ەر ادامدىڭ ايتۋىنشا, ونى قايىر سۇراۋعا ماجبۇرلەگەن. ول بىرنەشە رەت قاشۋعا ارەكەتتەندى, بىراق ناتيجەسىز بولعان.
«ولار مەنى ۇرىپ-سوعىپ, جاق پەن قابىرعامدى سىندىردى. كەيىن مەنى باسقالارعا ساتتى. اربا ساتىپ الىپ, سوعان وتىرعىزدى. بازارعا, ادام كوپ جينالاتىن جەرگە اپاراتىن. كۇنىنە 30-35 مىڭ تاباتىنمىن. اقشانى وزدەرىنە الىپ قوياتىن. ءبىر كۇنى ەكى جاس قىز ماعان كەلىپ ازىق-ت ۇلىك ۇسىندى. مەن ولاردان «جاقىن جەردە وڭالتۋ ورتالىعى بار ما؟» دەپ سۇراپ قۇلدىقتا جۇرگەنىمدى قىسقاشا ءتۇسىندىردىم. كەلەسى كۇنى ەرىكتىلەر كەلىپ, مەنى سول جەردەن ۇرلاپ كەتتى», دەدى سەرگەي.
«حابار 24» ارناسى حابارلاعانداي, وڭالتۋ ورتالىقتارىندا تەك التى اي تۇرۋعا رۇقسات ەتىلەدى. ال ەڭبەك قۇلدىعىنان زارداپ شەككەندەردىڭ بارلىعىنا ورىن جەتە بەرمەيدى.
جىل باسىنان بەرى ەلىمىزدە ادام ساۋداسى فاكتىلەرى بويىنشا 16 قىلمىستىق ءىس قوزعالعان. ونىڭ ىشىندە 12 قىلمىستىق ءىس جاڭا تۋعان نارەستەلەردىڭ ساۋداسىمەن بايلانىستى بولىپ وتىر. 40 قىلمىستىق توپتىڭ قىزمەتى توقتاتىلدى. قازاقستاندا جىل سايىن وسىنداي 100-گە جۋىق قىلمىس تىركەلەدى. ولاردىڭ كوبىسى سوتقا دەيىن جەتە بەرمەيدى.
