«بۇرىنعى كەزدەرمەن سالىستىرعاندا, بۇل ءبىرشاما جاقسى كورسەتكىش. ەندى وسى ءۇردىستى باسەڭدەتپەي بالالاردى وتباسىلارعا ورنالاستىرۋدىڭ جولدارىن دامىتۋ كەرەك. قازىر جەتىم, اتا-انا قامقورلىعىنسىز قالعان بالالاردى وتباسىعا بەرۋدىڭ بىرنەشە فورماسى بار: بالا اسىراپ الۋ; قامقورشىلىق; پاتروناتتىق تاربيە; پاتروناتتىق جانۇيا. ونىڭ قاتارىندا كاسىبي نەمەسە فوستەرلىك وتباسىلاردى قۇرۋ باستاماسى دا بار. بۇل جوبا دا ەلىمىزدەگى بالالار ءۇيىنىڭ سانىن ازايتۋعا باعىتتالعانى بەلگىلى. وسى ورايدا پيلوتتىق فورماتتا ىسكە قوسىلعان بۇل جوبانىڭ قازىرگى جاعدايى قانداي؟ ارنايى دايىندىقتان وتكەن فوستەرلىك وتباسىلاردىڭ سانى ارتتى ما؟ ەلىمىزدەگى جەتىم بالالاردى ورنالاستىرۋعا شامامەن 500 فوستەرلىك وتباسى قاجەت دەپ كورسەتىلگەن», دەدى دەپۋتات.
ەلىمىز بويىنشا قازىر سابيلەر ۇيىندە 707 ءبۇلدىرشىن تۇرىپ جاتىر, ال بالالار ۇيىندە 4916 تاربيەلەنۋشى بار.
«كوپ جاعدايدا بالالار ءۇيىنىڭ جەتەكشىلەرى اسىراپ العىسى كەلەتىندەرگە نەمەسە پاتروناتتىق وتباسىلارعا ولاردى بەرۋگە نيەت بىلدىرمەيدى. باس پروكۋراتۋرا مەن بالا اسىراپ الۋ جونىندەگى اگەنتتىك تاراپىنان جۇرگىزىلگەن تەكسەرىستىڭ ناتيجەسىندە ءتىپتى بالا اسىراپ الۋعا قارسى جاساندى كەدەرگىلەردى ويلاپ تاپقان جەتەكشىلەر دە انىقتالدى. ويتكەنى ءار بالاعا مەملەكەتتەن كولەمدى اقشا بولىنەدى. مىسالى, بالالار ۇيىندەگى ءبىر ءبۇلدىرشىن ءۇشىن مەملەكەتتەن ايىنا 1 ميلليونعا جۋىق قاراجات بەرىلەدى. وسى قاراجاتتى بالا اسىراپ العىسى كەلەتىن وتباسىلاردى قولداۋعا باعىتتاساق, بالا ءۇشىن بۇل الدەقايدا پايدالى بولارى انىق», دەدى قاراقات ابدەن.
