۇمىس ىستەۋگە دە دايىن ەكەنىن اتاپ ءوتتى. وتىرىس بارىسىندا جاسالعان بارلىق ۇسىنىس وسى ءىس-شارانىڭ قورىتىندىسى بويىنشا ازىرلەنەتىن ۇسىنىمدارعا ەنگىزىلىپ, ۇكىمەتكە جولدانادى.
بۇگىنگى كۇنى ەلىمىزدىڭ وڭتۇستىگىندەگى ديقاندار سۋ تاپشىلىعى ماسەلەسىمەن بەتپە-بەت كەلىپ وتىر. سەنات توراعاسى ماۋلەن اشىمباەۆ پالاتا وتىرىسىندا وسى تۇيتكىلگە نازار اۋداردى. سەنات دەپۋتاتتارى وسى جاعدايعا وراي اۋىل شارۋاشىلىعى ءمينيسترى ەربول قاراشوكەەۆتىڭ سۋارمالى جەرلەردى پايدالانۋ جانە سۋ ۇنەمدەۋ تەحنولوگيالارىن ەنگىزۋ جونىندەگى اقپاراتىن تىڭداعان بولاتىن. جيىن بارىسىندا ماۋلەن اشىمباەۆ تۇركىستان وبلىسىنىڭ تۇرعىندارىن الاڭداتىپ وتىرعان پروبلەمالاردى ايتىپ, سىرداريا ترانسشەكارالىق وزەنىنىڭ جاعدايىنا قاتىستى ماسەلەگە توقتالدى.
سەناتتا جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەستىڭ وتىرىسى ءوتتى. سول جيىندا تۇركىستان وبلىسىنان كەلگەن ارىپتەستەرىمىز جەتىساي, ماقتاارال اۋداندارىنداعى ماسەلەلەردى كوتەردى. نەگىزگى تۇيتكىل – «دوستىق» كانالى ارقىلى كەلەتىن سۋ كولەمىنىڭ ازايۋى. ماسەلەن, كورشى مەملەكەتتەرمەن جاساسقان شارتتارعا سايكەس, ەلىمىزگە سەكۋندىنا 40 تەكشە مەتر سۋ كەلۋى كەرەك. الايدا بۇگىندە ول كورسەتكىش شامامەن 25 تەكشە مەتر كولەمىندە عانا دەگەن اقپارات بار», – دەدى پالاتا سپيكەرى ءوز سوزىندە.
سونىمەن قاتار ماۋلەن اشىمباەۆ ەلىمىزدىڭ وڭتۇستىك وڭىرلەرىندە اۋىل شارۋاشىلىعى ماڭىزدى سالا ەكەنىن, ونى دامىتۋ كورشى مەملەكەتتەردەن كەلەتىن سۋدىڭ كولەمىنە تىعىز بايلانىستى بولىپ وتىرعانىن ايتتى. ماسەلەنىڭ وڭ شەشىلمەۋى ايماقتاعى شارۋالاردىڭ نارازىلىعىن تۋدىرعانىن تىلگە تيەك ەتكەن سەنات توراعاسى ءتيىستى مەملەكەتتىك ورگانداردى وسى سالادا بەلسەندىلىك تانىتۋعا شاقىردى.
