بايگە
بايگە - حالىق اراسىندا ەڭ كوپ تاراعان ات سپورتى. شاباندوزداردىڭ ات جارىسى قالىڭ كورەرمەنى بار, ەستەن كەتپەس ەرەكشە اسەر سىيلايتىن ۇلتتىق سپورت ءتۇرى. بۇگىندە ەلىمىزدە شاباندوزداردى دايىندايتىن 753 ۇيىرمە جۇمىس ىستەيدى. وندا 21 مىڭعا جۋىق بالا ۇلتتىق سپورتتىڭ قىر-سىرىن مەڭگەرەدى.
اسىق اتۋ
اسىق اتۋ — ەرتەدەن كەلە جاتقان قازاقتىڭ ۇلتتىق ويىنى. ول بالالاردى ەپتىلىككە, جىلدامدىققا, مەرگەندىككە ۇيرەتەدى. قازاقستاندا 2237 اسىق وينى ۇيىرمەسى بار. وندا 77 مىڭنان استام ادام ۇلتتىق سپورتپەن شۇعىلدانادى.
كوكپار
كورەرمەنى بويىنشا دا, قاتىسۋشىلار سانى جاعىنان دا كوكپار كوش باسىنداعى ۇلتتىق سپورت ءتۇرىنىڭ ءبىرى. ەلىمىزدە 78 مىڭنان استام ادام كوكپارمەن اينالىسادى. ولاردى جاتتىقتىرىپ, شەبەرلىكتەرىن شىڭدايتىن 916 ۇيىرمە بار.
قازاقشا كۇرەس
حالىق اراسىندا سپورتتىڭ جەكپە-جەك تۇرلەرى وتە تانىمال. سونىڭ ىشىندە قازاقشا كۇرەس قاتىسۋشىلار سانى مەن جانكۇيەرلەرى بويىنشا الدىڭعى قاتاردا. بۇگىندە ەلىمىز بويىنشا 4427 قازاقشا كۇرەس ۇيىرمەسى جۇمىس ىستەيدى. وندا 159 مىڭعا جۋىق ادام ۇلتتىق سپورت تۇرىمەن جۇيەلى تۇردە شۇعىلدانادى.
توعىزقۇمالاق
ەلىمىزدە ۇلتتىق سپورت تۇرلەرىنىڭ ىشىندەگى ەڭ تانىمالى – توعىزقۇمالاق.
ادامنىڭ ويلاۋ قابىلەتىن دامىتىپ, تاپقىرلىققا تاربيەلەيتىن زياتكەرلىك ويىن جاس ەرەكشەلىگىنە قاراماستان جالپىعا قولجەتىمدى. قازاقستاندا 6856 توعىزقۇمالاق ۇيىرمەسى بار. وعان 207 مىڭعا جۋىق ادام تۇراقتى تۇردە قاتىسادى.
