الماتىنىڭ «قايراتى» ورتالىق ستاديوندا قىزىلوردانىڭ «قايسارىن» قابىلدادى. 10-مينۋتتا جواو پەدرو وليۆەيرا ەسەپ اشسا, 24-مينۋتتا دميتري بورودين 11 مەترلىك نۇكتەدەن نىسانانى ءدال كوزدەدى. ءبىرىنشى تايم اياقتالار تۇستا تورەشى الماتىلىقتاردىڭ قاقپاسىنا تاعى ءبىر پەنالتي بەلگىلەدى. بۇل جولى دا بورودين ءمۇلت كەتكەن جوق. ەسەپ – 0:3. ودان كەيىن ەكى كوماندا ويىنشىلارى قانشا جانتالاسقانىمەن, تابلوداعى ەسەپ وزگەرمەدى.
قوستانايدىڭ «توبىلى» ءوز الاڭىندا «ماقتاارالدى» ۇتتى – 1:0. بۇل كەزدەسۋدەگى جالعىز گولدى 69-مينۋتتا يسلام چەسنوكوۆ سوقتى. شىمكەنتتىڭ «ورداباسىسى» مەن كوكشەتاۋدىڭ «وقجەتپەسى» اراسىنداعى ماتچ تا ءدال سونداي ەسەپپەن اياقتالدى – 1:0. بۇل باسەكەنىڭ تاعدىرىن 32-مينۋتتا برازيليالىق لەگيونەر اۋرو سالعان دوپ شەشتى. ال «اقتوبە» مەن اقتاۋدىڭ «كاسپيى» اراسىنداعى ويىندا ەسەپ اشىلعان جوق – 0:0.
جارىس كەستەسىندە 11 كەزدەسۋدەن كەيىن 25 ۇپاي جيعان «استانا» كوش باستاپ كەلەدى. سوڭعى تۋرداعى جەڭىسىنەن كەيىن «ورداباسى» ەكىنشى ورىنعا كوتەرىلدى. شىمكەنتتىكتەردىڭ قورجىنىندا 23 ۇپاي بار. ءۇشىنشى ورىندا – 22 ۇپايدى ەنشىلەگەن «قىزىلجار».
