ەلدىڭ ۇكىمەت باسشىسى دجوردجا مەلوني G7 سامميتىنەن كەلە سالا ەميليا-رومانيا وڭىرىنە بەت الدى. قازىر تابيعي اپات سالدارىمەن كۇرەسۋگە جۇزدەگەن ەرىكتى جۇمىلدىرىلعان. نوسەر جاۋىن اۋىل شارۋاشىلىعىنا وراسان زور شىعىن كەلتىردى. 40-تان استام قالا زارداپ شەگىپ, 14 ادام قازا تاپتى. قازىر ونداعى 36 مىڭ تۇرعىن قاۋىپسىز جەرگە كوشىرىلدى. كوپ ادام ءىز-ءتۇزسىز جوعالعاندار تىزىمىندە. ەرىكتىلەردىڭ ايتۋىنشا, قازىر سۋ باسقان بىرقاتار ەلدى مەكەن تۇرعىندارى اۋىز سۋ مەن ازىق-ت ۇلىكتەن تارىعىپ وتىر. جويقىن تاسقىن مەن داۋىلدان كەيىن 20-دان استام وزەن ارناسىنان اسقان.
«سۋ تاسقىنى بولعان اۋدانداردى ارالاپ ءجۇرمىن. مەنى ادامداردىڭ تابيعات اپاتىنا مويىماي, سالدارىن جويۋعا كۇش سالىپ جاتقانى تاڭعالدىردى. ءبىز جاپا شەككەن تۇرعىندارعا بارىنشا قولداۋ كورسەتەمىز», دەدى دجوردجا مەلوني.
«The Guardian» باسىلىمىنىڭ حابارلاۋىنشا, ەميليا-رومانيا گۋبەرناتورىنىڭ ورىنباسارى جانە ازاماتتىق قورعانىس بولىمشەسىنىڭ باسشىسى يرەن پريولو ايماقتاعى 100-گە جۋىق مۋنيتسيپاليتەت سۋ تاسقىنىنان زارداپ شەككەنىن, بۇل 2012 جىلى ايماقتا بولعان جويقىن جەر سىلكىنىسىنەن زارداپ شەككەندەردەن ءۇش ەسە كوپ ەكەنىن مالىمدەگەن. راۆەننانىڭ وزىندە نوسەر بىرنەشە كۇن بويى تىنباي, قالا مەرى ماسسيمو يزولا قالانى قورشاپ تۇرعان توبەلەردە ورنالاسقان اۋىلدارداعى اپاتتى جاعداي تۋرالى حابارلادى. كوشكىننىڭ ءجۇرۋ قاۋپى جوعارى, بۇل ايماقتارعا قۇتقارۋشىلاردىڭ جەتۋى وتە قيىن. دەگەنمەن, جۇمىس جالعاسىپ, قۇتقارۋشىلار سۋ تاسقىنىنان زارداپ شەككەندەردى ءالى ەۆاكۋاتسيالاپ جاتىر. يتاليانىڭ سولتۇستىگىندە 36 ساعات بويى جاۋعان تولاسسىز جاۋىننىڭ سالدارىنان جارتى جىلدىق جاۋىن-شاشىن ءتۇسىپ, كەلتىرىلگەن شىعىن ميللياردتاعان ەۋروعا باعالانىپ وتىر.
سۋ تاسقىنىنىڭ سالدارىنان يمولاداعى «فورمۋلا-1» جارىسى توقتاتىلدى. وتكەن جۇما كۇنى «فورمۋلا-1» ۇيىمداستىرۋشىلارى زارداپ شەككەن ايماقتاردى قالپىنا كەلتىرۋگە كومەكتەسۋ ءۇشىن ءبىر ميلليون ەۋرو بەرەتىندەرىن ايتتى. بۇعان دەيىن «فەرراري» كومانداسى دا وسىنداي ۋادە بەرگەن ەدى.
شەتەلدىك عالىمداردىڭ پايىمداۋىنشا, اۋا رايىنىڭ ىستىق تولقىنى, قاتتى داۋىل, سۋ تاسقىنى جانە قۇرعاقشىلىق سياقتى ەكسترەمالدى قۇبىلىستار ادامداردىڭ پارنيكتىك گازدار شىعارىندىلارىنان تۋىنداعان كليماتتىڭ وزگەرۋىنە بايلانىستى ءجيى جانە قارقىندى بولىپ كەلەدى.
يتاليا پرەمەر-ءمينيسترى دجوردجا مەلوني حيروسيماداعى G7 ءسامميتىنىڭ اياعىنا دەيىن قاتىسا المادى, الدىن الا جوسپارلانعان قازاقستانعا ساپارىنان دا باس تارتتى. ول سۋ تاسقىنى سالدارىنان جاريالانعان توتەنشە جاعداي كەزىندە ەلىنە ورالىپ, حالقىمەن بىرگە بولۋدى ۇيعاردى.
«ەميليا-رومانيا ايماعىندا بولعان جويقىن سۋ تاسقىنى سالدارىنان كوپتەگەن ادامنىڭ قازا تابۋىنا بايلانىستى يتاليا پرەمەر-ءمينيسترى دجوردجا مەلوني تابيعات اپاتىنان زارداپ شەككەن وڭىرلەرگە بارۋ ءۇشىن حيروسيمادا وتكەن G7 ءسامميتىنىڭ سوڭىنا دەيىن قاتىسپاي, ەلىنە قايتىپ باردى. كەلىپ تۇسكەن مالىمەت بويىنشا يتاليانىڭ سولتۇستىگىندە كەم دەگەندە 40-تان استام ەلدى مەكەن سۋ استىندا قالىپ, 20 مىڭنان استام ادام باسپاناسىنان ايىرىلدى. وسى سەبەپكە بايلانىستى يتاليا ۇكىمەتى باسشىسىنىڭ استاناعا الدىن الا جوسپارلانعان جۇمىس ساپارى بولمايدى», دەپ مالىمدەدى قازاقستان پرەزيدەنتىنىڭ ءباسپاسوز حاتشىسى رۋسلان جەلدىباي.
ول يتاليا تاراپىنىڭ پرەزيدەنت قاسىم-جومارت توقاەۆ پەن دجوردجا مەلونيدىڭ تەلەفون ارقىلى سويلەسۋىن ۇيىمداستىرۋدى سۇراعانىن اتاپ ءوتتى.
«Legambiente» ەكولوگيالىق ۇيىمىنىڭ مالىمەتىنشە, 7 ميلليونعا جۋىق يتاليالىق سۋ تاسقىنى قاۋپى بار ايماقتاردا تۇرادى. 2014 جىلى سول كەزدەگى پرەمەر-مينيستر ماتتەو رەنتسي «Italia sacra» – «قاۋىپسىز يتاليا» جەدەل توبىن قۇردى, ونىڭ مىندەتى سۋ تاسقىنى مەن كوشكىننىڭ الدىن الۋ ەدى. الايدا 2018 جىلى دجۋزەپپە كونتە ۇكىمەتى بۇل توپتى تاراتىپ, ءوز جوباسىن ۇسىندى.
