ونىڭ ايتۋىنشا جىل سايىن جاز ايلارىنىڭ باسىندا قالاداعى ورتتەردىڭ سانى بىرنەشە ەسە ارتادى, بۇعان كوبىنەسە تەرەك مامىعى سەبەپ بولادى. وتكەن 2022 جىلعى مامىر جانە ماۋسىم ايلارىندا ەلوردالىق تجد قىزمەتكەرلەرى تەرەك مامىعىن سوندىرۋگە 62 رەت شىقتى.
«كوشەلەر مەن اۋلالار قار سەكىلدى تەرەك مامىعىمەن كومكەرىلىپ قالادى, بۇل ءوز كەزەگىندە ىقتيمال ءورت وشاعىنا اينالادى. كوبىمىز بالالىق شاعىمىزدا تەرەك مامىعىنان جولدار جاساپ, كەيىن ولاردى ورتەپ جىبەرەتىنىمىز ەسىمىزدە. وكىنىشكە قاراي, ادامنىڭ پسيحولوگياسى وزگەرمەيدى جانە قازىرگى ۋاقىتتا دا بالالار وسىلاي ويناپ جاتادى. بىراق ونىڭ قاۋىپتىلىگىن تولىقتاي سەزىنە بەرمەيدى. بالالار عانا ەمەس, ەرەسەكتەر دە تەمەكى تۇقىلىن نەمەسە سىرىڭكەسىن سوندىرمەگەن كۇيى لاقتىرۋ ارقىلى ءورت قاۋپىن تۋدىرادى», دەدى ول.
تەرەك مامىعى ارقىلى وت ۇيلەر مەن باسقا عيماراتتاردىڭ جانعىش ماتەريالدارىنا كوشەدى. اسىرەسە وسى كەزەڭدە اۆتوموبيلدەرگە زيانى ءتيىپ جاتادى, ءتىپتى گاراجدار دا قىزىل جالىنعا ورانادى.
تجد وسى ۋاقىت ارالىعىندا ءورت قاۋىپسىزدىگى تالاپتارىن ەسكە سالىپ ءوتتى.
وسى كەزەڭدە ءورت قاۋىپسىزدىگى ەرەجەلەرىن ساقتاۋ قاجەت. مامىق جينالعان جەرلەردى ۇنەمى تازالاپ وتىرۋ كەرەك, بالالار مەن جاسوسپىرىمدەرگە ونى ورتەۋگە جول بەرمەۋ كەرەك. كاسىپورىندار مەن مەكەمەلەردە تەمەكى شەگۋ رەجيمىنە باقىلاۋ جاساۋ, وت جاعۋعا جانە قوقىستى جاعۋعا قاتاڭ تىيىم سالۋ, دانەكەرلەۋ جۇمىستارىن جۇرگىزۋگە دايىندىقتى مۇقيات جۇرگىزۋ, قوسىمشا ورتكە قارسى نۇسقاۋلىقتار جۇرگىزۋ قاجەت. دەپارتامەنت ەرەسەكتەرگە ەسكەرتەدى, ەگەر ءسىز كوشەدە تەرەك مامىعىمەن ويناعان بالالاردىڭ تەنتەكتىگىن كورسەڭىزدەر – جانىنان ءوتىپ كەتپەڭىزدەر, ءورتتىڭ الدىن الىڭىز. كىشكەنتاي بالالاردىڭ سىرىڭكە مەن وتتىققا قول جەتكىزۋىن شەكتەڭىز.
