– اتىراۋ وبلىسىنداعى كەزەكتى ءىسساپار ءسىز ءۇشىن نەسىمەن ەرەكشەلەندى؟ كەلگەن ناۋقاستاردىڭ باسىم شاعىمدارى قانداي بولدى؟
– اتىراۋداعى ءىسساپاردىڭ ەرەكشەلىگى - ءبىر كۇندە 46 ناۋقاستى دارىگەرلىك كەڭەسكە قابىلداپ ۇلگەردىم. الدىما كەلگەندەردىڭ باسىم كوپشىلىگى ينسۋلت كوتەرگەن كىسىلەر, جارىعى (گرىجا) بار ناۋقاستار. سونداي-اق پاركينسون جانە ەپيلەپسيامەن اۋىراتىن ناۋقاستار دا بولدى. ولاردى مەديتسينالىق ورتالىق اۋرۋحاناسىنداعى بىلىكتى ماماندارعا باعىتتاپ, قولىمنان كەلگەن كومەكتى بارىنشا بەرۋگە تىرىستىم.
– وڭىردەگى ارىپتەستەرمەن تاجىريبە الماسۋ بارىسىندا ەكى تاراپ ءۇشىن جاڭاشىلدىقتار ورىن الدى ما؟
– ءيا, ءىسساپار بارىسىندا اتىراۋلىق ارىپتەستەر مي قانتامىرلارىنىڭ تارىلۋى بويىنشا بىزبەن بىرگە العاش رەت وپەراتسيا جاسادى. ولارعا وپەراتسيا كەزىندەگى تەحنيكالىق كەمشىلىكتەردى كورسەتتىك. وڭىردەگى دارىگەرلەر ناۋقاستارعا وتا جاساۋ مەن ەم جۇرگىزۋدەگى تىڭ ادىستەردى ۇيرەندى.
– قر پرەزيدەنتى ءىس باسقارماسىنىڭ مەديتسينالىق ورتالىعى جانە اتىراۋ وبلىسى اكىمدىگى اراسىندا ءوزارا ىنتىماقتاستىق تۋرالى مەموراندۋمعا قول قويىلادى عوي, بۇل مەموراندۋم نەگىزىندە قانداي ناتيجەلەرگە قول جەتكىزۋگە بولادى؟
– مەموراندۋم نەگىزىندە اتىراۋ وبلىسىنىڭ اۋرۋحانالارىمەن سەرىكتەس رەتىندە بىرگە جۇمىستار اتقاراتىن بولامىز. ناۋقاستارعا قاتىستى كۇردەلى جاعدايلاردا كاسىبي كەڭەس بەرىپ, ءتىپتى جەرگىلىكتى جەردە وپەراتسيا جاساۋعا مۇمكىندىكتەر ارتادى دەپ وتىرمىز. سونىمەن قاتار ءوڭىردىڭ جاس ماماندارىنا ءبىزدىڭ تاراپىمىزدان ادىستەمەلىك قولداۋ كورسەتىلەدى.
– بۇعان دەيىن بارعان 4 ءوڭىردى قوسقاندا بارلىعى قانشا وپەراتسيا جاساپ, قانشا دارىگەرلىك كەڭەس جۇرگىزدىڭىز؟
– «قازاقستان رەسپۋبليكاسى پرەزيدەنتى ءىس باسقارماسى مەديتسينالىق ورتالىعىنىڭ كۇندەرى» جوباسى اياسىندا اقمولا, شىمكەنت, اقتوبە, شقو ارنايى ءىسساپار باعدارلاماسىمەن بولدىق. بارلىق ءوڭىر بويىنشا ەسەبىن جۇرگىزسەم, 100-دەن اسا ناۋقاسقا كونسۋلتاتسيا جۇرگىزىپ, 20-دان اسا وپەراتسيا جاساعان ەكەنمىن. ونىڭ ىشىندە باسىم بولىگى كۇردەلى وپەراتسيالار بولدى.
