مەملەكەت باسشىسىنىڭ تاپسىرماسىنا سايكەس 2025 جىلدىڭ سوڭىنا دەيىن حالىقتى ساپالى اۋىز سۋمەن 100% قامتاماسىز ەتۋ جوسپارلانىپ وتىر.
بۇگىنگى تاڭدا اۋىز سۋعا قولجەتىمدىلىك قالالاردا – 98,4%-دى, اۋىلداردا – 94,5%-دى قۇراپ وتىر.
ەڭ از قامتۋ اباي, اقمولا جانە جامبىل وبلىستارىنىڭ قالالارىندا, سونداي-اق اقمولا, قوستاناي جانە سولتۇستىك قازاقستان وبلىستارىنىڭ اۋىلدارىندا تىركەلگەن.
بيىل سۋمەن جابدىقتاۋ, سۋ بۇرۋ جۇيەلەرىن سالۋ جانە رەكونسترۋكتسيالاۋعا رەسپۋبليكالىق بيۋدجەتتەن 402 جوبانى ىسكە اسىرۋعا 280 ملرد تەڭگە ءبولىندى.
جالپى, 2025 جىلعا دەيىن قالعان 25 قالا مەن 1 395 اۋىلدىڭ حالقىن تازا اۋىز سۋمەن قامتاماسىز ەتۋ قاجەت.
پرەمەر-مينيستر مامىر ايىنىڭ باسىندا ۇكىمەت وتىرىسىندا اۋىز سۋ جوبالارى بويىنشا «اياقتالماعان قۇرىلىستار» تۋرالى ايتىلعانىن ەسكە سالدى. ولاردى اياقتايمىز دەگەنشە, قولدانىستاعى ينفراقۇرىلىمدار جارامسىز بولىپ قالۋدا.
«اقتوبە قالاسىنداعى قارعالى شاعىن اۋدانىنىڭ تۇرعىندارى سۋىق سۋ مەن ىستىق سۋدىڭ ءجيى توقتاپ قالاتىنىنا شاعىم ايتۋدا. اقمولا وبلىسىنىڭ ەگىندىكول اۋدانىندا ابدەن توزىعى جەتكەن نۇرا سۋ وتكىزگىشى جالعىز ءوزى 12 اۋىلدى سۋمەن قامتاماسىز ەتىپ وتىر. ونداعى سۋدىڭ شىعىنى 70-80%-عا جەتەدى. بۇل اۋىلداردىڭ تۇرعىندارى قۇبىرلاردىڭ ءجيى جارىلۋىنان ايلار بويى سۋسىز قالادى», دەدى ءاليحان سمايىلوۆ.
بۇلار بيىل حالىقتان رەسمي تۇردە كەلىپ تۇسكەن 9 مىڭ شاعىمنىڭ بىرنەشە مىسالى عانا.
ول مۇنداي كەمشىلىكتەر تەك بۇگىن ايتىلعان وڭىرلەرگە عانا ەمەس, كوپتەگەن اكىمدىكتەرگە ءتان ەكەنىن ايتتى.
«Cۋ ماسەلەسىنىڭ ۇلكەن الەۋمەتتىك ماڭىزدىلىعىن ەسكەرە وتىرىپ, ءاربىر ءوڭىر, اسىرەسە ەڭ تومەن كورسەتكىشتەرى بار وبلىستار جۇمىستى جانداندىرۋى كەرەك. يندۋستريا مينيسترلىگى باقىلاۋدى بارىنشا كۇشەيتۋى ءتيىس», دەدى ءا.سمايىلوۆ.
