اتالعان جارىستا باستى ءۇمىت 60 كگ سالماق دارەجەسىندە كۇش سىناسقان ەلدوس سمەتوۆكە ارتىلعان ەدى. وليمپيادانىڭ ەكى دۇركىن جۇلدەگەرى, الەم مەن ازيا چەمپيونى, الەم چەمپيوناتىنىڭ ەكى دۇركىن قولا جۇلدەگەرى, ازيا ويىندارىنىڭ جەڭىمپازى دەگەن دارداي اتاعى بار قازاقتىڭ اتاقتى دزيۋدوشىسى تۇساۋكەسەر بەلدەسۋىندە جەڭىسكە جەتىپ, كەلەسى كەزەڭدە ديلشودبەك باتاروۆپەن بەلدەستى. 25 جاستاعى وزبەكستاننىڭ وكىلى وسى كۇنگە دەيىن اۋىز تولتىرىپ ايتارلىقتاي تابىستارعا قول جەتكىزە الماعان ەدى. سوعان قاراماستان ايگىلى قارسىلاسىمەن ەش قايمىقپاي ايقاسقان باتاروۆ شەشۋشى تۇستا سمەتوۆتى سان سوقتىرىپ كەتتى.
ەلدوسقا قاراعاندا نۇرقانات سەرىكباەۆ ءتاۋىر ونەر كورسەتتى. العاشىندا مولدوۆالىق الەكساندرۋ ءتيرسيندى تىزە بۇكتىرگەن ول ىلە-شالا وليمپيادانىڭ كۇمىس جۇلدەگەرى, الەمدىك رەيتينگتىڭ كوشباسشىسى, تايپەيلىك يان يۋنۆەيدى جولىنان ىعىستىردى. بۇل ناتيجە سەنساتسياعا بالاندى. ودان كەيىن نۇرقاناتتىڭ جولى توكيو وليمپياداسىنىڭ جەڭىمپازى, ريو وليمپياداسىنىڭ كۇمىس جۇلدەگەرى, الەمنىڭ ءتورت دۇركىن چەمپيونى, جاپونيالىق ناوحيسا تاكاتومەن قيىستى. جاپونيانىڭ جۇلدىزىنا جەرلەسىمىزدىڭ ءالى جەتپەدى. جۇبانىش بەلدەسۋدە گرۋزيالىق گەورگي ساردالاشۆيليدەن ۇتىلعان سەرىكباەۆ جەتىنشى ورىندى قاناعات تۇتتى.
66 كگ سالماقتاعى وڭتۇستىك كورەيانىڭ وعىلانى, وليمپيادانىڭ ەكى دۇركىن جۇلدەگەرى, الەم چەمپيونى, ازيا ويىندارىنىڭ جەڭىمپازى ان باۋل ەلىمىزدىڭ تاعى ءبىر بەلدى بالۋانى عۇسمان قىرعىزباەۆتى ءۇشىنشى اينالىمدا توقتاتتى. 73 كگ سالماق دارەجەسىندە باق سىناعان جانساي سماعۇلوۆ العاشقى بەلدەسۋىندە جەڭىلسە, دانيار شامشاەۆ ەكىنشى كەزەڭدە الەم چەمپيوناتىنىڭ كۇمىس جۇلدەگەرى, ەۋروپا چەمپيونى, يتاليالىق مانۋەل لومباردونىڭ وسال تۇسىن تابا المادى.
ايەلدەرگە كەلەر بولساق, 48 كگ سالماقتاعى ءابيبا ابۋجاقىنوۆانىڭ دوحادا جەڭىس تۇعىرىنا كوتەرىلۋىنە جاقسى مۇمكىندىگى بولدى. سوڭعى كەزدەرى ايقىشتى ونەرىمەن كوزگە ءتۇسىپ جۇرگەن قازاقتىڭ قايسار قىزى يزرايلدىك تامار مالكا, موڭعوليالىق بااسانحۋ باۆۋدورج جانە سەربيالىق ميليتسا نيكوليچتى ۇتىپ, ءوز جانكۇيەلەرىن ءبىر قۋانتقان ەدى. بىراق ودان ارىگە ونىڭ ءالى جەتپەدى. جارتىلاي فينالدا ءابيبا ەۋروپانىڭ ەكى دۇركىن چەمپيونى فرانتسيالىق شيرين بوۋكليگە جول بەردى. قولا مەدال ءۇشىن تارتىستا جەرلەسىمىز يتاليالىق اسسۋنتا سكۋتتونى جەڭە المادى. ناتيجەسىندە, بيىلعى جىلعى الەمدىك دودانى ابۋجاقىنوۆا بەسىنشى ورىنمەن قورىتىندىلادى. ازىرگە بۇل – قازاقستان دزيۋدوشىلارى اراسىنداعى ەڭ ءتاۋىر ناتيجە. ال وزگە بۇرىمدىلارىمىز كوڭىل كونشىتەرلىك ناتيجە كورسەتە المادى.
جارىس جەڭىمپازدارى مەن جۇلدەگەرلەرى
(ەرلەر)
60 كگ: 1. فرانتسيسكو گارريگوس (يسپانيا), 2. ديلشودبەك باتاروۆ (وزبەكستان), 3. گەورگي ساردالاشۆيلي (گرۋزيا) مەن لي حاريم (وڭتۇستىك كورەيا).
66 كگ: 1. حيفۋمي ابە (جاپونيا), 2. دزيوسيرو مارۋياما (جاپونيا), 3. يوندونپەرەنلەين باسحۋ (موڭعوليا) مەن ۆاليد حيار (فرانتسيا).
73 كگ: 1. نيلس ستۋمپ (شۆەيتساريا), 2. مانۋەل لومباردو (يتاليا), 3. سويتي حاسيموتو (جاپونيا) مەن مۋرودجون يۋلداشەۆ (وزبەكستان).
(ايەلدەر)
48 كگ: 1. ناتسۋمي تسۋنودا (جاپونيا), 2. شيرين بۋكلي (فرانتسيا), 3. ۆاكانا كوگا (جاپونيا) مەن اسسۋنتا سكۋتتو (يتاليا).
52 كگ: 1. ۋتا ابە (جاپونيا), 2. ديورا كەلديوروۆا (وزبەكستان), 3. اماندين بۋشار (فرانتسيا) مەن ودەتتە دجۋففريدا (يتاليا).
57 كگ: 1. كريستا دەگۋچي (كانادا), 2. حارۋكا فۋناكۋبو (جاپونيا), 3. ەنحۋرلەن لحاگۆتاگو (جاپونيا) مەن دجەسيكا كليمكايت (كانادا).
