جازدىڭ ىستىق كۇندەرى جاعاجايدا دەمالۋشىلار قاتارى قالىڭ بولادى. سوندىقتان سۋدا قاۋىپسىز دەمالۋ ءۇشىن ءتيىستى ەرەجەلەردى ساقتاۋ قاجەت.
«بۇگىندە ەلوردالىق تجد شومىلۋ ماۋسىمىنىڭ اشىلۋىنا دايىندىقتى بەلسەندى جۇرگىزۋدە. شومىلۋ ماۋسىمى كەزەڭىندە ازاماتتاردىڭ قاۋىپسىزدىگىن قامتاماسىز ەتۋ ماقساتىندا استانا قالاسىنىڭ اكىمى «شومىلۋ ماۋسىمى كەزەڭىندە استانا قالاسى تۇرعىندارىنىڭ قاۋىپسىزدىگىن قامتاماسىز ەتۋ جونىندەگى ءىس-شارالار جوسپارىن» ازىرلەپ, بەكىتتى. اۋدان اكىمدىكتەرىمەن بىرلەسىپ سۋ ايدىندارىندا 10-نان استام اقپاراتتىق ستەند جانە شومىلۋعا تىيىم سالىنعان جەرلەردە 100 تىيىم سالۋ قاۋىپسىزدىك بەلگىسى ورناتىلدى», دەدى سپيكەر.
قۇتقارۋشىلار اكتسيالار, كونكۋرستار, ينتەراكتيۆتى ساباقتار ارقىلى سۋداعى قاۋىپسىزدىك ەرەجەلەرى تۋرالى مەكتەپ وقۋشىلارى مەن بالاباقشا تاربيەلەنۋشىلەرىنە باياندايدى.
بيىل استانادا شومىلۋعا ارنالعان 4 ورىن بەلگىلەندى: ورتالىق جاعاجاي, «تري پەسكاريا» دەمالىس ايماعى, «استانالىق اۋلا» جانە ش.بەيسەكوۆا كوشەسىندەگى كوپىر ماڭىنداعى كوممۋنالدىق جاعاجاي. سۋ ايدىندارىنىڭ رۇقسات ەتىلگەن جانە تىيىم سالىنعان ۋچاسكەلەرىنىڭ تىزبەسى «2gis» پلاتفورماسىندا ورنالاستىرىلعان. سۋداعى قاۋىپسىزدىكتى قامتاماسىز ەتۋ جانە توتەنشە جاعدايلار قاۋپى تونگەن نەمەسە تۋىنداعان كەزدە ءتيىمدى شەشىمدەر قابىلداۋ ماقساتىندا شومىلۋعا تىيىم سالاتىن 21 ۋچاسكەدە قوسىمشا بەينەباقىلاۋ كامەرالارى ورناتىلدى.
«شومىلۋ كەزەڭىندە كۇندەلىكتى پاترۋلدەۋگە 50 سۇڭگۋىر قۇتقارۋشى, 15 بىرلىك سۇڭگۋىرلىك جاراقتارى بار جەدەل-قۇتقارۋ تەحنيكاسى, 6 بىرلىك ءجۇزۋ قۇرالدارى تارتىلاتىن بولادى. شومىلۋ ماۋسىمى جىل سايىن 1 ماۋسىمدا اشىلادى. ارنايى جابدىقتالعان ورىنداردا: جاعاجايلاردا, باسسەيندەردە جانە قۇتقارۋشىلار پاترۋلدەيتىن ورىنداردا شومىلعان دۇرىس», دەپ قوستى ازامات قۇسايىنوۆ.
