- نارەستەنىڭ بەتىنە اي ساۋلەسىن تۇسىرمەيدى. اي ساۋلەسى بەتىنە تۇسسە, ول اۋرۋعا شالدىعادى.
- جاڭا تۋعان بالانىڭ كىندىگى قاتقانشا, كۇن باتقاننان كەيىن ۇيدەن كۇل شىعارمايدى. ەگەر كۇل شىعارىلسا, نارەستەىڭ دەنساۋلىعى ناشارلايدى.
- بالا قىرقىنان شىققانشا, تۇندە الىپ جۇرمەيدى. نارەستەنىڭ بەتىنە اي ساۋلەسى ءتۇسۋى مۇمكىن.
- بەيۋاقىتتا بالانىڭ كيىمىن دالاعا جايمايدى.
- بالانى وجاۋمەن ۇرسا, ىرىس-نەسىبە كەتەدى.
- بالانى سىپىرعىشپەن ۇرمايدى. سىپىرعى تيگەن بالا جامانشىلىققا ۇشىرايدى.
- بالاعا ۇلكەن ادامنىڭ الدىن كەسىپ وتۋگە, ۇلكەندەردىڭ سوزىنە ارالاسۋعا بولمايدى. بۇل - ادەپسىزدىكتىڭ بەلگىسى.
- قىزداردىڭ ۇلداردى تەبۋىنە بولمايدى. بۇل كەلەڭسىزدىك بولىپ ەسەپتەلەدى.
- دۇنيەگە كەلگەن نارەستەنىڭ كىندىگىن اق بالتامەن كەسىپ, تازا جىپپەن بايلايدى دا, تۇبىنە كۇل سەبەدى. اق بالتانى وزگە نارسەگە پايدالانباي, ساقتاپ قويادى. ەر بالانىڭ كىندىگىن ۇيكۇشىك بولماسىن دەپ, قىردان اسىرىپ لاقتىرادى. ال قىز بالانىڭ كىندىگىن ءۇيدىڭ قۇتى بولسىن دەگەن ىرىممەن وشاق تۇبىنە كومەدى.
- جاڭا تۋعان ءسابيدى ەمىزبەستەن بۇرىن تازا سۋعا مالىنعان قاسقىردىڭ جۇنىمەن اۋىزداندىرادى. ەرتە كەزدە قاسقىر كيەلى سانالعان, سوندىقتان دا بۇل ىرىم بالا قاسقىرداي قايراتتى دا قاجىرلى بولسىن دەگەن نيەتتەن تۋىنداعان.
- نارەستەنىڭ ۇيقىسى تىنىش بولۋى ءۇشىن جانە جىن-شايتاندى قۋ ماقساتىمەن ادىراسپاندى وتقا جاعىپ تۇتەتىپ, بالانى بولەردەن بۇرىن بەسىگىن اينالدىرىپ, الاستاپ شىعادى. بالا بولەنگەن بەسىكتىڭ ۇستىنە جەتى نارسە (شاپان, كەبەنەك, تون, جابۋ, جۇگەن, قامشى جانە بەسىك كورپە) جابادى.
- كەبەنەك پەن قامشى ەل قورعايتىن ەر بولسىن دەگەندى بىلدىرەدى.
- ۇل بالانى قىرىق كۇنگە جەتكىزبەي, 37-39 كۇندە, ال قىز بالانى قىرىق كۇننەن اسىرىپ, 42-44 كۇندە قىرقىنان شىعارادى. بۇل ۇل بالانىڭ قالىڭدىعىنا تولەيتىن قالىڭ مالى از بولسىن دەگەن ىرىم.
- ءسابي شالقاسىنان جاتىپ, الاڭسىز ۇيىقتاسا, ەلگە بەلگىلى ازامات بولىپ وسەدى, بۇك ءتۇسىپ جاتسا, ۋايىمشىل نەمەسە جىگەرسىز بولىپ شىعادى, ال ەتپەتىنەن جاتىپ ۇيىقتاسا, ويشىل بولادى, ەگەر اياق-قولىن ەركىن سوزىپ ۇيىقتسا, بولاشاق باتىر, كەمەڭگەر بولادى دەپ ىرىمداعان.
- قىز بالاعا شاشى ۇزىن بولىپ ءوسسىن دەپ جەلكە جەگىزەدى.
- بالانىڭ جەلكەسى شۇقىر بولسا نەمەسە جەلكەسىنەن سۇيسە, قىرسىق بولىپ وسەدى دەپ ىرىمداعان.
- بالانىڭ ورايى ەكەۋ بولسا, ەكى رەت ۇيلەنەدى نەمەسە قىزدىڭ ورايى ەكەۋ بولسا, ەكىنشى رەت تۇرمىسقا شىعادى دەپ ىرىمدايدى.
- شوبەرەسىنىڭ الاقانىنان سۋ ىشكەن قارت جۇماققا بارادى دەگەن ىرىم بار.
