ۇلتىمىزدىڭ قۇندىلىقتارىن لايىقتى دارىپتەي ءبىلۋدىڭ ءبىر كورىنىسى رەتىندە ءبىزدىڭ وبلىستىق بالالار جانە جاسوسپىرىمدەر كىتاپحاناسىندا «ساق – ەتنومادەني ورتالىعى» اشىلدى. بۇل ورتالىق تۇركى حالىقتارىنىڭ تاريحىنان, ونىڭ ءبىر تارماعى بولىپ كەلەتىن قازاق حالقىنىڭ ويىندارىنان, مادەنيەتىنەن, ونەرىنەن حابار بەرىپ, بالالاردى ۇلتتىق سالت-داستۇرگە سۋسىنداتپاق. تەك قانا ۇلتتىق ويىندارمەن شەكتەلمەي, تانىم كوكجيەگىن كەڭەيتەتىن كىتاپتار ناسيحاتتالىپ, ءارتۇرلى پىكىرتالاستار ۇيىمداستىرىلادى, عىلىمي جوبالار جاسالادى.
جاڭا ورتالىقتىڭ تۇساۋكەسەر راسىمىنە زيالى قاۋىم وكىلدەرى كەلىپ, جىلى لەبىزدەرىن ءبىلدىردى. سونداي-اق شەجىرەشى, قولونەر شەبەرى دۇيسەن شوكەن ۇلى ءوزى جاساعان زاتتاردى كورمەگە اكەلىپ, قامشى ءورۋ, ەرتوقىم, كيىزۇيدىڭ جاسالۋ جولدارىن كورسەتتى.
«قوڭىر: ءۇن, ءتىل, ءدىل» اتتى ينستاللياتسيالىق كورمە ارقىلى قاتىسۋشىلار قازاق حالقىنىڭ باعزى زامانداعى سىر مەن مۇڭعا تولى اۋەزدەرىن تىڭداپ, انشىلەر مەن كۇيشىلەر تۋرالى تولىق ماعلۇمات الدى.
ورتالىقتى اشۋداعى ماقسات – جاس وسكىندەردى حالقىمىزدىڭ سالت-داستۇرىمەن, ءنارلى تاعامدارىمەن, ورالىمدى ويعا باي ماقال-ماتەلدەرىمەن تانىستىرۋ, ساداق اتۋ, لاڭگى تەبۋ, اسىق اتۋ سىندى ويىنداردى قۇمارى قانعانشا ويناتۋ. سونىمەن قاتار «ساق ەتنومادەني ورتالىعى» قازاق حالقىنىڭ عانا ەمەس, باۋىرلاس تۇركى حالىقتارىنىڭ تىنىس-تىرشىلىگى مەن سالت-داستۇرىنەن مول ماعلۇمات بەرەدى.
كىتاپحانامىزدا اشىلىپ جاتقان ورتالىق قوعامدا بالا تاربيەسىنە قاتىستى ولقىلىقتاردىڭ ورنىن تولتىرىپ قانا قويماي, جاس جەتكىنشەكتەرگە رۋحاني ازىق بەرەدى دەگەن ويدامىز. ورتالىقتىڭ جۇمىسى 16 مامىر ايىنان باستاپ ۇزدىكسىز جۇمىس ىستەي باستادى.
روزا بەكەجانقىزى,
شىعىس قازاقستان وبلىستىق بالالار جانە جاسوسپىرىمدەر كىتاپحاناسىنىڭ قىزمەتكەرى
