وعان ۇلتتىق ۇلاننىڭ جانە اتالعان ۋنيۆەرسيتەتتىڭ, الماتى قالاسى مەن الماتى وبلىسىنىڭ اسكەري جانە قۇقىق قورعاۋ ورگاندارىنىڭ ءباسپاسوز قىزمەتكەرلەرى قاتىستى. ولاردىڭ اراسىندا اسكەري جۋرناليستيكانى زەرتتەپ جۇرگەن عالىمدار مەن مەديا سالانىڭ مايتالمان ماماندارى دا بار.
دوڭگەلەك ۇستەلگە قاتىسۋشىلار اسكەردەگى اقپاراتتىق جۇمىستى جەتىلدىرۋ جولدارىن جانە جاستاردى پاتريوتتىققا تاربيەلەۋ جونىندەگى ماسەلەلەردى تالقىلادى. جيىندى ۇلتتىق ۇلاننىڭ قىزمەتكەرى, جۋرناليستەر وداعىنىڭ مۇشەسى پولكوۆنيك قۋانىش قوجاحمەتوۆ جۇرگىزدى.
كوپشىلىك الدىندا ءبىرىنشى بولىپ ءسوز سويلەگەن ۇلتتىق ۇلاننىڭ اقپاراتتىق-باسپا ءبولىمىنىڭ باستىعى – «قالقان» گازەتى مەن «بۇركىت» جۋرنالىنىڭ باس رەداكتورى پولكوۆنيك ەربولات سۇلتانوۆ ەلىمىزدىڭ بۇقارالىق اقپارات قۇرالدارى اراسىندا اسكەري جۋرناليستەردىڭ ورنى مەن ءرولىن انىقتاۋ قاجەتتىگىن اتاپ ءوتتى. سودان كەيىن عانا پاتريوتيزمگە تاربيەلەۋ ماسەلەلەرىندە اسكەري جۋرناليستيكانىڭ ماقساتتارى مەن مىندەتتەرىن ناقتىلاۋعا بولاتىنىن جەتكىزدى. سونداي-اق اسكەري قىزمەت كەزىندەگى ساياسي جانە مورالدىق-پسيحولوگيالىق قاسيەتتەردى قالىپتاستىرۋدىڭ وتاندىق جانە شەتەلدىك تاجىريبەسىن تالداۋدى ۇسىندى.
«قازاقستاننىڭ ۇلتتىق ۇلانى مەن قارۋلى كۇشتەرىندە رەسپۋبليكانىڭ اسكەري ءباسپاسوزىنىڭ تۇتاس جۇيەسىن قۇرايتىن گازەتتىڭ دامىعان كوممۋنيكاتيۆتىك كىشى جۇيەلەرى بار. بۇل زاڭدى جاعداي, ويتكەنى مەملەكەت ينستيتۋتىنىڭ مۇنداي كۇردەلى جانە ماڭىزدى بولىگى اقپاراتتىق-كوممۋنيكاتيۆتىك قولداۋسىز, جەكە قۇرامدى تاربيەلەۋ قۇرالدارىنسىز, اسكەرلەردە مەملەكەتتىك يدەولوگيانى جۇرگىزۋسىز دامي المايدى», دەدى پولكوۆنيك ەربولات سۇلتانوۆ.
ونىڭ ايتۋىنشا, قازاقستانداعى اسكەري باسىلىمدار ءبىرتۇتاس جۇيە رەتىندە 1992 جىلدان باستاپ قارقىندى دامىپ كەلەدى. ويتكەنى اسكەري ءباسپاسوز جۇيەسىن ۇيىمداستىرۋ جۇمىستارى ەلىمىزدىڭ قارۋلى كۇشتەرى قۇرىلعان ساتتەن باستاپ تۇراقتى جۇرگىزىلدى.
ماسەلەن, قورعانىس مينيسترلىگى شىعاراتىن «سارباز» گازەتى جانە «ايبىن» جۋرنالى, ۇقك شەكارا قىزمەتى شىعاراتىن «وتان ساقشىسى» گازەتى مەن «شەكاراشى» جۋرنالى, سونداي-اق ۇلتتىق ۇلاننىڭ «قالقان» گازەتى مەن «بۇركىت» جۋرنالى جانە «ۇلتتىق ۇلان جارشىسى» وقۋ-ادىستەمەلىك قۇرالدار جيناعى ءوز وقىرماندارىنا ۇزدىكسىز جەتكىزىلىپ وتىرادى.
دوڭگەلەك ۇستەل بارىسىندا قوعامداعى پاتريوتتىق سەزىمنىڭ قالىپتاسۋى دا ءسوز بولدى. بۇل جايىندا س. وتەباەۆ اتىنداعى اتىراۋ مۇناي جانە گاز ۋنيۆەرسيتەتىنىڭ جاستار ساياساتى مەن الەۋمەتتىك ماسەلەلەر جونىندەگى پرورەكتورى, فيلولوگيا عىلىمىنىڭ كانديداتى, دوتسەنت قانات اۋەسباي ويىمەن ءبولىستى.
«قازاقستان ازاماتتارىن رۋحاني-ادامگەرشىلىككە جانە پاتريوتتىققا تاربيەلەۋدى ىلگەرىلەتەمىز دەسەك, ەڭ الدىمەن قازىرگى ۋاقىتتا ولارعا قارسى جالعاسىپ جاتقان اقپاراتتىق-پسيحولوگيالىق ەكسپانسيانىڭ الدىن الۋىمىز كەرەك», دەدى حالىققا تەلەجۇرگىزۋشى رەتىندە تانىلعان ازامات.
