بىلتىرعى جىلدىڭ تامىز ايىندا اتاقتى امەريكالىق بوكسشى دەمەتريۋس اندرادە ورتا سالماقتاعى WBO نۇسقاسىنىڭ چەمپيوندىق اتاعىنان باس تارتقاننان كەيىن التىن بەلبەۋ رەسمي تۇردە جانىبەك ءالىمحان ۇلىنا تابىس ەتىلگەن ەدى. ارادا بىرەر اي وتكەن سوڭ ول لاس-ۆەگاستاعى جارىستا دەنزەل بەنتليدى ۇپاي سانىمەن ۇتىپ, العاش رەت ءوز اتاعىن ءساتتى قورعادى. كەشە قانداسىمىز الەم چەمپيونى رەتىندە ەكىنشى رەت شارشى الاڭعا شىقتى.
27 جاستاعى ستيۆەن باتلەر 2014 جىلدان بەرى كاسىپقويلار اراسىندا ونەر كورسەتىپ ءجۇر. سول ارالىقتا ول 37 كەزدەسۋ وتكىزىپ, 33 رەت جەڭىسكە جەتتى. 26 قارسىلاسىن ەسىنەن تاندىردى. ءۇش رەت ۇتىلىپ, تاعى ءبىر باسەكەدە تەڭ ەسەپ تىركەلدى. كانادالىق بىلعارى قولعاپ شەبەرى تەك ءوزىنىڭ وتانداسى برەندون كۋك, جاپونيالىق ريوتا مۋراتا جانە مەكسيكالىق جوسە دە جەسۋس ماسياسقا عانا ەسە جىبەردى. 2017 جىلى گەننادي گولوۆكين مەن ساۋل الۆارەس العاشقى جەكپە-جەكتەرىن وتكىزگەن كەزدە ءدال وسى باتلەر «كانەلونىڭ» سپاررينگ-پارتنەرى بولعان.
ستوكتونداعى باسەكە 12 راۋندقا ەسەپتەلگەنىمەن, ول ۇزاققا سوزىلمادى. بوكسشىلار رينگكە شىققان بەتتە سىرت كوزگە ستيۆەننىڭ قاتتى قوبالجىپ تۇرعانى انىق بايقالدى. سونىڭ الدىندا عانا «جولبارىستىڭ جۇرەگىنە جەرىك بولعان انالار مەن قاسقىر مىنەز بابالاردىڭ ۇرپاعىمىن!», دەپ جالپاق جۇرتقا جار سالعان جانىبەك وزىنە سەنىمدى بولدى. ءيا, ۇيەڭكى جاپىراقتار ەلىنىڭ وكىلى بەكەر سەسكەنبەگەن ەكەن. باسەكە باستالعان بەتتە قازاقتىڭ ءور مىنەزدى ورەنى بۇل سالماقتىڭ قوجايىنى كىم ەكەنىن بىردەن اڭعارتتى. ول بىردەن ەكپىندەپ شابۋىلداپ, قارسىلاسىن تىعىرىققا تىرەدى.
بارلىق ماسەلە ەكىنشى راۋندتا شەشىلدى. ءالىمحان ۇلى اۋەلى قارسىلاسىن ەكى رەت نوكداۋنعا جىبەردى. ءبىرىنشى نوكداۋننان كەيىن-اق باتلەردىڭ بەتى قايتتى. اياقتارى ۇستاماي, رينگتە ءوزىنىڭ نە ىستەپ, نە قويىپ جۇرگەنىن تۇسىنبەي قالدى. سول كەزدە تورەشى باسەكەنى توقتاتسا دا بولار ەدى. بىراق كاسىپقوي بوكستىڭ ءوز زاڭى بار. ەرتەڭ الىپ-قاشپا اڭگىمەلەر وربىمەۋ ءۇشىن كانادالىققا تاعى ءبىر مۇمكىندىك بەرىلدى. مۇنىسى بەكەر ەكەن. ارادا ساناۋلى سەكۋندتار وتكەندە جانىبەك اپپەركوت سوققىسىمەن قارسىلاسىن ەسەڭگىرەتىپ الدى دا, سول قولىمەن قۇلاق-شەكەدەن ۇردى. ستيۆەن كەسكەن تەرەكتەي قۇلادى. نوكاۋت!
ءسويتىپ, ءوزىنىڭ سپورتتىق مانسابىندا 14 رەت جەڭىس تويىن تويلاعان جانىبەك ءالىمحان ۇلى چەمپيوندىق اتاعىن ەكىنشى مارتە ءساتتى قورعادى. كەزدەسۋ اياقتالعان بەتتە ول «قايداسىڭدار, چەمپيوندار! كانەلو, چارلو, مەن سەندەردى كۇتىپ ءجۇرمىن. مەنىمەن جەكپە-جەككە شىعىڭدار! ەرتەڭ جۇدىرىقتاسايىق دەسەڭدەر دە دايارمىن. ويتكەنى ورتا سالماقتىڭ پاتشاسى مەنمىن!», دەپ ارقالانا سويلەدى.
