توتەنشە جاعداي • 25 مامىر, 2023

ءتىلسىز جاۋ توقتاۋ بەرمەي تۇر

400 رەت

كورسەتىلدى

1 مين

وقۋ ءۇشىن

اباي وبلىسىنىڭ اۋماعىندا ءۇش تاۋلىك بويى ۇزدىكسىز لاپىلداعان قىزىل جالىننىڭ بەتى قايتار ءتۇرى جوق. وزىمىزدەگى جانە كورشىلەس وڭىرلەردەن جەتكەن بارلىق قىزمەت بارىن سالىپ ارپالىسىپ جاتقانىمەن رەسەيدىڭ التاي ولكەسىنەن باستالعان ءورتتىڭ ءوشۋى وڭايعا سوقپاي تۇر. سوعان بايلانىستى كەشە بورودۋليحا اۋدانىندا توتەنشە جاعداي جاريالانۋعا ءتيىس بولاتىن. كەشەگى كۇنگى مالىمەت بويىنشا ءتىلسىز جاۋ «جالماعان» اۋماقتىڭ كولەمى – 3,5 مىڭ گەكتارعا جەتتى. جەرگىلىكتى بيلىك وكىلدەرىنىڭ سوزىنە سەنسەك, ءتىلسىز جاۋمەن ءالى دە ارپالىسۋعا تۋرا كەلەتىن سياقتى. ويتكەنى كۇن رايى بىزگە كومەكتەسپەي تۇر.

ءساتجان قاسىمجان ۇلى

«قازىرگى قولدا بار مالىمەت بويىنشا, ءورتتىڭ ءۇش وشاعىندا جالىن ءسوندىرىلدى. ەندى ول اۋماقتاردا جاعداي الاڭداتارلىقتاي ەمەس. تاڭەرتەڭ تىكۇشاقپەن اۋماقتى تۇگەل شولىپ شىقتىق. بىراق مۇندا جۇمىس ءالى بىرنەشە كۇنگە جالعاساتىن ءتۇرى بار. اۋا رايى دا قولايسىزداۋ بولىپ تۇر. بىقسىپ جاتقان ءورت قالدىقتارى الاڭداۋشىلىق تۋعىزباس ءۇشىن ول وشاقتاردى قايتا-قايتا ءسوندىرىپ الەكپىز. ءتىلسىز جاۋ تولىقتاي وشىرىلگەنشە ءسوندىرۋ جۇمىستارى جالعاسا بەرەدى», دەيدى اباي وبلىسى اكىمىنىڭ ورىنباسارى دميتري گاريكوۆ.

توتەننەن كەلگەن ءتىلسىز جاۋدان قانشا شىعىن كەلگەنى ءالى ەسەپتەلە قويعان جوق. دەگەنمەن ءورتتى وشىرۋگە كەتكەن ماتەريالدىق شىعىن قوردان تولەنەتىنى بەلگىلى بولدى. اپات ايماعىنا جاقىن ماڭداعى بەرەزوۆكا اۋىلىنىڭ 108 تۇرعىنى اپات كەزىندە ۇيلەرىن تاستاپ, باس ساۋعالاپ كەتۋگە ءماجبۇر بولعان. قازىر تۇرعىندار ءوز شاڭىراقتارىنا قايتا ورالا باستادى.

اباي وبلىسى