ول وسى ماسەلەنىڭ شەشۋ جولدارى بارىن ايتىپ, ءوزى ازىرلەپ اكەلگەن ۇسىنىستارىن ورتاعا سالدى
«قازاقستاندىق ازاماتتاردىڭ رۋحانياتقا قىزىعۋشىلىعىن وياتىپ, ادامگەرشىلىگى مەن ءپاتريوتيزمىن دامىتۋدا باق-تى ەلەۋلى جانداندىرۋ ماڭىزدى. مىسالى, قازاقستان تاريحى, ونىڭ مادەنيەتى, ەلدىگى, ارمياسى مەن فلوتى بويىنشا جانرى جاعىنان الۋان ءتۇرلى ءارى جاستار اۋديتورياسىنا ارنالعان فيلمدەر مەن بەينەفيلمدەردى, راديوباعدارلامالاردى كورسەتۋدىڭ ۇزاق مەرزىمدى جوسپارلارىن ازىرلەۋ جانە ىسكە اسىرۋدى ۇسىنار ەدىم», دەدى فيلولوگيا عىلىمىنىڭ كانديداتى, دوتسەنت قانات اۋەسباي ۇلى.
بۇدان كەيىن ءسوز تىزگىنى ءال-فارابي اتىنداعى قازۇۋ يۋنەسكو-نىڭ حالىقارالىق جۋرناليستيكا جانە قوعامدىق مەديا كافەدراسىنىڭ پروفەسسورى, تاريح عىلىمدارىنىڭ دوكتورى ءلايلا احمەتوۆاعا بەرىلدى. ول اسكەري جۋرناليستەرگە ارحيۆتىك قۇجاتتار نەگىزىندە پاتريوتتىق سانا قالىپتاستىرۋ تۋرالى باياندادى. ال ءال-فارابي اتىنداعى قازۇۋ يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ دوتسەنتى الەكساندر روجكوۆ اسكەري جۋرناليستەر ازىرلەگەن ماتەريالداردىڭ قوعامعا ىقپالى تۋرالى قىزىقتى بايانداما جاسادى.
سونىمەن قاتار, باسقوسۋدا ءال-فارابي اتىنداعى قازۇۋ يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ اعا وقىتۋشىسى ارمان قۇداباي «ۇرىس قيمىلدارى كەزىندەگى پسيحولوگيالىق وپەراتسيالار جانە اقپاراتتىق سوعىستار» تاقىرىبىندا ءسوز سويلەدى.
دوڭگەلەك ۇستەلدى قورىتىندىلاعان «قالقان» گازەتى مەن «بۇركىت» جۋرنالىنىڭ باس رەداكتورى پولكوۆنيك ەربولات سۇلتانوۆ ءال-فارابي اتىنداعى قازاق ۇلتتىق ۋنيۆەرسيتەتىنىڭ باسشىلىعىنا ۇشكۇندىك وقۋ-ادىستەمەلىك جيىندى ۇيىمداستىرۋداعى بىرلەسكەن جۇمىستارى ءۇشىن العىس ايتتى. سونداي-اق ول ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى گەنەرال-لەيتەنانت ەركىن بوتاقانوۆتىڭ بۇيرىعىمەن ساباق وتكىزۋگە بەلسەندى قاتىسقان, سونداي-اق جەمىستى ىنتىماقتاستىق پەن ادىستەمەلىك كومەك كورسەتكەن بىرقاتار ازاماتتى العىس حاتپەن, گراموتامەن ماراپاتتادى. بۇدان بولەك, ءال-فارابي اتىنداعى قازۇۋ جۋرناليستيكا فاكۋلتەتىنىڭ دەكانى, فيلولوگيا عىلىمدارىنىڭ كانديداتى تەمىرعالي كوپباەۆ پەن يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ مەڭگەرۋشىسى, فيلولوگيا عىلىمدارىنىڭ دوكتورى, پروفەسسور نازگۇل شىڭعىسوۆاعا «قر قۇقىقتىق ءتارتىپ اسكەرىنە 30 جىل» توسبەلگىسىن تابىستادى. ال تاريح عىلىمدارىنىڭ دوكتورى ءلايلا احمەتوۆا, يۋنەسكو-نىڭ جۋرناليستيكا جانە كوممۋنيكاتسيا كافەدراسىنىڭ دوتسەنتى الەكساندر روجكوۆ پەن وسى كافەدرانىڭ وقىتۋشىسى ايمان قايمۋلدينا «ۇلتتىق ۇلان قىزمەتىنىڭ ۇزدىگى» توسبەلگىسىمەن ناگرادتالدى.
ايتا كەتەيىك, بۇل جيىن الماتىدا ءوتىپ جاتقان اسكەري باسىلىمداردا قىزمەت ەتەتىن جۋرناليستەردىڭ وقۋ-ادىستەمەلىك جيىنىن تۇيىندەگەن ءىس-شارا بولدى. سوندىقتان وقۋ-ادىستەمەلىك جيىنداردىڭ قورىتىندىسى بويىنشا اسكەري جۋرناليستەر وقۋدان وتكەنى تۋرالى سەرتيفيكاتتار الدى. وسىلايشا, 24 مامىردا باستالعان اۋقىمدى جيىن ءوز مارەسىنە جەتتى.
