«گەوساياسي قيىندىقتار بۇكىل الەمنىڭ ەكونوميكالىق دامۋىنا ايتارلىقتاي ىقپال ەتىپ وتىر. بيىل حالىقارالىق قارجى ينستيتۋتتارى الەمدىك ەكونوميكانىڭ وسىمىنە قاتىستى بولجامدى, ورتاشا ەسەپپەن العاندا, شامامەن ەكى ەسە تومەندەتتى», دەپ ءسوزىن باستادى پرەزيدەنت.
مەملەكەت باسشىسىنىڭ ايتۋىنشا, سىرتقى فاكتورلاردىڭ قىسىمىنا قاراماستان, ەۋرازيالىق ەكونوميكالىق وداق اياسىنداعى ىنتىماقتاستىق قارقىندى دامىپ كەلەدى. وداققا مۇشە مەملەكەتتەر ماكروەكونوميكالىق تۇراقتىلىعىن ساقتاپ, ەكونوميكالىق ءوسىم قارقىنى مەن ءوزارا ساۋدا كولەمىن ارتتىرىپ جاتىر.
«مەن ءوز تاراپىمنان ەاەو قۇرىلعاننان بەرى قازاقستاننىڭ وداققا مۇشە وزگە ەلدەرمەن اراداعى تاۋار اينالىمى 74 پايىزعا ۇلعايعانىن اتاپ وتكىم كەلەدى. وسى ورايدا ەكسپورت 98 پايىزعا ءوستى. بۇل جاقسى كورسەتكىش دەپ سانايمىز», دەدى مەملەكەت باسشىسى وتىرىس بارىسىندا.
