ءىس-شارانىڭ اشىلۋ سالتاناتىنا استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, سپورتتى دامىتۋ ديرەكتسياسى ديرەكتورىنىڭ ورىنباسارى, جازعى سپارتاكيادانىڭ باس تورەشىسى ازامات يماشەۆ جانە قالالىق كوركەم گيمناستيكا فەدەراتسياسىنىڭ پرەزيدەنتى سايرانبەك ءابىلحايىر قاتىستى.
كوپشىلىكتى كوركەم گيمناستيكادان قر-نىڭ VI جازعى سپارتاكيادانىڭ باستالۋىمەن قالالىق سپورت باسقارماسىنىڭ باسشىسى سامات جىلقىباەۆ قۇتتىقتاپ, سالتاناتتى تۇردە اشتى.
«وسىنداي ءىس-شارانىڭ كەرەمەت سپورت كەشەنىندە ءوتىپ جاتقانى كوڭىل قۋانتادى. جازعى سپارتاكيادا ارقىلى سىزدەرگە الداعى ۋاقىتتا ازيا, الەم چەمپيوناتتارىندا ونەر كورسەتۋگە مۇمكىندىك الاسىزدار دەگەن سەنىمدەمىن. قازىرگى تاڭدا گيمناستيكا سپورت ءتۇرى ەلىمىزدە قارقىندى دامىپ, سپورتشىلارىمىز دا كوپتەگەن جەتىستىكتەرىمەن ەل سپورتىنىڭ تاريحىندا ەسىمدەرىن قالدىرىپ ۇلگەردى. سپورتشىلاردىڭ جارقىن جەڭىسى – قاشاندا ەل بەدەلى. بارلىقتارىڭىزعا ساتتىلىك!», دەدى قالالىق سپورت باسقارماسىنىڭ باسشىسى سامات جىلقىباەۆ.
اراعا 4 جىل سالىپ, كەشەندى جارىسقا بۇل جولى جەكەلەي سىندا ەلىمىزدىڭ ءار وڭىرىنەن 54 گيمناست كەلدى. ال توپتىق جاتتىعۋدا 12 كوماندا باق سىناپ جاتىر. بۇل قاتاردا ەلجان تانيەۆا, ەريكا جايلاۋوۆا, ميلانا پارفيلوۆا سىندى حالىقارالىق باسەكەلەردە ەل نامىسىن قورعاپ جۇرگەن سپورتشىلار بار.
سونداي-اق سپارتاكيادانىڭ اشىلۋ سالتاناتى بارىسىندا قر حالىقارالىق دارەجەدەگى سپورت شەبەرى اتاعىمەن جاسمين جۇنىسباەۆا, ايىم مەيراجوۆا, ايسۇلۋ مۋرزاگاليەۆا, ميلانا پارفيلوۆا, دينا مىرزاباەۆا, انەل گۇلماگانبەتوۆا, ايزەرە كەڭەس, ديانا مەڭدىباەۆا, كريستينا چەپۋلسكايا ماراپاتتالدى.
ايتۋلى باسەكەنىڭ العاشقى كۇنى لەنتا جانە ۇرشىقپەن ونەر كورسەتكەن جۇلدەگەرلەر بۇگىن كەشكە انىقتالادى.
ايتا كەتەيىك, جاس گيمناسشىلار سايىسى مامىردىڭ 19-نا دەيىن وتەدى.
