فوتو: aa.com.tr
«انادولى» اگەنتتىگىنىڭ مالىمەتىنشە, سايلاۋ ۋچاسكەلەرى تاڭعى 8:00-دە اشىلىپ, جەرگىلىكتى ۋاقىت بويىنشا 17:00-دە جابىلعان. ەلدە بارلىعى 191 885 داۋىس بەرۋ جاشىگى ورناتىلعان.
تۇركيادا جانە شەتەلدە 64,1 ميلليوننان استام سايلاۋشى داۋىس بەردى. سايلاۋشىلارعا پرەزيدەنت جانە دەپۋتاتتار ءۇشىن 2 بيۋللەتەن بەرىلدى.
ورتالىق سايلاۋ كوميسسياسى اقپان ايىنداعى جەر سىلكىنىسىنەن زارداپ شەككەن ەلدىڭ 11 پروۆينتسياسىندا داۋىس بەرۋ ءۇشىن قاجەتتى شارالاردى قابىلدادى.
شەتەلدىك ۋچاسكەلەردە 3,4 ميلليوننان استام ادام داۋىس بەردى. ولار ءۇشىن 73 ەلدە جانە 156 شەتەلدىك وكىلدىكتە سايلاۋ كوميسسيالارى قۇرىلدى. تۇركيانىڭ شەتەلدىك وكىلدىكتەرىندە داۋىس بەرۋ پروتسەسى 9 مامىردا اياقتالدى.
پرەزيدەنتتىككە باستى ۇمىتكەرلەر: 20 جىل بيلىكتە وتىرعان رەجەپ تايپ ەردوعان, 6 پارتيا اتىنان كانديدات بولعان كەمال كىلىچداروگلۋ جانە كواليتسيا وكىلى سينان وگان. ال ءتورتىنشى ۇمىتكەر مۋحاررەم يندجە سايلاۋعا ءۇش كۇن قالعاندا كانديداتۋراسىن الىپ تاستادى.
سايلاۋعا قاتىسۋ ءۇشىن 24 ساياسي پارتيا جانە 151 تاۋەلسىز كانديدات تىركەلدى. ەگەر ۇمىتكەرلەردىڭ ەشقايسىسى ءبىرىنشى تۋردا كوپشىلىك داۋىسقا يە بولماسا, 28 مامىردا ەكىنشى تۋر وتەدى.
