كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى اندرەي لۋكين العىسوزىندە مەملەكەت باسشىسى قاسىم-جومارت توقاەۆ ادام قۇقىقتارىن قورعاۋدى كۇشەيتۋگە ەرەكشە كوڭىل ءبولىپ وتىرعانىن اتاپ ءوتتى.
«قىلمىستىق پروتسەستىڭ قۋعىن-سۇرگىنىن تومەندەتۋگە جانە ونىڭ باسەكەگە قابىلەتتىلىگىن ارتتىرۋعا باعىتتالعان قۇقىق قورعاۋ قىزمەتىن جاڭعىرتۋ – ادۆوكاتتىق قىزمەتتىڭ ساپاسىن جانە تۇتاستاي العاندا ازاماتتارعا زاڭگەرلىك كومەك كورسەتۋ جۇيەسىن جاقسارتۋدى تالاپ ەتەدى. بىلىكتى زاڭگەرلىك كومەك قازىرگى ازاماتتىق قوعامنىڭ ماڭىزدى قۇرامداس بولىكتەرىنىڭ ءبىرى, وعان بىلىكتى زاڭگەرلەردىڭ قىزمەتى دالەل. بۇل قۇقىقتى جۇزەگە اسىرۋ تەتىكتەرىن ءالى دە جەتىلدىرۋ قاجەت», دەدى سەناتور لۋكين.
ءوز كەزەگىندە ادىلەت ءمينيسترىنىڭ ورىنباسارى بەكبولات مولدابەكوۆ پارلامەنتشىلەرگە ازاماتتاردىڭ قۇقىقتارىن قورعاۋ ينستيتۋتىنىڭ دامۋى تۋرالى ايتىپ بەردى. اتاپ ايتقاندا, ءمينيستردىڭ ورىنباسارى قاعاز اينالىمىنىڭ دەڭگەيىن ايتارلىقتاي تومەندەتۋگە جانە ازاماتتاردىڭ زاڭ قىزمەتتەرىن الۋىن جەڭىلدەتۋگە باعىتتالعان تسيفرلىق قوسىمشالاردىڭ جۇمىسى تۋرالى حاباردار ەتتى.
جيىن بارىسىندا اۋىل-ايماقتاعى زاڭگەرلەردىڭ جەتىسپەۋشىلىگى دە ءسوز بولدى. ماسەلەن, ىشكى ىستەر مينيسترلىگىنىڭ اقپاراتىنا سايكەس, ەلىمىزدىڭ كەيبىر وڭىرلەرىندە ادۆوكاتتاردىڭ جەتىسپەۋشىلىگى ايتارلىقتاي بايقالادى. ماسەلەن, قىزىلوردا وبلىسى بويىنشا جالاعاش اۋدانىندا نەبارى 2 ادۆوكات تىركەلگەن, بۇل تەرگەۋ ارەكەتتەرىن جۇرگىزۋدى قيىنداتىپ وتىر.
دوڭگەلەك ۇستەل جۇمىسىنا پارلامەنتاريزم ينستيتۋتىنىڭ, رەسپۋبليكالىق ادۆوكاتتار القالارىنىڭ وكىلدەرى مەن زاڭ كونسۋلتانتتارى دا قاتىسىپ, باياندامالار جاسادى.
وتىرىس قورىتىندىسى بويىنشا سەناتورلار ۇسىنىمدار ازىرلەدى, ولار مۇددەلى مەملەكەتتىك ورگاندارعا جولدانادى.
