BBC News-كە جەرگىلىكتى تۇرعىنداردان تۇسكەن اقپارات بويىنشا, باتىستاعى راكحاين شتاتىنىڭ استاناسى سيتتۆا قالاسىنىڭ 90%-عا جۋىق اۋماعى قيراعان. بيرمان اسكەرى راكحاين اۋماعىن تۇتاستاي اپات ايماعى دەپ جاريالادى.
جەكسەنبى كۇنى كەشكە تسيكلون اسەرى بانگلادەشتە باسەڭدەدى, ول ايتارلىقتاي زالال اكەلمەسە دە, ەلدە كوشكىن مەن سۋ تاسقىندارى ءالى دە تىركەلىپ جاتىر. بانگلادەشتە زارداپ شەككەندەر تۋرالى ازىرگە اقپارات جوق.
داۋىل ميانماعا قاتتى اسەر ەتىپ, ۇيلەر قيرادى. راكحاين شتاتىندا ەلەكتر تاراتۋ جەلىلەرى ءۇزىلدى. ەلدىڭ مەتەورولوگيا قىزمەتىنىڭ حابارلاۋىنشا, تسيكلون ەل اۋماعىنان ساعاتىنا 209 شاقىرىم جىلدامدىقپەن وتكەن.
جەرگىلىكتى باق اعاشتاردىڭ قۇلاۋى سالدارىنان 14 جاستاعى بالانىڭ قازا تاپقانىن حابارلادى.
ەلەكتر جەلىلەرىن تاراتۋ مەن سىمسىز بايلانىس ميانمانىڭ سيتتۆا قالاسىنىڭ كوپ بولىگىندە بۇزىلدى. ينتەرنەتتە جاريالانعان كادرلاردان ۇيلەردىڭ شاتىرى ۇشىپ, تەلەكوممۋنيكاتسيا باعاندارى قيراعانىن, ال جارناما تاقتالارى نوسەر جاۋىن كەزىندە ج ۇلىنىپ كەتىپ جاتقانىن كورۋگە بولادى. ال, جەرگىلىكتى بيلىك BBC News-كە تسيكلون 1 300-دەن استام باسپانانى, 16 مەشىت پەن وقۋ ورتالىقتارىن قيراتقانىن حابارلادى. لاگەرلەردە اعاشتار قۇلاپ, ەكى رەت كوشكىن بولدى. كەيىنگى دەرەكتەر بويىنشا, ونداعى ادامدار امان.
سينوپتيكتەر موككو تسيكلونى كەيىنگى جيىرما جىلدىقتاعى ەڭ كۇشتى داۋىل بولۋى مۇمكىن ەكەنىن ەسكەرتكەن. تسيكلون باستالماس بۇرىن بانگلادەش بيلىگى 750 مىڭعا جۋىق ادامدى ەۆاكۋاتسيالادى. سونداي-اق جاقىن ماڭداعى اۋەجايلار جابىلدى, بالىقشىلارعا جۇمىسىن توقتاتۋعا بۇيرىق بەرىلدى. قاۋىپ ءتونىپ تۇرعان وڭىرلەردەگى ادامدار ءۇشىن 1 500 باسپانا دايىندالدى.
