مەملەكەت باسشىسىنىڭ ايتۋىنشا, ءارى قاراي ينتەگراتسيالىق دامۋدىڭ تاعى ءبىر ماڭىزدى باعىتى – جاڭا حالىقارالىق كولىك ارتەريالارىن قۇرۋ جوسپارلانۋدا.
ء«بىزدىڭ ەكونوميكالىق وداق سايىپ كەلگەندە, ەۋروپا مەن ازيا, جاھاندىق وڭتۇستىك پەن سولتۇستىك اراسىنداعى بايلانىستىرۋشى بۋىنعا اينالارىنا سەنىمدىمىن. ءبىز رەسەي فەدەراتسياسىنىڭ قحر, ءۇندىستان, پاكىستان, يران, تاياۋ شىعىس جانە وڭتۇستىك-شىعىس ازيا ەلدەرى باعىتىندا دالىزدەر قالىپتاستىرۋ نيەتىن قۇپتايمىز. ترانسكاسپي باعىتىمەن ۇشتاستىرا وتىرىپ, سولتۇستىك – وڭتۇستىك كولىك ءدالىزىن دامىتۋ قاجەتتىگى تۋرالى وي ءپىسىپ-جەتىلدى دەپ ويلايمىن», دەدى مەملەكەت باسشىسى.
وسىعان بايلانىستى ق.توقاەۆ قازاقستاننىڭ بارلىق مۇمكىندىكتەرى مەن رەسۋرستارىن جۇمىلدىرىپ, ەاەو-نىڭ سەنىمدى لوگيستيكالىق حابى بولاتىنىن جەتكىزدى.
«تاقىرىپتىق باستاما رەتىندە چەليابى – بولاشاق – يران تەمىرجول ماگيسترالىمەن جۇردەك جۇك پويىزدارىن ىسكە قوسۋدى ۇسىنامىز. بۇل ءۇشىن چەليابينسكىدە جۇك جيناقتايتىن ورتالىق اشىپ, «سولتۇستىك – وڭتۇستىك» كولىك ءدالىزىنىڭ قازىرگى ينفراقۇرىلىمىن پايدالانۋعا بولادى. ءبىز ءوزىمىزدىڭ بەينەۋ – ماڭعىستاۋ تەمىر جول جەلىسىندەگى جانە بەينەۋ – شالقار اۆتوكولىك جولىنداعى تالاپقا ساي كەلمەيتىن ۋچاسكەلەردى قايتا سالۋعا ءازىرمىز. ءتيىستى جۇك تاسىمالى اعىنىن قالىپتاستىرۋ ءۇشىن كۇش جۇمىلدىرۋ ماڭىزدى. سول سەبەپتى قازاقستان مۇنى ءسوزسىز ىسكە اسىرادى. باقتى – اياگوز تەمىر جول قۇرىلىسىن ءوزارا ءتيىمدى ىنتىماقتاستىعىمىزدىڭ ناقتى مىسالى دەۋگە بولادى. ونىڭ ىسكە قوسىلۋى قازاقستاننىڭ دا, رەسەيدىڭ دە قىتاي باعىتىنا جونەلتەتىن جۇك كولەمىن ايتارلىقتاي ارتتىرۋعا مۇمكىندىك بەرەدى», دەدى پرەزيدەنت.
سونىمەن قاتار قاسىم-جومارت توقاەۆ يران مەن تۇرىكمەنستاننىڭ تەڭىز جانە قۇرعاق پورتتارىندا ينفراقۇرىلىم سالۋعا بىرلەسكەن ينۆەستيتسيالار قاراستىرۋعا بولاتىنىن ايتتى. بۇل مۇشە مەملەكەتتەردىڭ ەكسپورت گەوگرافياسىن ەداۋىر كەڭەيتەدى جانە لوگيستيكالىق مۇمكىندىكتەرىن ۇلعايتادى.
«فيزيكالىق ينفراقۇرىلىمدى دامىتۋمەن قاتار تاۋارلار ءترانزيتىنىڭ جالپى تسيفرلىق جۇيەسىن قۇرۋ شەشىمدەرىن ازىرلەۋ وتە ماڭىزدى. ول سەنىمدى, بىراق قولدانۋعا وڭاي جانە وزىق تسيفرلىق تەحنولوگيالارعا نەگىزدەلۋى كەرەك. ەلەكتروندى پلومبالاردى, جەدەل اقپارات الماسۋدىڭ كەپىلدىك جۇيەسىن پايدالانۋ, «ە-تەرەزە» جۇيەسىن دامىتۋ ماسەلەلەرىن شەشۋ قاجەت. بۇل شارالار تاۋار اعىنىن جىلدامداتاتىن جانە جەتكىزۋ تىزبەگىن وڭتايلاندىراتىن ورتاق تسيفرلىق مۋلتيمودالدى ءدالىز قۇرۋعا مۇمكىندىك بەرەدى», دەدى قاسىم-جومارت توقاەۆ.
